Hum se Abd-ul-Rahman bin al-Mubarak ne bayan kiya, kaha hum se Hammad bin Zayd ne, kaha hamase Ayub aur Yunus ne, in se Imam Hasan Basri ne, in se Ahnaf bin Qays ne ke main in sahab (Ali bin Abi Talib razi Allahu anhu) ki Jang e Jamal mein madad ke liye tayyar tha ke Abu Bakrah razi Allahu anhu se meri mulaqat hui. Unhon ne poochha, kahan ka irada hai? Main ne kaha ke in sahab ki madad ke liye jaana chahta hoon. Unhon ne farmaya ke wapas chale jao main ne Rasool Allah salla Allahu alaihi wasallam se suna hai Nabi Karim salla Allahu alaihi wasallam farmate thay ke jab do Musalman talwar khainch kar ek doosre se bharr jayein to qatil aur maqtul donon dozakh mein jaate hain. Main ne arz kiya: ya Rasool Allah! Ek to qatil thu lekin maqtul ko saza kyun mile gi? Nabi Karim salla Allahu alaihi wasallam ne farmaya ke woh bhi apne qatil ke qatl par aamada thu.

Hum se Sulaiman bin Harb ne bayan kiya, kaha hum se Sho’bah ne bayan kiya, unhon ne ise Waasil Ahdab se, unhon ne Ma’roor se, kaha main Abu Zar se Rabazah mein mila woh ek joda pahne huwe the aur un ka ghulam bhi joda pahne huwe tha. Main ne us ka sabab daryaaft kiya to kehne lage ke main ne ek shakhs yani ghulam ko bura-bhala kaha tha aur us ki maa ki ghairat dilaayi (yani gaali di) to Rasoolulllah Sallallahu Alaihi Wasallam ne yeh ma’loom kar ke mujh se farmaaya aye Abu Zar! Tu ne use maa ke naam se ghairat dilaayi, beshak tujh mein abhi kuch zamaana-e-jaahiliyyat ka asar baaqi hai. (Yaad rakho) matahat log tumhaare bhai hain. Allah ne (apni kisi maslihat ki bina par) unhein tumhaare qabze mein de rakha hai to jis ke matahat us ka koi bhai ho to us ko bhi wahi khilaye jo aap khaata hai aur wahi kapda use pahnaaye jo aap pahanta hai aur un ko itne kaam ki takleef na do ke un ke liye mushkil ho jaaye aur agar koi sakht kaam daalo to tum khud bhi un ki madad karo.

`Hum se Abdullah bin Abdul Wahhab ne bayan kiya, kaha hum se Hammad bin Zaid ne bayan kiya, un se ek shakhs ne jis ka naam nahi bataya, un se Imam Hasan Basri ne bayan kiya ke mein ek martaba baahmi fasadaat ke dinon mein apne hathiyar laga kar nikla to Abu Bakra Radi Allahu Anhu se raste mein mulaqat ho gayi. Unhon ne poocha kahan jaane ka irada hai? Mein ne kaha ke mein Rasul Allah صلی اللہ علیہ وسلم ke chacha ke larke ki (jang-e-jamal o siffeen mein) madad karni chahta hoon, unhon ne kaha laut jao. Nabi Kareem صلی اللہ علیہ وسلم ne farmaya hai ke jab do musalman apni talwaron ko le kar aamne saamne muqabla par aa jayein to donon dozakhi hain. Poocha gaya yeh to qatil tha, maqtool ne kya kiya (ke wo bhi naari ho gaya)? Farmaya ke wo bhi apne muqabil ko qatl karne ka irada kiye hue tha. Hammad bin Zaid ne kaha ke phir mein ne yeh hadees Ayub aur Yunus bin Ubaid se zikr ki, mera maqsad tha ke yeh donon bhi mujh se yeh hadees bayan karein, in donon ne kaha ke is hadees ki riwayat Hasan Basri ne Ahnaf bin Qais se aur unhon ne Abu Bakr Radi Allahu Anhu se ki. Hum se Sulaiman bin Harb ne bayan kiya kaha hum se Hammad bin Zaid ne yahi hadees bayan ki aur Mu'ammal bin Hisham ne kaha ke hum se Hammad bin Zaid ne bayan kiya, kaha hum se Ayub, Yunus, Hisham aur Mu'alla bin Ziyad ne Imam Hasan Basri se bayan kiya, un se Ahnaf bin Qais aur in se Abu Bakra Radi Allahu Anhu ne aur un se Nabi Kareem صلی اللہ علیہ وسلم ne aur is ki riwayat Ma'mar ne bhi Ayub se ki hai aur is ki riwayat Bakkar bin Abdul Aziz ne apne baap se ki aur un se Abu Bakra Radi Allahu Anhu ne aur Ghandar ne bayan kiya, kaha hum se Shu'ba ne bayan kiya, un se Mansoor ne, un se Rib'ee bin Harash ne, un se Abu Bakra Radi Allahu Anhu ne Nabi Kareem صلی اللہ علیہ وسلم se. Aur Sufyan Sauri ne bhi is hadees ko Mansoor bin Mu'tamir se riwayat kiya, phir yeh riwayat marfoo'a nahi hai.