Mujh se Ishaq bin Ibrahim Hanzali ne bayan kiya, kaha hum ko Yahya bin Adam ne khabar di, kaha hum se Warqa bin Amr ne bayan kiya, in se Ubaidullah bin Abi Yazid ne, in se Nafi bin Jubayr ne bayan kiya, in se Abu Hurairah razi Allahu anhu ne bayan kiya ke main Madinah ke bazaron mein se ek bazar mein Rasool Allah salla Allahu alaihi wasallam ke saath tha. Nabi Karim salla Allahu alaihi wasallam wapas huay to main phir Aap ke saath wapas hua, phir Aap salla Allahu alaihi wasallam ne farmaya bacha kahan hai. Yeh Aap ne teen martaba farmaya. Hasan bin Ali ko bulao. Hasan bin Ali razi Allahu anhuma aa rahe thay aur in ki gardan mein (khushboo-dar loung waghaira ka) haar para tha. Nabi Karim salla Allahu alaihi wasallam ne apna hath is tarah phailaya ke (Aap Hasan razi Allahu anhu ko gale se lagaane ke liye) aur Hasan razi Allahu anhu ne bhi apna hath phailaya aur woh Nabi Karim salla Allahu alaihi wasallam se lipat gaye. Phir Aap salla Allahu alaihi wasallam ne farmaya, Ae Allah! Main is se mohabbat karta hoon tu bhi is se mohabbat kar aur in se bhi mohabbat kar jo is se mohabbat rakhein. Abu Hurairah razi Allahu anhu ne bayan kiya ke Nabi Karim salla Allahu alaihi wasallam ke is irshad ke baad koi shakhs bhi Hasan bin Ali razi Allahu anhuma se zyada mujhe pyaara nahi tha.

Hum se Ali Bin Abdullah ne bayan kiya, kaha ke hum se Sufyan Bin Uyainah ne bayan kiya, un se Ubaidullah Bin Yazid ne un se Nafay Bin Jubair Bin Mut'im ne aur un se Abu Hurairah Dosi (Radi Allahu Anhu) ne bayan kiya ke Rasul Allah (Sallallahu Alaihi Wasallam) din ke ek hissa mein tashreef le chale. Na Aap (Sallallahu Alaihi Wasallam) ne mujh se koi baat ki aur na mein ne Aap (Sallallahu Alaihi Wasallam) se. Isi tarah Aap (Sallallahu Alaihi Wasallam) Bani Qaynuqa ke bazaar mein aaye phir (wapas hue aur) Fatima (Radi Allahu Anha) ke ghar ke aangan mein baith gaye aur farmaya, wo baccha kahan hai, wo baccha kahan hai ? Fatima (Radi Allahu Anha) (kisi mashghooliyat ki wajah se fauran) Aap (Sallallahu Alaihi Wasallam) ki khidmat mein hazir na ho sakeein. Mein ne khayal kiya, mumkin hai Hasan (Radi Allahu Anhu) ko kurta waghera pehna rahi hon ya nahla rahi hon. Thori hi dair baad Hasan (Radi Allahu Anhu) dorte hue aaye, Aap (Sallallahu Alaihi Wasallam) ne un ko seene se laga liya aur bosa liya, phir farmaya ae Allah ?! usay mehboob rakh aur is shakhs ko bhi mehboob rakh jo is se mohabbat rakkhe. Sufyan ne kaha ke Ubaidullah ne mujhe khabar di, unhon ne Nafay Bin Jubair ko dekha ke unhon ne witr ki namaz sirf ek hi rak'at parhi thi
.

Hum se Hajjaj Bin Minhal ne bayan kiya, kaha hum se Shuba ne bayan kiya, kaha ke mujhe Adi ne khabar di, kaha ke mein ne Bara Radi Allahu Anhu se suna, unhon ne bayan kiya ke mein ne Rasul Allah Sallallahu Alaihi Wasallam ko dekha ke Hasan Radi Allahu Anhu Aap ke kandhe mubarak par thay aur Aap Sallallahu Alaihi Wasallam ye farma rahe thay " Ay Allah! Mujhe is se mohabbat hai tu bhi is se mohabbat rakh. "
.