`Hum se Yahya bin Bukair ne bayan kiya, kaha hum se Laith ne bayan kiya, kaha hum se Aqeel ne bayan kiya, un se Ibn Shihab ne, kaha hum se Hamid bin Abdur Rahman ne bayan kiya aur un se Abu Hurairah Radi Allahu Anhu ne ke Nabi Kareem صلی اللہ علیہ وسلم ne farmaya ”Adam Alaihis Salam aur Musa Alaihis Salam ne bahs ki, Musa Alaihis Salam ne kaha ke aap Adam hain jinhon ne apni nasl ko jannat se nikala. Adam Alaihis Salam ne kaha ke aap Musa hain jinhein Allah ne apne paigam aur kalam ke liye muntakhab kiya aur phir bhi aap mujhe ek aisi baat ke liye malamat karte hain jo Allah ne meri paidaish se pehle hi meri taqdeer mein likh di thi, chunancha Adam Alaihis Salam Musa Alaihis Salam par galib aaye.

Hum se Abdul Aziz Bin Abdullah ne bayan kiya kaha hum se Ibrahim Bin Saad ne bayan kiya un se Ibn Shihab ne un se Humaid Bin Abdur Rahman ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Musa aur Adam (Alaihimus Salam) ne aapas mein bahas ki. Musa (Alaihis Salam) ne un se kaha ke aap Adam hain jinhein un ki laghish ne jannat se nikala. Adam (Alaihis Salam) bole aur aap Musa (Alaihis Salam) hain ke jinhein Allah Ta'ala ne apni risalat aur apne kalam se nawaza phir bhi aap mujhe ek aise maamle par malamat karte hain jo Allah Ta'ala ne meri paidaish se bhi pehle muqaddar kar diya." Rasul Allah (Sallallahu Alaihi Wasallam) ne farmaya "Chunancha Adam (Alaihis Salam), Musa (Alaihis Salam) par ghalib aa gaye. Rasul Allah (Sallallahu Alaihi Wasallam) ne ye jumla do martaba farmaya."

Hum se Salt bin Muhammad ne byaan kiya , kaha hum se Mahdi bin Maymoon ne , un se Muhammad bin Sireen ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke (aalam e misal mein) Adam alaihissalam aur Musa alaihissalam ki mulaqat hui to Musa alaihissalam ne Adam alaihissalam se kaha ke Aap hi ne logon ko pareshani mein dala aur unhein jannat se nikala . Adam alaihissalam ne jawab diya ke Aap wahi hain jinhein Allah Ta'ala ne apni risalat ke liye pasand kiya aur khud apne liye pasand kiya aur Aap par Taurat nazil ki . Musa alaihissalam ne kaha ke ji haan . Is par Adam alaihissalam ne farmaya ke phir Aap ne to dekha hi ho ga ke meri paidaish se pehle hi yeh sab kuch mere liye likh diya gaya tha . Musa alaihissalam ne farmaya ke ji haan maloom hai . Chunanche Adam alaihissalam Musa alaihissalam par ghalib aa gaye . «al-yammu» ke maani darya ke hain .

Hum se Qutaybah ne byaan kiya , unhon ne kaha hum se Ayub bin Najjar ne byaan kiya , un se Yahya bin Abi Bakr ne , un se Abu Salamah bin Abdur Rahman ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke Musa alaihissalam ne Adam alaihissalam se bahas ki aur un se kaha ke Aap hi ne apni ghalati ke nateeja mein insanon ko jannat se nikala aur mushaqqat mein dala . Adam alaihissalam bolay ke Ae Musa! Aap ko Allah ne apni risalat ke liye pasand farmaya aur hum-klami ka sharaf bakhsha . Kya Aap ek aaisi baat par mujhe malamat karte hain jise Allah Ta'ala ne meri paidaish se bhi pehle mere liye muqarrar kar diya tha . Rasool Allah salla Allahu alaihi wasallam ne farmaya chunanche Adam alaihissalam Musa alaihissalam par bahas mein ghalib aa gaye .

Hum se Ali bin Abdullah ne bayan kiya , kaha hum se Sufyan ne bayan kiya , kaha ke hum ne Amr se is hadees ko yaad kiya , in se Taoos ne , unhon ne Abu Hurairah razi Allahu anhu se bayan kiya ke Nabi Karim salla Allahu alaihi wasallam ne irshad farmaya ”Adam aur Musa ne mubaahisa kiya . Musa alaihissalam ne Adam alaihissalam se kaha: Adam! Aap hamare baap hain magar Aap hi ne hamain mahroom kiya aur jannat se nikala . Adam alaihissalam ne Musa alaihissalam se kaha Musa Aap ko Allah Ta'ala ne ham-kalaami ke liye barguzida kiya aur apne hath se Aap ke liye Tauraat ko likha . Kya Aap mujhe ek aise kaam par malamat karte hain jo Allah Ta'ala ne mujhe paida karne se chalis saal pehle meri taqdeer mein likh diya thu . Aakhir Adam alaihissalam bahas mein Musa alaihissalam par ghalib aaye . Teen martaba Nabi Karim salla Allahu alaihi wasallam ne yeh jumla farmaya . Sufyan ne isi asnad se bayan kiya , kaha hum se Abu al-Zinad ne bayan kiya , in se Aaraj ne , in se Abu Hurairah razi Allahu anhu ne Nabi Karim salla Allahu alaihi wasallam se phir yahi hadees naqal ki .