Mujh se Muhammad bin Bashar ne bayan kiya , kaha hum se Ghundar ne bayan kiya , kaha hum se Shubah ne bayan kiya , kaha ke main ne Abu Ishaq Sabee se suna , kaha ke main ne Nu-man bin Basheer razi Allahu anhu se suna , kaha ke main ne Nabi Karim salla Allahu alaihi wasallam se suna , Aap salla Allahu alaihi wasallam ne farmaya ke Qayamat ke din azab ke aitbar se sab se kam woh shakhs ho ga jis ke donon qadmon ke neeche aag ka angara rakkha jaye ga aur is ki wajah se is ka dimagh khol raha ho ga .

Mujh se Muhammad bin Bashar ne bayan kiya , kaha hum se Ghundar Muhammad bin Jafar ne bayan kiya , kaha hum se Shubah ne bayan kiya , in se Abu Imran Jooni ne bayan kiya , kaha main ne Anas bin Malik razi Allahu anhu se suna ke Nabi Karim salla Allahu alaihi wasallam ne farmaya ”Allah Ta'ala Qayamat ke din dozakh ke sab se kam azab paane wale se poochhe ga agar tumhein roye zameen ki saari cheezin mayassar hon to kya tum un ko fidya mein (is azab se najat paane ke liye) de do ge , woh kahe ga ke haan , Allah Ta'ala farmaye ga ke main ne tum se is se bhi sahal cheez ka is waqt mutalba kiya tha jab tum Adam alaihissalam ki peeth mein thay ke mere saath kisi ko shareek na karna lekin tum ne (tawheed ka) inkar kiya aur na maana aakhir shirk hi kiya .“

Hum se Abdullah bin Rajaa ne bayan kiya , kaha hum se Israeel ne bayan kiya , in se Abu Ishaq ne , in se Nu-man bin Basheer razi Allahu anhu ne bayan kiya ke main ne Nabi Karim salla Allahu alaihi wasallam se suna , Nabi Karim salla Allahu alaihi wasallam ne farmaya ke Qayamat ke din dozakhiyon mein azab ke aitbar se sab se halka azab paane wala woh shakhs ho ga jis ke donon pairon ke neeche do angare rakh diye jayein ge jin ki wajah se is ka dimagh khol raha ho ga jis tarah haandi aur kaitli josh khati hai .