`Hum se Abul Yaman ne bayan kiya ‘ kaha hum se Shuaib ne bayan kiya ‘ un se Zuhri ne ‘ un se Aamir bin Saad bin Abi Waqas ne ke unhon ne Usama bin Zaid Radi Allahu Anhuma se suna ‘ wo Saad bin Abi Waqas Radi Allahu Anhu se hadees naql kar rahe thay ke Rasul Allah صلی اللہ علیہ وسلم ne ta'oon ka zikr kiya aur farmaya ke yeh ek azab hai jis ke zariya baaz ummaton ko azab diya gaya tha is ke baad is ka kuch hissa baqi reh gaya hai aur wo kabhi chala jata hai aur kabhi wapas aa jata hai. Pas jo shakhs kisi sar-zameen par is ke phailne ke mutalliq sune to wahan na jaye lekin agar koi kisi jagah ho aur wahan yeh waba phoot pade to wahan se bhaage bhi nahi.

Hum se Abdul Aziz Bin Abdullah Uwaisi ne bayan kiya, unhon ne kaha mujh se Imam Malik ne bayan kiya, un se Muhammad Bin Munkadir aur Umar Bin Ubaidullah ke moula Abu Al-Nazr ne, un se Aamir Bin Saad Bin Abi Waqqas ne bayan kiya aur unhon ne (Aamir ne) apne walid (Saad Bin Abi Waqqas (Radi Allahu Anhu)) ko Usamah Bin Zaid (Radi Allahu Anhuma) se ye poochte suna tha ke Taaoon ke baare mein aap ne Nabi Kareem (Sallallahu Alaihi Wasallam) se kya suna hai? Unhon ne kaha ke Rasul Allah (Sallallahu Alaihi Wasallam) ne farmaya ke Taaoon ek azab hai jo pehle Bani Israel ke ek giroh par bheja gaya tha ya Aap (Sallallahu Alaihi Wasallam) ne ye farmaya ke ek guzashta ummat par bheja gaya tha. Is liye jab kisi jagah ke mutaliq tum suno (ke wahan Taaoon phela hua hai) to wahan na jao. Lekin agar kisi aisi jagah ye waba phel jaye jahan tum pehle se maujood ho to wahan se mat niklo. Abu Al-Nazr ne kaha yani bhagne ke siwa aur koi gharz na ho to mat niklo
.

Hum se Musa Bin Ismail ne bayan kiya, unhon ne kaha hum se Dawood Bin Abi Furat ne bayan kiya, kaha hum se Abdullah Bin Buraidah ne bayan kiya, un se Yahya Bin Yamar ne aur un se Umm-ul-Momineen Aisha (Radi Allahu Anha) ne bayan kiya ke mein ne Rasul Allah (Sallallahu Alaihi Wasallam) se Taaoon ke baare mein poocha to Aap (Sallallahu Alaihi Wasallam) ne farmaya ke ye ek azab hai, Allah Ta'ala jis par chahta hai bhejta hai lekin Allah Ta'ala ne is ko mominon ke liye rahmat bana diya hai. Agar kisi shakhs ki basti mein Taaoon phel jaye aur wo sabar ke sath Allah ki rahmat se umeed lagaye hue waheen thehra rahe ke hoga wohi jo Allah Ta'ala ne qismat mein likha hai to ise shaheed ke barabar sawab mile ga
.

Hum se Hafs bin Umar ne bayan kiya, kaha hum se Shubah ne kaha ke mujhe Habib bin Abi Sabit ne khabar di, kaha ke main ne Ibrahim bin Saad se suna, kaha ke main ne Usamah bin Zayd razi Allahu anhuma se suna, woh Saad razi Allahu anhu se bayan karte thay ke Nabi Karim salla Allahu alaihi wasallam ne farmaya ke jab tum sun lo ke kisi jagah taoon ki waba phail rahi hai to wahan mat jao lekin jab kisi jagah yeh waba phoot pare aur tum wahien maujood ho to is jagah se niklo bhi mat. (Habib bin Abi Sabit ne bayan kiya ke main ne Ibrahim bin Saad se) kaha tum ne khud yeh hadees Usamah razi Allahu anhu se suni hai ke unhon ne Saad razi Allahu anhu se bayan kiya aur unhon ne is ka inkar nahi kiya? Farmaya ke haan.

