Hum se Farwah bin Abi al-Maghraa ne bayan kiya , kaha hum se Ali bin Mushir ne , in se Hisham bin Urwah ne , in se un ke walid ne aur in se Aisha razi Allahu anha ne bayan kiya ke jab Uhud ki larayi mein mushrik shikast kha gaye aur apni shikast in mein mashhoor ho gayi to Iblees ne cheekh kar kaha (Musalmanon se) ke Ae Allah ke bando! Peeche dushman hai chunanche aage ke log peeche ki taraf pal pare aur peeche wale (Musalmanon hi se) lar pare . Is halat mein Huzayfah bin al-Yaman razi Allahu anhu ne dekha ke log in ke Musalman walid ko be-khabri mein maar rahe hain to unhon ne Musalmanon se kaha ke yeh to mere walid hain jo Musalman hain , mere walid! Aisha razi Allahu anha ne bayan kiya ke Allah ki qasam log phir bhi baaz nahi aaye aur aakhir unhein qatl kar hi dala . Huzayfah razi Allahu anhu ne kaha , Allah tumhari maghfirat kare . Urwah ne bayan kiya ke Huzayfah razi Allahu anhu ko apne walid ki is tarah shahadat ka aakhri waqt tak ranj aur afsos hi raha yahan tak ke woh Allah se ja mile .

Hum se Zakariya Bin Yahya ne bayan kiya, kaha hum se Abu Usama ne bayan kiya, kaha ke Hisham ne humein apne walid Urwah se khabar di aur un se Aisha (Radi Allahu Anha) ne bayan kiya, kaha ke Uhud ki ladai mein jab mushrikeen ko shikast ho gayi to Iblees ne chilla kar kaha ke Ae Allah ke bando! (yaani Musalmano) apne peechhe walon se bacho, chunanche aage ke Musalman peechhe ki taraf pal pade aur peechhe walon ko (jo Musalman hi thay) unhon ne marna shuru kar diya. Huzaifa (Radi Allahu Anhu) ne dekha to un ke walid Yaman (Radi Allahu Anhu) bhi peechhe thay. Unhon ne bahotaira kaha ke Ae Allah ke bando! Ye mere walid hain, ye mere walid hain. Lekin Allah gawah hai ke logon ne jab tak unhein qatl na kar liya na chhoda. Baad mein Huzaifa (Radi Allahu Anhu) ne sirf itna kaha ke khair. Allah tumhein maaf kare (ke tum ne ghalat fehmi se ek Musalman ko maar dala) Urwah ne bayan kiya ke phir Huzaifa (Radi Allahu Anhu) apne walid ke qatilon ke liye barabar maghfirat ki dua karte rahe. Ta-aanke Allah se ja mile
.