Hum se Musaddad ne bayan kiya, kaha hum se Yahya Qattan ne bayan kiya, in se Sufyan Sawri ne, in se Saad bin Ibrahim ne, in se Abdullah bin Shaddad ne aur in se Ali razi Allahu anhu ne bayan kiya ke main ne Rasool Allah salla Allahu alaihi wasallam ko kisi ke liye apne Aap ko qurban karne ka lafz kehte nahi suna, siwa Saad bin Abi Waqqas ke. Main ne Nabi Karim salla Allahu alaihi wasallam se suna, Aap salla Allahu alaihi wasallam farma rahe thay. Teer maar, Ae Saad! Mere maan baap tum par qurban hon, mera khayal hai ke yeh Ghazwa e Uhud ke mauqa par farmaya.

Hum se Musaddad ne bayan kiya, kaha hum se Yahya ne bayan kiya, un se Sufyan Bin Uyainah ne bayan kiya, kaha mujh se Saad Bin Ibrahim ne bayan kiya, un se Abdullah Bin Shaddad ne aur un se Ali (Radi Allahu Anhu) ne (doosri sanad) hum se Qabisah Bin Uqba ne bayan kiya, kaha hum se Sufyan Bin Uyainah ne bayan kiya, un se Saad Bin Ibrahim ne bayan kiya, kaha mujh se Abdullah Bin Shaddad ne bayan kiya, kaha ke mein ne Ali (Radi Allahu Anhu) se suna, aap bayan karte thay ke Saad Bin Abi Waqas (Radi Allahu Anhu) ke baad mein ne kisi ke mutalliq Nabi Kareem (Sallallahu Alaihi Wasallam) se nahi suna ke aap ne khud ko un par sadqe kiya ho. Mein ne suna ke aap (Sallallahu Alaihi Wasallam) farma rahe thay: "Teer barsao (Saad) tum par mere maan baap qurban hon."
.