Hum se Ishaq ne bayan kiya, kaha hum ko Yaqoob ne khabar di, mujh se mere walid ne bayan kiya, in se Salih ne, in se Ibn Shihab ne bayan kiya, kaha ke mujhe Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha razi Allahu anha ne bayan kiya ke Umar bin Khattab razi Allahu anhu Nabi Karim salla Allahu alaihi wasallam se kaha karte thay ke Nabi Karim salla Allahu alaihi wasallam azwaj e mutahharat ka parda karayein. Bayan kiya ke Nabi Karim salla Allahu alaihi wasallam ne aisa nahi kiya aur azwaj e mutahharat rafa-e-hajat ke liye sirf raat hi ke waqt nikalti thien (is waqt gharon mein bait-ul-khala nahi thay) ek martaba Sawdah bint Zam'ah razi Allahu anha bahar gayi hui thien. In ka qad lamba tha. Umar bin Khattab razi Allahu anhu ne unhein dekha. Is waqt woh majlis mein baithe huay thay. Unhon ne kaha Sawdah main ne Aap ko pehchan liya yeh unhon ne is liye kaha kyunke woh parda ke hukm nazil hone ke bare mutamanni thay. Bayan kiya ke phir Allah Ta'ala ne parda ki aayat nazil ki.

Hum se Yahya bin Bukair ne bayan kiya, unhon ne kaha hum se Laith ne bayan kiya, un se ’Aqeel ne Ibn-e-Shihaab ke waaste se naql kiya, woh ’Urwah bin Zubair se, woh Aisha Radhiallahu Anha se riwayat karte hain ke Rasoolullah Sallallahu Alaihi Wasallam ki biwiyaan raat mein Manasi’ ki taraf qazaa-e-haajat ke liye jaatien aur Manasi’ ek khula maidaan hai. To Umar Radhiallahu Anhu Rasoolullah Sallallahu Alaihi Wasallam se kaha karte the ke apni biwiyon ko pardah karaiye. Magar Rasoolullah Sallallahu Alaihi Wasallam ne us par amal nahi kiya. Ek roz raat ko ’Isha ke waqt Saudah Bint-e-Zam’ah Radhiallahu Anha, Rasoolullah Sallallahu Alaihi Wasallam ki ahliya jo daraaz qad aurat thein, (bahar) gayien. Umar Radhiallahu Anhu ne unhein aawaaz di (aur kaha) hum ne tumhein pehchaan liya aur un ki khwahish yeh thi ke pardah (ka hukm) naazil ho jaaye. Chunancha (us ke baad) Allah ne pardah (ka hukm) naazil farmaa diya.