Hum se Amr bin Abbas ne bayan kiya , kaha hum se Abd-ul-Rahman bin Mahdi ne bayan kiya , kaha hum se Sufyan Sawri ne bayan kiya , in se Abu Qays (Abd-ul-Rahman bin Azwan) ne , in se Huzayl bin Shar-habeel ne bayan kiya aur in se Abdullah bin Masood razi Allahu anhu ne bayan kiya ke main Nabi Karim salla Allahu alaihi wasallam ke faisle ke mutabiq is ka faisla karoon ga , larki ko aadha , poti ko chhata aur jo baaqi bache behen ka hissa hai .

Hum se Adam bin Abi Iyas ne bayan kiya , kaha hum se Shubah ne , kaha hum se Abu Qays Abd-ur-Rahman bin Sarwan ne , unhon ne Huzayl bin Shar-habeel se suna , bayan kiya ke Abu Musa razi Allahu anhu se beti , poti aur behen ki meras ke baare mein poochha gaya to unhon ne kaha ke beti ko aadha mile ga aur behen ko aadha mile ga aur tu Ibn Masood razi Allahu anhu ke yahan ja , shayad woh bhi yahi batayein ge . Phir Ibn Masood razi Allahu anhu se poochha gaya aur Abu Musa razi Allahu anhu ki baat bhi pahunchayi gayi to unhon ne kaha ke main agar aisa fatwa doon to gumrah ho chuka aur theek raste se bhatak gaya . Main to is mein wahi faisla karoon ga jo Rasool Allah salla Allahu alaihi wasallam ne kiya thu ke beti ko aadha mile ga , poti ko chhata hissa mile ga , is tarah do tihayi poori ho jaye gi aur phir jo baaqi bache ga woh behen ko mile ga . Phir Abu Musa razi Allahu anhu ke paas aaye aur Ibn Masood razi Allahu anhu ki baat in tak pahunchayi to unhon ne kaha ke jab tak yeh aalim tum mein maujood hain mujh se masail na poochha karo .