Hum se Abdan ne bayan kiya, kaha hum ko Abdullah ne khabar di, unhein Yunus ne, unhein Muhammad bin Abdullah bin Shihab Zuhri ne ke agar koi janwar chooha ya koi aur jame huay ya ghair-jame huay ghee ya tail mein parh jaye to is ke mutalliq kaha ke hamain yeh hadees pahunchi hai ke Rasool Allahsalla Allahu alaihi wasallam ne choohe ke mutalliq jo ghee mein mar gaya thu, hukm diya ke usay aur is ke charon taraf se ghee nikaal kar phenk diya jaye aur phir baqi ghee khaya gaya. Hamain yeh hadees Ubaidullah bin Abdullah ki sanad se pahunchi hai.

Hum se Ismail ne bayan kiya, unhon ne kaha mujh ko Malik ne Ibn-e-Shihaab ke waaste se riwayat ki, woh Ubaidullah bin Abdullah bin ’Utbah bin Mas’ood se, woh Abdullah bin Abbas Radhiallahu Anhuma se woh Umm-ul-Mo’mineen Maimunah Radhiallahu Anha se riwayat karte hain ke Rasoolullah Sallallahu Alaihi Wasallam se chuhe ke baare mein poocha gaya jo ghee mein gir gaya tha. Farmaaya us ko nikaal do aur us ke aas paas (ke ghee) ko nikaal phenko aur apna (baaqi) ghee iste’maal karo.

Hum se ’Ali bin Abdullah ne bayan kiya, kaha hum se Ma’n ne, kaha hum se Malik ne Ibn-e-Shihaab ke waaste se bayan kiya, woh Ubaidullah Ibn-e-Abdullah bin ’Utbah bin Mas’ood se, woh Ibn-e-Abbas Radhiallahu Anhuma se woh Maimunah Radhiallahu Anha se naql karte hain ke Rasoolullah Sallallahu Alaihi Wasallam se chuhe ke baare mein daryaaft kiya gaya jo ghee mein gir gaya tha. Aap Sallallahu Alaihi Wasallam ne farmaaya ke us chuhe ko aur us ke aas paas ke ghee ko nikaal kar phenk do. Ma’n kehte hain ke Malik ne itni baar ke main gin nahi sakta (yeh Hadees) Ibn-e-Abbas se aur unhon ne Maimunah Radhiallahu Anha se riwayat ki hai.

Hum se Humaydi ne bayan kiya, kaha hum se Sufyan ne bayan kiya, in se Zuhri ne bayan kiya, kaha ke mujhe Ubaidullah bin Abdullah bin Utbah ne khabar di, unhon ne Ibn Abbas razi Allahu anhuma se suna, in se Maymoonah razi Allahu anha ne bayan kiya ke ek chooha ghee mein parh kar mar gaya to Nabi kareem salla Allahu alaihi wasallam se is ka hukm poochha gaya. Aap salla Allahu alaihi wasallam ne farmaya ke choohe ko aur is ke charon taraf se ghee ko phenk do aur baqi ghee ko khao. Sufyan se kaha gaya ke Mamar is hadees ko Zuhri se bayan karte hain ke in se Saeed bin al-Musayyab aur in se Abu Hurairah razi Allahu anhu ne bayan kiya, unhon ne kaha ke main ne yeh hadees Zuhri se sirf Ubaidullah se bayan karte suni hai ke in se Ibn Abbas razi Allahu anhuma ne, in se Maymoonah razi Allahu anha ne aur in se Nabi kareem salla Allahu alaihi wasallam ne farmaya aur main ne yeh hadees in se baar-ha suni hai.

Hum se Abdul Aziz bin Abdullah ne bayan kiya, kaha hum se Imam Malik ne bayan kiya, in se Ibn Shihab ne, in se Abdullah bin Abdullah ne, in se Abdullah bin Abbas razi Allahu anhuma ne aur in se Maymoonah razi Allahu anha ne bayan kiya ke Nabi kareem salla Allahu alaihi wasallam se is choohe ka hukm poochha gaya jo ghee mein gir gaya ho. Nabi kareem salla Allahu alaihi wasallam ne farmaya ke choohe ko aur is ke charon taraf se ghee ko phenk do phir baqi ghee kha lo.