Hum se Saeed bin Afir ne bayan kiya, kaha ke mujh se Layth bin Saad ne bayan kiya, kaha ke mujh se Abd-ur-Rahman bin Khalid ne bayan kiya, in se Ibn Shihab ne, in se Salim bin Abdullah ne aur in se in ke walid ne bayan kiya ke Rasool Allah salla Allahu alaihi wasallam ne farmaya ”ek shakhs ghuroor mein apna tehmat ghasit-ta hua chal raha tha ke usay zameen mein dhansa diya gaya aur woh isi tarah Qayamat tak zameen mein dhans-ta hi rahe ga.“ Is ki mutabia-t Yunus ne Zuhri se ki hai, unhon ne Abu Hurairah razi Allahu anhu se, usay marfoo-an nahi bayan kiya.

Hum se Bishr Bin Muhammad ne bayan kiya, kaha hum ko Abdullah Bin Mubarak ne khabar di, kaha hum ko Yunus ne khabar di, unhein Zuhri ne, unhein Salim ne khabar di aur un se Ibn Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Ek shakhs takabbur ki wajah se apna tehband zameen se ghasitta hua ja raha tha ke ise zameen mein dhansa diya aur ab wo qiyamat tak yun hi zameen mein dhans-ta chala jaye ga." Yunus ke sath is hadees ko Abdur Rahman Bin Khalid ne bhi Zuhri se riwayat kiya hai
.

Hum se Adam bin Abi Iyas ne bayan kiya, kaha hum se Shubah ne bayan kiya, kaha hum se Muhammad bin Ziyad ne bayan kiya, kaha ke main ne Abu Hurairah razi Allahu anhu se suna, unhon ne bayan kiya ke Nabi ya (yeh bayan kiya ke) Abu al-Qasim salla Allahu alaihi wasallam ne farmaya ”(Bani Israeel mein) ek shakhs ek jora pehan kar kibr o ghuroor mein sar-mast, sar ke baalon mein kanghi kiye huay akar kar itrata ja raha tha ke Allah Ta'ala ne usay zameen mein dhansa diya ab woh Qayamat tak is mein tarapta rahe ga ya dhans-ta rahe ga.“