Hum se Ishaq bin Rahwayh ne bayan kiya, kaha hum ko Habban ne khabar di, kaha hum se Dawood bin Abi al-Furat ne bayan kiya, kaha hum se Abdullah bin Buraydah ne, in se Yahya bin Umar ne aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke Aap ne Rasool Allah salla Allahu alaihi wasallam se taoon ke mutalliq poochha. Nabi Karim salla Allahu alaihi wasallam ne farmaya ke yeh ek azab tha Allah Ta'ala jis par chahta is par is ko bhejta tha phir Allah Ta'ala ne usay momineen (ummat e Muhammadiya ke liye) rahmat bana diya ab koi bhi Allah ka banda agar sabr ke saath is shehar mein thehra rahe jahan taoon phoot para ho aur yaqeen rakhta hai ke jo kuch Allah Ta'ala ne is ke liye likh diya hai is ke siwa is ko aur koi nuqsan nahi pahunch sakta aur phir taoon mein is ka intiqal ho jaye to usay shaheed jaisa sawab mile ga. Habban bin Hilal ke saath is hadees ko Nadr bin Shumayl ne bhi Dawood se riwayat kiya hai.

Mujh se Ishaq bin Ibrahim Hanzhali ne bayan kiya , unhon ne kaha mujhko Nadr ne khabar di , unhon ne kaha hum se Dawood bin Abi al-Furaat ne bayan kiya , in se Abdullah bin Buraydah ne bayan kiya , in se Yahya bin Yamar ne bayan kiya aur unhein Aisha razi Allahu anha ne khabar di ke unhon ne Rasool Allah salla Allahu alaihi wasallam se taoon ke mutalliq poochha to Nabi Karim salla Allahu alaihi wasallam ne farmaya ke yeh azab thu aur Allah Ta'ala jis par chahta hai usay bheijta tha . Phir Allah Ta'ala ne usay mominon ke liye rahmat bana diya , koi bhi banda agar kisi aise shehar mein hai jis mein taoon ki waba phooti hui hai aur is mein thehra hai aur is shehar se bhaaga nahi sabr kiye huay hai aur is par ajar ka umeedar hai aur yaqeen rakhte hai ke us tak sirf wahi cheez pahunch sakti hai jo Allah ne is ki taqdeer mein likh di hai to usay shaheed ke barabar sawab mile ga .

`Hum se Abdullah bin Maslama Qanabi ne bayan kiya, kaha hum se Imam Malik ne, un se Ibn Shihab ne, un se Abdullah ibn Aamir bin Rabi'a ne ke Umar bin Khattab Radi Allahu Anhu (san 18 Hijri maah-e-Rabee-us-Sani mein) Sham tashreef le gaye. Jab maqaam-e-Sarag par pahunche to un ko yeh khabar mili ke Sham wabayi bimari ki lapait mein hai. Phir Abdur Rahman bin Auf Radi Allahu Anhu ne unhein khabar di ke Rasul Allah صلی اللہ علیہ وسلم ne farmaya tha ke jab tumhein maloom ho jaye ke kisi sar-zameen mein waba phaili hui hai to is mein dakhil mat ho, lekin agar kisi jagah waba phoot pade aur tum wahin maujood ho to waba se bhaagne ke liye tum wahan se niklo bhi mat. Chunancha Umar Radi Allahu Anhu maqaam-e-Sarag se wapas aa gaye. Aur Ibn Shihab se riwayat hai, un se Salim bin Abdullah ne ke Umar Radi Allahu Anhu Abdur Rahman bin Auf Radi Allahu Anhu ki hadees sun kar wapas ho gaye thay.