Hum se Ahmad bin Yunus ne bayan kiya, kaha hum se Zuhayr ne bayan kiya, kaha hum se Musa bin Uqbah ne, in se Salim bin Abdullah ne aur in se in ke walid ne ke Nabi Karim salla Allahu alaihi wasallam ne farmaya ”jo shakhs takabbur ki wajah se tehband ghasit-ta hua chale ga to Allah Paak is ki taraf Qayamat ke din nazar bhi nahi kare ga.“ Abu Bakr razi Allahu anhu ne arz kiya: ya Rasool Allah! Mere tehmat ka ek hissa kabhi latak jata hai magar yeh ke khaas taur se is ka khayal rakkha karoon. Aap salla Allahu alaihi wasallam ne farmaya ”tum in logon mein se nahi ho jo aisa takabbur se karte hain.“

Hum se Muhammad bin Muqatil ne bayan kiya, kaha hum ko Abdullah bin al-Mubarak ne khabar di, kaha hum ko Musa bin Uqbah ne khabar di, unhein Salim bin Abdullah ne aur un se Abdullah bin Umar Radi Allahu Anhuma ne bayan kiya ke Rasoolullah Sallallahu Alaihi Wa Sallam ne farmaya ke jo shakhs apna kapra (pajama ya tehband waghaira) takabbur aur ghuroor ki wajah se zameen par ghaseetta chale to Allah Ta'ala Qiyamat ke din is ki taraf nazar-e-rahmat se dekhega bhi nahi, is par Abu Bakr Siddiq Radi Allahu Anhu ne arz kiya ke mere kapre ka ek hissa latak jaya karta hai. Albatta agar mein poori tarah khayal rakhun to woh nahi latak sakega. Nabi Kareem Sallallahu Alaihi Wa Sallam ne farmaya ke Aap to aisa takabbur ke khayal se nahi karte (is liye Aap is hukm mein dakhil nahi hain) Musa ne kaha ke mein ne Salim se poocha, kya Abdullah bin Umar Radi Allahu Anhuma ne is hadeeth mein yeh farmaya tha ke jo apni izaar ko ghaseette hue chale, to unhon ne kaha ke mein ne to in se yahi suna ke jo koi apna kapra latkaye.

Hum se Ismail bin Abi Oways ne bayan kiya, kaha mujh se Imam Malik ne, unhon ne Nafi aur Abdullah bin Dinar aur Zayd bin Aslam se, unhon ne Abdullah bin Umar razi Allahu anhuma ne ke Rasool Allah salla Allahu alaihi wasallam ne farmaya ”Allah Ta'ala is ki taraf Qayamat ke din nazar e rahmat nahi kare ga jo apna kapra takabbur o ghuroor se zameen par ghasit kar chalta hai.“

Hum se Adam bin Abi Iyas ne bayan kiya, unhon ne kaha hum se Shubah ne bayan kiya, unhon ne kaha hum se Saeed bin Abi Saeed Muqbiri ne bayan kiya aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”tehband ka jo hissa takhnon se neeche latka ho woh jahannum mein ho ga.“

Hum se Abdullah bin Yusuf ne bayan kiya, kaha hamain ko Imam Malik ne khabar di, unhein Abu al-Zinad ne, unhein Aaraj ne aur unhein Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”jo shakhs apna tehmat ghuroor ki wajah se ghasit-ta hai, Allah Ta'ala Qayamat ke din is ki taraf dekhe ga nahi.“

Hum se Matar bin Fadl ne bayan kiya , kaha hum se Shababa ne bayan kiya , kaha hum se Shubah ne bayan kiya , kaha ke main ne Muharib bin Disar Qazi se mulaqat ki , woh ghore par sawar thay aur makan e adalat mein aa rahe thay jis mein woh faisla kiya karte thay . Main ne in se yahi hadees poochhi to unhon ne mujh se bayan kiya , kaha ke main ne Abdullah bin Umar razi Allahu anhuma se suna , unhon ne bayan kiya ke Rasool Allah salla Allahu alaihi wasallam ne farmaya ”jo apna kapra ghuroor ki wajah se ghasit-ta hua chale ga , Qayamat ke din is ki taraf Allah Ta'ala nazar nahi kare ga .“ (Shubah ne kaha ke) main ne Muharib se poochha kya Ibn Umar razi Allahu anhuma ne tehmat ka zikr kiya tha ? Unhon ne farmaya ke tehmat ya qamees kisi ki unhon ne takhsees nahi ki thi . Muharib ke saath is hadees ko Jabala bin Suhaim aur Zayd bin Aslam aur Zayd bin Abdullah ne bhi Abdullah bin Umar razi Allahu anhuma se riwayat kiya , unhon ne Nabi Karim salla Allahu alaihi wasallam se . Aur Layth ne Nafi se , unhon ne Ibn Umar razi Allahu anhuma se aaisi hi riwayat ki aur Nafi ke saath is ko Musa bin Uqbah aur Umar bin Muhammad aur Qudamah bin Musa ne bhi Salim se , unhon ne Ibn Umar razi Allahu anhuma se , unhon ne Nabi Karim salla Allahu alaihi wasallam se riwayat ki is mein yun hai ke jo shakhs apna kapra (az-rah e takabbur) latkaye .