Hum se Adam bin Abi Iyas ne bayan kiya , kaha hum se Shubah ne bayan kiya , in se Khalid ne , in se Abd-ur-Rahman bin Abi Bakrah ne , in se in ke walid ne Nabi Karim salla Allahu alaihi wasallam ki majlis mein ek shakhs ka zikr aaya to ek doosre shakhs ne in ki mubalgha se tareef ki to Nabi Karim salla Allahu alaihi wasallam ne farmaya ke afsos tum ne apne saathi ki gardan torr di . Nabi Karim salla Allahu alaihi wasallam ne yeh jumla kai baar farmaya , agar tumhare liye kisi ki tareef karni zaroori ho to yeh kehna chahiye ke main is ke mutalliq aisa khayal karta hoon , baqi ilm Allah ko hai woh aisa hai . Agar is ko yeh maloom ho ke woh aisa hi hai aur yun na kahe ke woh Allah ke nazdeek achha hi hai . Aur Wuhaib ne isi sanad ke saath Khalid se yun riwayat ki are teri kharabi tu ne is ki gardan kaat daali yani lafz «waihaka» ke bajaye lafz «wailaka» bayan kiya .

Hum se Abdullah Bin Yusuf ne bayan kiya, kaha ke humein Imam Malik ne khabar di, unhein Nafay ne, unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, jab koi shakhs kisi qism ka ghalla khareede to jab tak is par poori tarah qabza na kar le, usay na beche
.

Hum se Muhammad Bin Salam ne bayan kiya, kaha hum ko Abdul Wahhab ne khabar di, kaha ke hum se Khalid Hazza ne bayan kiya, un se Abdur Rahman Bin Abi Bakra ne aur un se un ke baap ne bayan kiya ke ek shaks ne Rasul Allah (Sallallahu Alaihi Wasallam) ke samne doosre shaks ki tareef ki, to Aap (Sallallahu Alaihi Wasallam) ne farmaya afsos! tu ne apne sathi ki gardan kaat dali. Tu ne apne sathi ki gardan kaat dali. Kai martaba (Aap Sallallahu Alaihi Wasallam ne isi tarah farmaya) phir farmaya ke agar kisi ke liye apne kisi bhai ki tareef karni zaroori ho jaye to yun kahe ke mein falan shaks ko aisa samajhta hoon, aage Allah khoob janta hai, mein Allah ke samne kisi ko be-aib nahi keh sakta. Mein samajhta hoon wo aisa aisa hai agar is ka haal janta ho
.

Hum se Muhammad Bin Sabah ne bayan kiya, unhon ne kaha hum se Ismail Bin Zakariya ne bayan kiya, unhon ne kaha hum se Buraid Bin Abdullah ne bayan kiya, un se Abu Musa Ash'ari (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne suna ke ek shaks doosre ki tareef kar raha tha aur mubalagha se kaam le raha tha to Rasul Allah (Sallallahu Alaihi Wasallam) ne farmaya ke tum logon ne is shaks ko halak kar diya. Is ki pusht tor di
.

Hum se Muhammad bin Sabbah ne bayan kiya , kaha hum se Ismail bin Zakariya ne bayan kiya , unhon ne kaha ke hum se Burayd bin Abdullah bin Abi Burdah ne bayan kiya , in se Abu Burdah ne aur in se Abu Musa Ash'ari razi Allahu anhu ne bayan kiya ke Nabi Karim salla Allahu alaihi wasallam ne suna ke ek shakhs doosre shakhs ki tareef kar raha hai aur tareef mein bahut mubalgha se kaam le raha tha to Nabi Karim salla Allahu alaihi wasallam ne farmaya ke tum ne usay halak kar diya ya (yeh farmaya ke) tum ne is shakhs ki kamar ko torr diya .

Hum se Musa bin Ismail ne bayan kiya , kaha hum se Wuhaib ne bayan kiya , in se Khalid ne , in se Abd-ur-Rahman bin Abi Bakrah ne aur in se in ke walid ne bayan kiya ke Nabi Karim salla Allahu alaihi wasallam ke samne ek shakhs ne doosre shakhs ki tareef ki . Nabi Karim salla Allahu alaihi wasallam ne farmaya afsos «wailaka» tum ne apne bhai ki gardan kaat di , teen martaba (yeh farmaya) agar tumhein kisi ki tareef hi karni par jaye to yeh kaho ke falan ke mutalliq mera yeh khayal hai . Agar woh baat is ke mutalliq jaanta ho aur Allah is ka nigran hai main to Allah ke muqablay mein kisi ko naik nahi keh sakta yani yun nahi keh sakta ke woh Allah ke ilm mein bhi naik hai .