Hum se Muaz bin Asad ne byaan kiya , kaha ke hamein Abdullah bin Mubarak ne khabar di , kaha ke hamein Mamar ne Zuhri se khabar di , kaha ke mujhe Mahmood bin Rabee ne khabar di , kaha ke main ne Utban bin Malik Ansari razi Allahu anhu se suna , unhon ne byaan kiya ke Rasool Allah salla Allahu alaihi wasallam ne (mere ghar tashreef lane ki) ijazat chahi aur main ne Aap ko ijazat di , Aap salla Allahu alaihi wasallam ne darkhwast farmaya ke tum log apne ghar mein jis jagah pasand karo main namaaz parh doon main jahan chahta tha us ki taraf main ne ishaare kiya . Phir Aap kharay ho gaye aur hum ne Aap ke peeche saf bandh li . Phir Aap ne jab salam phera to hum ne bhi salam phera .

Hum se Abdullah bin Maslama Qanabi ne bayan kiya , unhon ne kaha hum se Ibrahim bin Saad ne Ibn Shihab ke wastay se bayan kiya , unhon ne Mahmood bin Rabia se unhon ne Itban bin Malik se jo nabina thay ke Nabi Karim salla Allahu alaihi wa sallam un ke ghar tashreef laye . Aap salla Allahu alaihi wa sallam ne poocha ke tum apne ghar mein kahan pasand karte ho ke tumhare liye namaz parhun . Itban ne bayan kiya ke mein ne ek jagah ki taraf ishara kiya . Phir Nabi Karim salla Allahu alaihi wa sallam ne takbeer kahi aur hum ne aap salla Allahu alaihi wa sallam ke peechay saff bandhi phir aap salla Allahu alaihi wa sallam ne do rakat namaz nafl parhayi .

Hum se Ismail bin Abi Utbah ne byaan kiya , unhon ne kaha ke mujh se Imam Malik rahimahullah ne byaan kiya , unhon ne kaha hum se Ibn Shihab ne byaan kiya , unhon ne Mahmood bin Rabee Ansari se ke Ibn Malik Ansari razi Allahu anhu nabina thay aur woh apni qom ke imam thay . Unhon ne Rasool Allah salla Allahu alaihi wasallam se arz kiya ke ya Rasool Allah! andheri aur sailaab ki raatein hoti hain aur main andha hoon , is liye Aap mere ghar mein kisi jagah namaaz parh leejiye taake main wahin apni namaaz ki jagah bana loon . Phir Rasool Allah salla Allahu alaihi wasallam un ke ghar tashreef laye aur poocha ke tum kahan namaaz parhna pasand karo ge . Unhon ne ghar mein ek jagah batla di aur Rasool Allah salla Allahu alaihi wasallam ne wahan namaaz parhi .

Unhon ne byaan kiya ke main ne Itban bin Malik Ansari se suna , phir Bani Salim ke ek shakhs se is ki mazeed tasdeeq hui . Itban razi Allahu anhu ne kaha ke main apni qom Bani Salim ki imamat kiya karta tha . Main Nabi Karim salla Allahu alaihi wasallam ki khidmat mein haazir hua aur arz ki ke ya Rasool Allah! meri aankh kharab ho gayi hai aur (barsaat mein) paani se bhare huay naale mere aur meri qom ki masjid ke beech mein rukawat ban jate hain . Main chahta hoon ke Aap mere makaan par tashreef la kar kisi ek jagah namaaz ada farmayen taake main usay apni namaaz ke liye muqarrar kar loon Rasool Allah salla Allahu alaihi wasallam ne farmaya ke insha Allah taala main tumhari khwahish poori karoon ga subah ko jab din charh gaya to Nabi Karim salla Allahu alaihi wasallam tashreef laye . Abu Bakr razi Allahu anhu Aap ke saath thay . Aap salla Allahu alaihi wasallam ne (andar aane ki) ijazat chahi aur main ne de di . Aap salla Allahu alaihi wasallam baithe nahi balkay poocha ke ghar ke kis hisse mein namaaz parhwana chahte ho . Ek jagah ki taraf jisay main ne namaaz parhne ke liye pasand kiya tha . Ishaare kiya . Aap salla Allahu alaihi wasallam (namaaz ke liye) kharay huay aur hum ne Aap salla Allahu alaihi wasallam ke peeche saf banayi . Phir Aap salla Allahu alaihi wasallam ne salam phera aur jab Aap salla Allahu alaihi wasallam ne salam phera to hum ne bhi phera .