Hum se Abu Naeem Fadl bin Dukayn ne byaan kiya , kaha hum se Shayban ne Yahya bin Abi Kathir se byaan kiya , unhon ne Abdullah bin Abi Qatadah se , unhon ne apne baap Abu Qatadah Harith bin Rabee razi Allahu anhu se ke Rasool Allah salla Allahu alayhi wasallam ne farmaya ke namaaz ki takbeer ho to jab tak mujhe dekh na lo kharay na ho aur aahistagi ko laazim rakho . Shayban ke saath is hadees ko Yahya se Ali bin Mubarak ne bhi riwayat kiya hai .

Hum se Abu Naeem Fadl bin Dukayn ne byaan kiya , kaha ke hum se Shayban bin Abdur Rahman ne Yahya bin Abi Kathir se byaan kiya , unhon ne Abdullah bin Abi Qatadah se , unhon ne apne walid Abu Qatadah razi Allahu anhu se , unhon ne kaha ke hum Nabi Karim salla Allahu alayhi wasallam ke saath namaaz mein thay . Aap salla Allahu alayhi wasallam ne kuch logon ke chalne phirne aur bolne ki awaaz suni . Namaaz ke baad Aap salla Allahu alayhi wasallam ne darkhwast farmaya ke kya qissa hai logon ne kaha ke hum namaaz ke liye jaldi kar rahe thay . Aap salla Allahu alayhi wasallam ne farmaya ke aisa na karo . Balkay jab tum namaaz ke liye aao to waqar aur sukoon ko malhooz rakho , namaaz ka jo hissa pao usay parho aur jo reh jaye usay (baad) mein poora kar lo .

Hum se Aadam bin Abi Iyaas ne byaan kiya , kaha ke hum se Muhammad bin Abdur Rahman bin Abi Zib ne byaan kiya , kaha ke hum se Imam Zuhri ne Saeed bin Musayyab se byaan kiya , unhon ne Abu Hurayrah razi Allahu anhu se , unhon ne Nabi Karim salla Allahu alaihi wa sallam se (doosri sanad) aur Zuhri ne Abu Salama se , unhon ne Abu Hurayrah razi Allahu anhu se , unhon ne Nabi Karim salla Allahu alaihi wa sallam se Aap salla Allahu alayhi wasallam ne farmaya tum log takbeer ki awaaz sun lo to namaaz ke liye (mamooli chaal se) chal paro . Sukoon aur waqar ko (beharhaal) pakre rakho aur daur ke mat aao . Phir namaaz ka jo hissa mile usay parh lo , aur jo na mil sake usay baad mein poora kar lo .

Hum se Muslim bin Ibrahim ne byaan kiya , kaha ke hum se Hisham Dastuwai ne byaan kiya , kaha mujhe Yahya ne Abdullah Abdur Wahhab bin Abi Qatadah se yeh hadees likh kar bheji ke woh apne baap (Abu Qatadah) se bayan kartay thay ke Rasool Allah salla Allahu alayhi wasallam ne farmaya ke jab namaaz ke liye takbeer kahi jaye to us waqt tak na kharay ho jab tak mujhe nikalte huay na dekh lo .

Hum se Aadam bin Abi Iyaas ne byaan kiya , kaha ke hum se Ibn Abi Zayb ne byaan kiya , kaha ke hum se Zuhri ne Saeed aur Abu Salamah se byaan kiya , un se Abu Hurairah razi Allahu anhu ne aur un se Nabi Karim salla Allahu alaihi wasallam ne (doosri sanad se byaan kiya) Imam Bukhari rahmahu Allah ne kaha aur hum se Abul Yamaan ne byaan kiya , kaha ke hamein Shuayb ne khabar di , unhein Zuhri ne aur unhein Abu Salamah bin Abdur Rahman ne khabar di , woh Abu Hurairah razi Allahu anhu se riwayat karte thay ke Aap ne Rasool Allah salla Allahu alaihi wasallam ko yeh kehte hue suna ke jab namaaz ke liye takbeer kahi jaye to dorte hue mat aao balkay (apni mamooli raftar se) aao poore itminan ke sath phir namaaz ka jo hissa (Imam ke sath) palo use parh lo aur jo reh jaye to use baad mein poora karo .