`Hum se Musa bin Ismail ne bayan kiya, kaha hum se Wuhaib bin Khalid ne bayan kiya, un se Khalid Hazza ne, un se Ikrima ne, un se Ibn Abbas Radi Allahu Anhuma ne bayan kiya ke Nabi Kareem صلی اللہ علیہ وسلم ne mujhe apne seene se lagaya aur farmaya ”Ae Allah! ise Quran ka ilm sikha.“

Hum se Abu Ma’mar ne bayan kiya, un se Abdul Waris ne, un se Khalid ne ’Ikrimah ke waaste se bayan kiya, woh Ibne-e-Abbas Radhiallahu Anhuma se riwayat karte hain. Unhon ne farmaaya ke (ek martaba) Rasoolullah Sallallahu Alaihi Wasallam ne mujhe (seene se) laga liya aur dua dete huwe farmaaya ke "Aye Allah ise ilm-e-kitaab (Quran) ata farmaaiyo".

Hum se Makki Ibn-e-Ibrahim ne bayan kiya, unhein Hanzalah ne Salim se khabar di, unhon ne Abu Hurairah Radhiallahu Anhu se suna, woh Rasoolullah Sallallahu Alaihi Wasallam se riwayat karte hain Aap Sallallahu Alaihi Wasallam ne farmaaya ke (ek waqt aisa aayega ke jab) ilm utha liya jaayega. Jahaalat aur fitne phail jaayenge aur Harj badh jaayega. Aap se poocha gaya ke ya RasoolAllah! Harj se kya muraad hai? Aap Sallallahu Alaihi Wasallam ne apne haath ko harkat de kar farmaaya is tarah, goya Aap Sallallahu Alaihi Wasallam ne us se qatl muraad liya.