Hum se Yahya bin Bukayr ne bayan kiya, kaha hum se Layth bin Saad ne, unhon ne Yunus se, unhon ne Ibn Shihab se, kaha mujh se Urwah bin Zubayr ne bayan kiya ke Aisha razi Allahu anha ne kaha ke Hind bint Utbah bin Rabee-a (Muawiyah razi Allahu anhu ki maan) ne arz kiya: ya Rasool Allah! Saari zameen par jitne deray wale hain (yani Arab log jo aksar deron aur khaimon mein raha karte thay) main kisi ka zhaleel o khwar hona mujhko itna pasand nahi tha jitna Aap ka. Yahya bin Bukayr rawi ko shak hai (ke deray ka lafz ba-seegah e mufrad kaha ya ba-seegah e jama) ab koi dera wala ya deray wale un ko izzat aur aabroo haasil hona mujhko Aap ke deron walon se zyada pasand nahi hai (yani ab main Aap ki aur Musalmanon ki sab se zyada khair-khwah hoon) Nabi Karim salla Allahu alaihi wasallam ne farmaya ke abhi kya hai tu aur bhi zyada khair-khwah bane gi. Qasam hai is ki jis ke hath mein Muhammad (salla Allahu alaihi wasallam) ki jaan hai. Phir Hind kehne lagi ya Rasool Allah! Abu Sufyan to ek bakheel aadmi hai mujh par gunah to nahi ho ga agar main is ke maal mein se (apne baal bachon ko khilaoon) Aap salla Allahu alaihi wasallam ne farmaya nahi agar tu dastoor ke muafiq kharch kare.

Hum se Abu Nuaim ne bayan kiya, kaha ke hum se Sufyan ne bayan kiya, un se Hisham ne, un se Urwah ne aur un se Aisha (Radi Allahu Anha) ne ke Muawiyah (Radi Allahu Anhu) ki walida Hinda (Radi Allahu Anha) ne Rasul Allah (Sallallahu Alaihi Wasallam) se kaha ke Abu Sufyan bakheel aadmi hai. To kya agar mein un ke mal se chupa kar kuch le liya karoon to koi haraj hai ? Aap (Sallallahu Alaihi Wasallam) ne farmaya ke tum apne liye aur apne beton ke liye naik niyate ke sath itna le sakti ho jo tum sab ke liye kafi ho jaya kare
.