Hum se Abu al-Yaman ne bayan kiya, unhon ne kaha hum ko Shuayb ne khabar di, unhein Zuhri ne, unhon ne kaha ke mujhe Abu Salamah bin Abdur Rahman bin Auf razi Allahu anhu ne khabar di ke Nabi Karim salla Allahu alaihi wasallam ki zauja mutahhara Aisha razi Allahu anha ne unhein khabar di ke jab Rasool Allah salla Allahu alaihi wasallam ki wafat hui to Aap ki naash e mubarak par ek sabz Yamani chadar daal di gayi thi.

Hum se Muhammad bin Muqatil ne byaan kiya , unhon ne kaha ke hum ko Abdullah ne khabar di , unhon ne kaha ke humein Hisham bin Urwah ne khabar di , unhein un ke baap Urwah bin Zubayr ne aur unhein (un ki khala) Umm al-Mumineen Aisha Siddiqa razi Allahu anha ne ke Rasool Allah salla Allahu alaihi wasallam ko Yemen ke teen safaid soti dhulay huay kapron mein kafan diya gaya un mein na qamees thi na amama .

Hum se Abu Naeem ne byaan kiya , kaha ke hum se Sufyan Thauri ne byaan kiya ‘ un se Hisham bin Urwah ne ‘ un se Urwah bin Zubayr ne ‘ un se Aisha razi Allahu anha ne ke Nabi Karim salla Allahu alaihi wasallam ko teen soti dhulay huay kapron ka kafan diya gaya tha Aap salla Allahu alaihi wasallam ke kafan mein na qamees thi aur na amama .

Hum se Musaddad ne byaan kiya , un se Yahya ne un se Hisham ne un se un ke baap Urwah bin Zubayr ne un se Umm al-Mumineen Aisha razi Allahu anha ne ke Rasool Allah salla Allahu alaihi wasallam ko teen kapron mein kafan diya gaya tha jin mein na qamees thi aur na amama tha . Imam Abu Abdullah Bukhari rahimahullah farmate hain ke Abu Naeem ne lafz «thalathah» nahin kaha aur Abdullah bin Waleed ne Sufyan se lafz «thalathah» naqal kiya hai .

Hum se Ismail ne byaan kiya kaha ke mujh se Malik ne byaan kiya ‘ un se Hisham bin Urwah ne ‘ un se un ke baap Urwah bin Zubayr ne ‘ un se Aisha razi Allahu anha ne ke Rasool Allah salla Allahu alaihi wasallam ko Suhool ke teen safaid kapron ka kafan diya gaya tha na un mein qamees thi aur na amama tha .

Hum se Mualla bin Asad ne byaan kiya ‘ unhon ne kaha hum se Wuhaib bin Khalid ne byaan kiya ‘ un se Hisham bin Urwah ne ‘ un se un ke baap ne aur un se Aisha razi Allahu anha ne ke main (walid majid) Abu Bakr razi Allahu anhu ki khidmat mein (un ki marad-ul-maut mein) hazir hui to Aap ne poocha ke Nabi Karim salla Allahu alaihi wasallam ko tum logon ne kitne kapron ka kafan diya tha ? Aisha razi Allahu anha ne jawab diya ke teen safaid dhule hue kapron ka . Aap ko kafan mein qameez aur amama nahi diya gaya tha aur Abu Bakr razi Allahu anhu ne un se yeh bhi poocha ke Aap salla Allahu alaihi wasallam ki wafat kis din hui thi . Unhon ne jawab diya ke Peer ke din . Phir poocha ke aaj kaun sa din hai ? Unhon ne kaha aaj Peer ka din hai . Aap ne farmaya ke phir mujhe bhi umeed hai ke ab se raat tak main bhi ruxat ho jaon ga . Is ke baad Aap ne apna kapra dekha jisay marad ke dauran mein Aap pehen rahe thay . Is kapre par zafraan ka dhabba laga hua tha . Aap ne farmaya mere is kapre ko dho lena aur is ke saath do aur mila lena phir mujhe kafan unhein ka dena . Maine kaha ke yeh to purana hai . Farmaya ke zinda aadmi naye (kapre) ka murde se zyada mustahiq hai ‘ yeh to peep aur khoon ki nazar ho jaye ga . Phir Mangal ki raat ka kuch hissa guzarne par Aap ka intiqaal hua aur subah hone se pehle Aap ko dafan kiya gaya .