Hum se Adam bin Abi Iyas ne bayan kiya , kaha hum se Ibn Abi Zhayb ne bayan kiya , in se Saeed Muqbiri ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”tum se kisi shakhs ko is ka amal najat nahi dila sake ga .“ Sahabah ne arz ki aur Aap ko bhi nahi ya Rasool Allah ? Farmaya ”aur mujhe bhi nahi , siwa is ke ke Allah Ta'ala mujhe apni rahmat ke saye mein le le . Pas tum ko chahiye ke durusti ke saath amal karo aur miyana-rawi ikhtiyar karo . Subah aur shaam , isi tarah raat ko zhara sa chal liya karo aur aitidal ke saath chala karo manzil e maqsud ko pahunch jao ge .“

Hum se Abdus Salaam bin Mutahhar ne bayan kiya, unhon ne kaha ke hum ko Umar bin Ali ne Ma’n bin Muhammed Ghifaari se khabar di, woh Sa’eed bin Abu Sa’eed Maqburi se, woh Abu Hurairah Radhiallahu Anhu se ke Nabi Kareem Sallallahu Alaihi Wasallam ne farmaaya be-shak deen aasaan hai aur jo shakhs deen mein sakhti ikhtiyaar karega to deen us par ghaalib aa jaayega (aur us ki sakhti na chal sakegi) pas (is liye) apne amal mein pukhtagi ikhtiyaar karo. Aur jahaan tak mumkin ho miyaanarawi barto aur khush ho jaao (ke is tarz-e-amal se tum ko daarain ke fawaaid haasil honge) aur subah aur dopahar aur shaam aur kisi qadr raat mein (ibadat se) madad haasil karo. (Namaz-e-panjwaqta bhi muraad ho sakti hai ke paabandi se ada karo.)

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, kaha hamain Abdur Rahman bin Auf razi Allahu anhu ke ghulam Abu Ubaidah ne khabar di aur in se Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna, Aap salla Allahu alaihi wasallam ne farmaya kisi shakhs ka amal usay jannat mein dakhil nahi kar sake ga. Sahabah ikraam razi Allahu anhum ne arz kiya: ya Rasool Allah! Aap ka bhi nahi? Aap salla Allahu alaihi wasallam ne farmaya nahi, mera bhi nahi, siwa is ke ke Allah apne fazl o rahmat se mujhe nawaze is liye (amal mein) miyana-rawi ikhtiyar karo aur qareeb qareeb chalo aur tum mein koi shakhs maut ki tamanna na kare kyunke ya woh naik ho ga to umeed hai ke is ke aamal mein aur izafa ho jaye aur agar woh bura hai to mumkin hai woh tauba hi kare.

Hum se Abd-ul-Aziz bin Abdullah ne bayan kiya , kaha hum se Sulayman ne bayan kiya , in se Musa bin Uqbah ne , in se Abu Salamah bin Abd-ur-Rahman ne aur in se Aisha razi Allahu anha ne ke Rasool Allah salla Allahu alaihi wasallam ne farmaya ”darmiyani chaal ikhtiyar karo aur buland-parwazi na karo aur jaan lo , tum mein se kisi ka amal usay jannat mein nahi dakhil kar sake ga , Allah ke nazdeek sab se pasandida amal woh hai jis par hameshagi ki jaye khwah kam hi kyun na ho .“

Hum se Ali bin Abdullah ne bayan kiya , kaha hum se Muhammad bin Zabarqan ne , kaha hum se Musa bin Uqbah ne , in se Abu Salamah bin Abd-ur-Rahman ne , in se Aisha razi Allahu anha ne ke Nabi Karim salla Allahu alaihi wasallam ne farmaya ”dekho jo naik kaam karo theek taur se karo aur hadd se na barh jao balkay is ke qareeb raho (miyana-rawi ikhtiyar karo) aur khush raho aur yaad rakkho ke koi bhi apne amal ki wajah se jannat mein nahi jaye ga . Sahabah ne arz kiya: aur Aap bhi nahi ya Rasool Allah! Farmaya aur main bhi nahi . Siwa is ke ke Allah apni maghfirat wa rahmat ke saye mein mujhe dhaank le . Madini ne bayan kiya ke mera khayal hai ke Musa bin Uqbah ne yeh hadees Abu Salamah se Abu al-Nadr ke waaste se suni hai , Abu Salamah ne Aisha razi Allahu anha se . Aur Affan bin Muslim ne bayan kiya ke hum se Wuhaib ne bayan kiya , in se Musa bin Uqbah ne bayan kiya , kaha ke main ne Abu Salamah razi Allahu anhu se suna aur unhon ne Aisha razi Allahu anha se aur unhon ne Nabi Karim salla Allahu alaihi wasallam se ke Aap salla Allahu alaihi wasallam ne farmaya ”durusti ke saath amal karo aur khush raho .“ Aur Mujahid ne bayan kiya ke «sadaadan sadeedan» har do ke maani sidq ke hain .