Hum se Muhammad bin Alaa ne bayan kiya, kaha hum se Abu Usamah ne bayan kiya, in se Burayd bin Abdullah ne, in se Burdah ne aur in se Abu Musa razi Allahu anhu ne ke Nabi kareem salla Allahu alaihi wasallam ne farmaya ke naik aur bure dost ki misal mushk saath rakhne wale aur bhatti dhaunkne wale ki si hai (jis ke paas mushk hai aur tum is ki mohabbat mein ho) woh is mein se ya tumhein kuch tuhfa ke taur par de ga ya tum is se khareed sako ge ya (kam az kam) tum is ki umdah khushboo se to mahzooz ho hi sako ge aur bhatti dhaunkne wala ya tumhare kapre (bhatti ki aag se) jala de ga ya tumhein is ke paas se ek nagowar bad-boodar dhuwan pahunche ga.

Hum se Musa Bin Ismail ne bayan kiya, unhon ne kaha ke hum se Abdul Wahid ne bayan kiya, unhon ne kaha ke hum se Abu Burda Bin Abdullah ne bayan kiya, unhon ne kaha ke mein ne Abu Burda Bin Abi Musa se suna aur un se un ke walid Musa (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya naik sathi aur bure sathi ki misal kasturi bechne wale attar aur lohar ki si hai. Mushk bechne wale ke paas se tum do achayion mein se ek na ek zaroor pa lo ge. Ya to mushk hi khareed lo ge warna kam az kam is ki khushboo to zaroor hi pa sako ge. Lekin lohar ki bhatti ya tumhare badan aur kapre ko jhulsa de gi warna badbu to is se tum zaroor pa lo ge
.