Hum se Sulayman bin Harb ne bayan kiya , kaha hum se Hammad ne bayan kiya , woh Ibn Zayd hain , in se Yahya bin Saeed ne , in se Ansar ke ghulam Basheer bin Yasar ne , in se Rafi bin Khadeej aur Sahl bin Abi Hasma ne bayan kiya ke Abdullah bin Sahl aur Muhayyisah bin Masood Khaibar se aaye aur khajoor ke bagh mein ek doosre se juda ho gaye . Abdullah bin Sahl wahien qatl kar diye gaye . Phir Abd-ur-Rahman bin Sahl aur Masood ke donon bete Huwayyisah aur Muhayyisah Nabi Karim salla Allahu alaihi wasallam ki khidmat mein hazir huay apne maqtul saathi (Abdullah razi Allahu anhu) ke muqadma mein guftagu ki . Pehle Abd-ur-Rahman ne bolna chaha jo sab se chhote thay . Nabi Karim salla Allahu alaihi wasallam ne farmaya ke bare ki barayi karo . (Ibn Saeed ne is ka maqsud yeh) bayan kiya ke jo bara hai woh guftagu kare , phir unhon ne apne saathi ke muqadma mein guftagu ki . Nabi Karim salla Allahu alaihi wasallam ne farmaya ke agar tum mein se 50 aadmi qasam kha lein ke Abdullah ko Yahudiyon ne maara hai to tum diyat ke mustahiq ho jao ge . Unhon ne arz kiya: ya Rasool Allah! Hum ne khud to usay dekha nahi tha (phir is ke mutalliq qasam kaise kha sakte hain ?) Nabi Karim salla Allahu alaihi wasallam ne farmaya ke phir Yahood apne pachaas aadmiyon se qasam khulwa kar tum se chhutkara pa lein ge . Unhon ne arz kiya: ya Rasool Allah! Yeh kafir log hain (in ki qasam ka kya bharosa) chunanche Rasool Allah salla Allahu alaihi wasallam ne Abdullah bin Sahl ke warison ko diyat khud apni taraf se ada kar di . Sahl razi Allahu anhu ne bayan kiya ke in oonton mein se (jo Nabi Karim salla Allahu alaihi wasallam ne unhein diyat mein diye thay) ek oontni ko main ne pakra woh thaan mein ghus gayi , is ne ek laat mujhko lagayi . Aur Layth ne kaha mujh se Yahya ne bayan kiya , in se Basheer ne aur in se Sahl ne , Yahya ne yahan bayan kiya ke main samajhta hoon ke Basheer ne «ma-a Raafi-i-bin Khadeejin» ke alfaz kahe thay . Aur Sufyan bin Uyaynah ne bayan kiya , in se Yahya ne bayan kiya , in se Basheer ne aur unhon ne sirf Sahl se riwayat ki .

Hum se Musaddad ne bayan kiya, kaha hum se Bishr ne bayan kiya, kaha hum se Yahya ne bayan kiya, un se Bashir Bin Yasar ne aur un se Sahl Bin Abi Hasma (Radi Allahu Anhu) ne bayan kiya ke Abdullah Bin Sahl aur Muhayyisa Bin Masood Bin Zaid (Radi Allahu Anhuma) Khaibar gaye. Khaibar ke Yahudiyou se Musalmanon ki in dinon sula thi
.