Hum se Ali bin Abdullah ne bayan kiya, unhon ne kaha hum se Sufyan bin Uyaynah ne bayan kiya, in se Zuhri ne bayan kiya, in se Saeed bin al-Musayyab ne bayan kiya aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”log (angoor ko) «karm» kehte hain, «karm» to momin ka dil hai.“

Hum se Ay-yash bin al-Waleed ne bayan kiya, kaha hum se Abd-ul-A'la ne bayan kiya, kaha hum se Mamar ne bayan kiya, in se Zuhri ne, in se Abu Salamah ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”angoor «inab» ko «karm» na kaho aur yeh na kaho ke haye zamana ki na-muradi. Kyunke zamana to Allah hi ke ikhtiyar mein hai.“