Hum se Ahmad bin Yunus ne bayan kiya, kaha hum se Zuhayr ne bayan kiya, kaha hum se Musa bin Uqbah ne, in se Salim bin Abdullah ne aur in se in ke walid ne ke Nabi Karim salla Allahu alaihi wasallam ne farmaya ”jo shakhs takabbur ki wajah se tehband ghasit-ta hua chale ga to Allah Paak is ki taraf Qayamat ke din nazar bhi nahi kare ga.“ Abu Bakr razi Allahu anhu ne arz kiya: ya Rasool Allah! Mere tehmat ka ek hissa kabhi latak jata hai magar yeh ke khaas taur se is ka khayal rakkha karoon. Aap salla Allahu alaihi wasallam ne farmaya ”tum in logon mein se nahi ho jo aisa takabbur se karte hain.“

Mujh se Baikandi Muhammad bin Salam ne bayan kiya, kaha hamain ko Abd-ul-A'la ne khabar di, unhein Yunus ne, unhein Imam Hasan Basri ne aur in se Abu Bakrah razi Allahu anhu ne bayan kiya ke sooraj grahan hua to hum Nabi Karim salla Allahu alaihi wasallam ke saath thay. Aap jaldi mein kapra ghasit-te huay masjid mein tashreef laaye log bhi jama ho gaye. Nabi Karim salla Allahu alaihi wasallam ne do rakat namaz parhayi, grahan khatam ho gaya, tab Aap hamari taraf mutawajjo huay aur farmaya ”sooraj aur chaand Allah ki nishaniyon mein se do nishaniyaan hain is liye jab tum in nishaniyon mein se koi nishani dekho to namaz parho aur Allah se dua karo yahan tak ke woh khatam ho jaye.“