(Doosri sanad) Imam Bukhari rahmahullah ne kaha ke mujh se Abd-ur-Rahman bin Bishr ne bayan kiya, in se Bahz bin Asad Basri ne bayan kiya, in se Shubah ne bayan kiya, in se Ibn Usman bin Abdullah bin Mohab aur in ke walid Usman bin Abdullah ne bayan kiya ke unhon ne Musa bin Talha se suna aur unhon ne Abu Ayub Ansari razi Allahu anhu se ke ek sahab ne kaha: ya Rasool Allah! Koi aisa amal batayein jo mujhe jannat mein le jaye. Is par logon ne kaha ke usay kya ho gaya hai, usay kya ho gaya hai. Nabi Karim salla Allahu alaihi wasallam ne farmaya ke kyun ho kya gaya hai? Aji is ko zaroorat hai bechara is liye poochhta hai. Is ke baad Aap salla Allahu alaihi wasallam ne in se farmaya ke Allah ki ibadat kar aur is ke saath kisi aur ko shareek na kar, namaz qaim kar, zakat dete raho aur sila-rahmi karte raho. (Bas yeh aamal tujh ko jannat mein le jayein ge) chal ab nakeel chhorr de. Rawi ne kaha shayad is waqt Nabi Karim salla Allahu alaihi wasallam apni oontni par sawar thay.

Allah Azzawajal ka irshad ”aur un ke maalon mein mangne wale aur na mangne wale (muhtajon) ka haq hai“

Hum se Muhammad bin Abdul Raheem ne byaan kiya ‘ kaha ke hum se Affan bin Muslim ne byaan kiya ‘ kaha ke hum se Wuhaib bin Khalid ne byaan kiya un se Yahya bin Saeed bin Hayyan ne ‘ un se Abu Zurah ne aur un se Abu Hurairah razi Allahu anhu ne ke ek dehati Nabi Karim salla Allahu alaihi wasallam ki khidmat mein aaya aur arz ki ke Aap mujhe koi aisa kaam batlayiye jis par agar main hameshaigi karoon to Jannat mein dakhil ho jaon . Aap salla Allahu alaihi wasallam ne farmaya ke Allah ki ibadat kar ‘ us ka kisi ko shareek na thehra ‘ farz namaaz qaim kar ‘ farz zakat de aur Ramzan ke roze rakh . Dehati ne kaha is zaat ki qasam jis ke haath mein meri jaan hai ‘ in amlon par main koi zyada-ti nahi karoon ga . Jab woh peeth mor kar jaane laga to Nabi Karim salla Allahu alaihi wasallam ne farmaya ke agar koi aise shakhs ko dekhna chahe jo Jannat walon mein se ho to woh is shakhs ko dekh le .