Aur Hajjaj bin Minhal ne bayan kiya, kaha hum se Humam bin Yahya ne bayan kiya, kaha hum se Qatadah bin Da-aama ne bayan kiya aur in se Anas razi Allahu anhu ne ke Nabi Karim salla Allahu alaihi wasallam ne farmaya ”Qayamat ke din momino ko (garm maidan mein) روک diya jaye ga yahan tak ke is ki wajah se woh ghamgeen ho jayein ge aur (salah kar ke) kahein ge ke kaash koi hamare Rabb se hamari shafa'at karta ke hamain is halat se najat milti. Chunanche woh mil kar Adam alaihissalam ke paas aayein ge aur kahein ge ke Aap insaanon ke baap hain, Allah ne Aap ko apne hath se banaya aur Aap ko jannat mein maqam ata kiya, Aap ko sajda karne ka farishton ko hukm diya aur Aap ko har cheez ke naam sikhaye. Aap hamari shafa'at apne Rabb ke huzoor mein karein taake hamain is halat se najat de. Bayan kiya ke Adam alaihissalam kahein ge ke main is laiq nahi woh apni is ghalati ko yaad karein ge jo bawajood rukne ke darakht kha lene ki wajah se in se hui thi aur kahein ge ke Nooh alaihissalam ke paas jao kyunke woh pehle Nabi hain jinhein Allah Ta'ala ne zameen walon ki taraf Rasool bana kar bheija thu. Chunanche log Nooh alaihissalam ke paas aayein ge to woh bhi yeh farmayein ge ke main is laiq nahi aur apni is ghalati ko yaad karein ge jo baghair ilm ke Allah Rabb-ul-Izzat se sawal kar ke (apne bete ki bakhshish ke liye) unhon ne ki ku aur kahein ge ke Ibrahim alaihissalam ke paas jao jo Allah ke khaleel hain. Bayan kiya ke hum sab log Ibrahim alaihissalam ke paas aayein ge to woh bhi yahi uzr karein ge ke main is laiq nahi aur woh in teen baaton ko yaad karein ge jin mein Aap ne ba-zhahir ghalat-bayani ki ku aur kahein ge ke Musa alaihissalam ke paas jao. Woh aise bande hain jinhein Allah Ta'ala ne Tauraat di aur in se baat ki aur in ko nazdeek kar ke in se sargoshi ki. Bayan kiya ke phir log Musa alaihissalam ke paas aayein ge to woh bhi kahein ge ke main is laiq nahi hoon aur woh ghalati yaad karein ge jo ek shakhs ko qatl kar ke unhon ne ki ku. (Woh kahein ge) Albatta Esa alaihissalam ke paas jao woh Allah ke bande, us ke Rasool, Allah kirooh aur is ka kalma hain. Chunanche log Esa alaihissalam ke paas aayein ge. Woh farmayein ge ke main is laiq nahi hoon tum log Muhammad salla Allahu alaihi wasallam ke paas jao. Woh aise bande hain ke Allahne in ke agle pichhle tamam gunah maaf kar diye. Chunanche log meere paas aayein ge aur main apne Rabb se is ke dar e daulat yani arsh e mualla par aane ke liye ijazat chahoon ga. Mujhe is ki ijazat di jaye gi phir main Allah Ta'ala ko dekhte hi sajda mein gir paroon ga aur Allah Ta'ala mujhe jab tak chahe ga isi halat mein rehne de ga. Phir farmaye ga ke Ae Muhammad! sar uthao, kaho suna jaye ga, shafa'at karo tumhari shafa'at qabool ki jaye gi, jo maango ge diya jaye ga. Bayan kiya ke phir main apna sar uthaoon ga aur apne Rabb ki hamd o sana karoon ga jo woh mujhe sikhaye ga. Bayan kiya ke phir main shafa'at karoon ga. Chunanche meere liye hadd muqarrar ki jaye gi aur main is ke mutabiq logon ko dozakh