Hum se Abul Yaman ne bayan kiya , unhon ne kaha ke humein Shoaib ne khabar di , unhon ne Zuhri se , unhon ne kaha ke mujhe Urwah bin Zubair ne khabar di ke Umm ul Momineen Aisha raziyallahu anha ne farmaya ke jab moazzin subah ki doosri azan de kar chup hota to Rasool Allah salla Allahu alaihi wa sallam khare hote aur farz se pehle do rakat sunnat fajr halki phulki ada karte subah sadiq roshan ho jane ke baad phir dahni karwat par let rahte . Yahan tak ke moazzin takbeer kehne ki ittila dene ke liye aap salla Allahu alaihi wa sallam ke pas aata .

Hum se Abdullah bin Yusuf Tinnisi ne bayan kiya , kaha ke humein Imam Malik ne Nafi se khabar di , unhon ne Abdullah bin Umar raziyallahu anhuma se , unhon ne kaha mujhe Umm ul Momineen Hafsa raziyallahu anha ne khabar di ke Rasool Allah salla Allahu alaihi wa sallam ki aadat thi ke jab moazzin subah ki azan subah sadiq ke tulu hone ke baad de chuka hota to aap salla Allahu alaihi wa sallam azan aur takbeer ke beech namaz qaim hone se pehle do halki si rakaten parhte .

Hum se Abu Naeem Fazl bin Dukain ne bayan kiya , unhon ne kaha ke hum se Shaiban ne Yahya bin Abi Kathir se bayan kiya , unhon ne Abu Salama bin Abdur Rahman bin Awf se , unhon ne Aisha Siddiqa raziyallahu anha se ke Nabi Karim salla Allahu alaihi wa sallam fajr ki azan aur iqamat ke darmiyan do halki si rakaten parhte thay .

Hum se Abul Yamaan ne byaan kiya , unhon ne kaha ke hamein Shuayb ne Zuhri se khabar di , unhon ne kaha ke mujh se Urwah bin Zubayr ne byaan kiya ke Aisha razi Allahu anha ne unhein khabar di ke Rasool Allah salla Allahu alaihi wasallam gyarah rakatein (Witr aur Tahajjud ki) parhte thay , Aap salla Allahu alaihi wasallam ki yahi namaaz thi . Murad un ki raat ki namaaz thi . Aap salla Allahu alaihi wasallam ka sajda in rakaton mein itna lamba hota tha ke sar uthane se pehle tum mein se koi shakhs bhi pachaas aayatein parh sakta aur Fajr ki namaaz farz se pehle Aap salla Allahu alaihi wasallam Sunnat do rakatein parhte thay is ke baad (zara der) dahne pehlu par lait rehte yahan tak ke muazzin bulane ke liye Aap salla Allahu alaihi wasallam ke paas aata .

Hum se Abul Yaman ne byaan kiya , unhon ne kaha ke hamen Shu'aib ne Zuhri se khabar di , unhon ne kaha ke mujhe Urwah ne khabar di aur unhen Ummul Mumineen Ayesha Siddiqa razi Allahu anha ne khabar di ke Rasool Allah salla Allahu alaihi wasallam (raat mein) gyarah rakaten parhte thay . Aap salla Allahu alaihi wasallam ki yahi namaaz thi . Lekin is ke sajday itne lambe hua karte ke tum mein se koi Nabi Karim salla Allahu alaihi wasallam ke sar uthane se qabal pachaas aayaten parh sakta tha (aur tuloo-e-fajr hone par) fajr ki namaaz se pehle Aap salla Allahu alaihi wasallam do rakat sunnat parhte . Is ke baad daayin pehlu par lait jate . Aakhir muazzin Aap salla Allahu alaihi wasallam ko namaaz ke liye bulane aata .

Hum se Abdullah bin Yazid ne byaan kiya , unhon ne kaha ke hum se Saeed bin Abi Ayub ne byaan kiya , unhon ne kaha ke mujh se Abul Aswad Muhammad bin Abdur Rahman ne byaan kiya , un se Urwah bin Zubayr razi Allahu anhu ne aur un se Aisha Siddiqa razi Allahu anha ne , unhon ne farmaya ke Nabi Karim salla Allahu alaihi wasallam Fajr ki do sunnat rakatain parhne ke baad dayein karwat par lait jaate .

Hum se Bishr bin Hakam ne byaan kiya , unhon ne kaha ke hum se Sufyan ne byaan kiya , unhon ne kaha ke mujh se Salim Abun Nadar ne Abu Salamah bin Abdur Rahman se byaan kiya aur un se Aisha razi Allahu anha ne ke Nabi Karim salla Allahu alaihi wasallam jab Fajr ki sunnatain parh chukte to agar mein jaagti hoti to Aap salla Allahu alaihi wasallam mujh se baatein karte warna lait jaate jab tak namaaz ki azaan hoti .

Hum se Yahya bin Bukayr ne byaan kiya , unhon ne kaha ke hum se Layth ne Aqeel se byaan kiya , Aqeel se Ibn Shihab ne , unhon ne kaha ke mujhe Salim ne khabar di aur unhein Abdullah bin Umar razi Allahu anhuma ne , Aap ne batlaya ke mein ne Rasool Allah salla Allahu alaihi wasallam ke saath Zohar se pehle do rakat sunnat parhi aur Zohar ke baad do rakat aur Juma ke baad do rakat aur Maghrib ke baad do rakat aur Isha ke baad bhi do rakat (namaaz sunnat) parhi hai .

Hum se Abdullah bin Yusuf Tanisi ne byaan kiya , unhon ne kaha ke humein Imam Malik rahimahullah ne khabar di , unhein Hisham bin Urwah ne , unhein un ke baap (Urwah bin Zubayr) ne aur unhein Aisha Siddiqa razi Allahu anha ne ke Rasool Allah salla Allahu alaihi wasallam raat mein terah rakatain parhte thay . Phir jab subah ki azaan sunte to do halki rakatain (sunnat Fajr) parh lete .

Hum se Abdullah bin Muhammad Musandi ne bayan kiya, unhon ne kaha hum se Hisham bin Yusuf ne bayan kiya, unhon ne kaha hum ko Mamar ne khabar di, unhein Zuhri ne, unhein Urwah ne aur unhein Aisha razi Allahu anha ne ke Nabi Karim salla Allahu alaihi wasallam raat mein (tahajjud ki) gyarah rakaat parhte thay phir jab fajr tuloo ho jati to do halki rakaat (sunnat e fajr) parhte. Is ke baad Aap dayein pehlu lait jaate aakhir moaz-zhin aata aur Nabi Karim salla Allahu alaihi wasallam ko ittila deta to Aap fajr ki namaz parhate.