Hum se Muhammad bin Muqatil Abu al-Hasan ne bayan kiya, unhon ne kaha hum ko Abdullah ne khabar di, unhon ne kaha hum ko Mamar ne khabar di, unhein Humam bin Munabbih ne aur unhein Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”chhota bade ko salam kare, guzarne wala baithne wale ko salam kare aur chhoti jama'at badi jama'at ko pehle salam kare.“

Hum se Qabisah bin ’Uqbah ne yeh Hadees bayan ki, un se Sufyan ne, woh A’mash bin Ubaidullah bin Murrah se naql karte hain, woh Masrooq se, woh Abdullah bin Umar Radhiallahu Anhuma se riwayat karte hain ke Rasoolullah Sallallahu Alaihi Wasallam ne farmaaya ke chaar aadatein jis kisi mein hon to woh khaalis munafiq hai aur jis kisi mein un chaaron mein se ek aadat ho to woh (bhi) nifaaq hi hai, jab tak use na chor de. (Woh yeh hain) jab use ameen banaaya jaaye to (amanat mein) khayanat kare aur baat karte waqt jhoot bole aur jab (kisi se) ahed kare to use poora na kare aur jab (kisi se) lade to gaaliyon par utar aaye. Is Hadees ko Sho’bah ne (bhi) Sufyan ke saath A’mash se riwayat kiya hai.

Hum se Muhammad ne bayan kiya, unhon ne kaha hum ko Makhlad ne khabar di, unhon ne kaha hum ko Ibn Jurayj ne khabar di, unhon ne kaha ke mujhe Ziyad ne khabar di, unhon ne Abd-ur-Rahman bin Zayd ke ghulam Sabit se suna, aur unhon ne Abu Hurairah razi Allahu anhu se suna. Unhon ne bayan kiya ke Rasool Allah salla Allahu alaihi wasallam ne farmaya ”sawar paidal chalne wale ko salam kare, paidal chalne wala baithe huay ko aur kam tadaad wale badi tadaad walon ko.“

Aur Ibrahim bin Tahman ne bayan kiya, unhon ne kaha ke hum se Musa bin Uqbah ne bayan kiya, in se Safwan bin Saleem ne bayan kiya, in se Ata bin Yasar ne bayan kiya aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”chhota bade ko salam kare, guzarne wala baithne wale ko aur kam tadaad wale badi tadaad walon ko.“