se nikaal kar jannat mein dakhil karoon ga. Qatadah ne bayan kiya ke main ne Anas razi Allahu anhuko yeh kehte huay suna ke phir main nikaaloon ga aur jahannum se nikaal kar jannat mein dakhil karoon ga. Phir teesri martaba apne Rabb se is ke dar e daulat ke liye ijazat chahoon ga aur mujhe is ki ijazat di jaye gi. Phir main Allah Rabb-ul-Izzat ko dekhte hi is ke liye sajda mein gir paroon ga aur Allah Ta'ala jab tak chahe ga mujhe yun hi chhorre rakkhe ga. Phir farmaye ga: Ae Muhammad! sar uthao, kaho suna jaye ga shafa'at karo qabool ki jaye gi, maango diya jaye ga. Aap ne bayan kiya ke main apna sar uthaoon ga aur apne Rabb ki aaisi hamd o sana karoon ga jo woh mujhe sikhaye ga bayan kiya ke phir shafa'at karoon ga aur meere liye hadd muqarrar kar di jaye ga aur main is ke mutabiq jahannum se logon ko nikaal kar jannat mein dakhil karoon ga. Qatadah ne bayan kiya ke main ne Anas razi Allahu anhuko yeh kehte suna ke phir main logon ko nikaaloon ga aur unhein jahannum se nikaal kar jannat mein dakhil karoon ga, yahan tak ke jahannum mein sirf wahi log baqi reh jayein ge jinhein Quran ne روک rakkha ho ga yani unhein hamesha hi is mein rehna ho ga (yani kuffar-o-mushrikeen) phir Aap ne yeh aayat tilawat ki «asaaa ay-yab-asaka rab-baka maqamam-mahmoodan» ”qareeb hai ke Aap ka Rabb maqam e mahmood par Aap ko bheije ga“ farmaya ke yahi woh maqam e mahmood hai jis ke liye Allah Ta'ala ne apne habeeb salla Allahu alaihi wasallam se waada kiya hai.“

Hum se Muslim bin Ibrahim ne bayan kiya, un se Hishaam ne, un se Qatadah ne Anas ke waaste se naql kiya, woh Rasoolullah Sallallahu Alaihi Wasallam se riwayat karte hain ke Aap Sallallahu Alaihi Wasallam ne farmaaya jis shakhs ne «لاَ إِلَهَ إِلاَّ اللَّهُ» keh liya aur us ke dil mein jaw barabar bhi (imaan) hai to woh (ek na ek din) dozakh se zaroor niklega aur dozakh se woh shakhs (bhi) zaroor niklega jis ne Kalimah padha aur us ke dil mein gehun ke daane barabar khair hai aur dozakh se woh (bhi) niklega jis ne Kalimah padha aur us ke dil mein ek zarrah barabar bhi khair hai. Abu Abdullah (Imam Bukhari Rahimahullah) farmaate hain ke Abaan ne bariwayat-e-Qatadah bawaasta-e-Anas Radhiallahu Anhu Rasool Sallallahu Alaihi Wasallam se «خَيْر» ki jagah «إِيمَان» ka lafz naql kiya hai.

Ata ne bayan kiya ke Abu Saeed Khudri razi Allahu anhu bhi is waqt Abu Hurairah razi Allahu anhu saath baithe huay thay aur unhon ne in ki kisi baat par aitraz nahi kiya lekin jab Abu Hurairah razi Allahu anhu hadees ke is tukre tak pahunche ke tumhari yeh saari khwahishat poori ki jaati hain aur itni hi aur zyada neimatein di jaati hain to Abu Saeed Khudri razi Allahu anhu ne kaha ke main ne Rasool Allah salla Allahu alaihi wasallam se suna thu ke Nabi Karim salla Allahu alaihi wasallam ne farmaye thu ke tumhari yeh saari khwahishat poori ki jaati hain aur is se das guna aur zyada neimatein di jaati hain . Aur Abu Hurairah razi Allahu anhu ne kaha ke nahi main ne yun hi suna hai , yeh sab cheezin aur itni hi aur .