Aur Khalid bin Makhlad ne bayan kiya, in se Sulayman ne bayan kiya in se Abdullah bin Dinar ne bayan kiya, in se Abu Salih ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”jis ne halal kamayi se ek khajoor ke barabar bhi khairat ki aur Allah tak halal kamayi hi ki khairat pahunchti hai, to Allah usay apne dayein hath se qabool kar leta hai aur khairat karne wale ke liye usay is tarah barhata rehta hai jaise koi tum mein se apne bachhe-re ki parwarish karta hai, yahan tak ke woh pahar barabar ho jaati hai.“ Aur Warqa ne is hadees ko Abdullah bin Dinar se riwayat kiya, unhon ne Saeed bin Yasar se, unhon ne Abu Hurairah razi Allahu anhu se aur unhon ne Nabi Karim salla Allahu alaihi wasallam se, is mein bhi yeh fiqra hai ke Allah ki taraf wahi khairat charhti hai jo halal kamayi mein se ho.

Hum se Abdullah bin Muneer ne byaan kiya ‘ unhon ne Abul Nadar Salim bin Abi Umayyah se suna ‘ unhon ne byaan kiya ke mujh se Abdul Rahman bin Abdullah bin Dinar ne byaan kiya ‘ un se un ke walid ne ‘ un se Abu Salih ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya jo shakhs halal kamayi se ek khajoor ke barabar sadqa kare aur Allah Ta'ala sirf halal kamayi ke sadqa ko qabool karta hai to Allah Ta'ala isay apne dahne haath se qabool karta hai phir sadqa karne wale ke fayde ke liye is mein zyada-ti karta hai . Bilkul isi tarah jaise koi apne jaanwar ke bacche ko khila pila kar barhata hai ta-aanke is ka sadqa pahaar ke barabar ho jata hai . Abdul Rahman ke saath is riwayat ki mutaba'at Sulayman ne Abdullah bin Dinar ki riwayat se ki hai aur Warqa ne Ibn Dinar se kaha ‘ un se Saeed bin Yasaar ne ‘ un se Abu Hurairah razi Allahu anhu ne aur un se Nabi Karim salla Allahu alaihi wasallam ne aur is ki riwayat Muslim bin Abi Maryam ‘ Zaid bin Aslam aur Suhail ne Abu Salih se ki ‘ un se Abu Hurairah razi Allahu anhu ne aur un se Nabi Karim salla Allahu alaihi wasallam ne .