Hum se Ismail ne bayan kiya, kaha ke mujh se Imam Malik ne bayan kiya, in se Nafi ne, in se qabila Ansar ke ek aadmi ne ke Maaz bin Saad ya Saad bin Maaz ne unhein khabar di ke Kabb bin Malik razi Allahu anhu ki ek laundi Sala pahari par bakriyaan churaya karti ku. Reywarh mein se ek bakri marne lagi to us ne usay marne se pehle patthar se zibah kar diya phir Nabi kareem salla Allahu alaihi wasallam se is ke mutalliq poochha gaya to Nabi kareem salla Allahu alaihi wasallam ne farmaya ke usay khao.

Hum se Ishaq Bin Ibrahim ne bayan kiya, unhon ne Mutamir se suna, unhon ne kaha ke hum ko Ubaidullah ne khabar di, unhein Nafi ne, unhon ne Ibn Kaab Bin Malik (Radi Allahu Anhu) se suna, wo apne walid se bayan karte thay ke un ke paas bakriyon ka ek rewar tha. Jo Silla pahari par charne jata tha (unhon ne bayan kiya ke) humari ek bandi ne humare hi rewar ki ek bakri ko (jab ke wo char rahi thi) dekha ke marne ke qareeb hai. Us ne ek patthar tor kar us se us bakri ko zibah kar diya. Unhon ne apne ghar walon se kaha ke jab tak mein Nabi Kareem (Sallallahu Alaihi Wasallam) se is ke baare mein mein pooch na loon is ka gosht na khana. Ya (yun kaha ke) jab tak mein kisi ko Nabi Kareem (Sallallahu Alaihi Wasallam) ki khidmat mein is ke baare mein poochne ke liye na bhejoon, chunanche unhon ne Nabi Kareem (Sallallahu Alaihi Wasallam) se is ke baare mein poocha, ya kisi ko (poochne ke liye) bheja, aur Nabi Kareem (Sallallahu Alaihi Wasallam) ne is ka gosht khane ke liye hukum farmaya. Ubaidullah ne kaha ke mujhe ye baat ajeeb maloom hui ke bandi (aurat) hone ke bawajood us ne zibah kar diya. Is Riwayat ki mutabiyat Abdah ne Ubaidullah ke wasta se ki hai
.

Hum se Ali Bin Hukam Ansari ne bayan kiya, kaha hum se Abu Awana ne bayan kiya, un se Saeed Bin Masrooq ne, un se Abaya Bin Rifa'a Bin Rafi Bin Khadij (Radi Allahu Anhu) ne aur un se un ke dada (Rafi Bin Khadij Radi Allahu Anhu) ne bayan kiya ke hum Rasul Allah (Sallallahu Alaihi Wasallam) ke sath maqam-e-Zulhulaifa mein thehre hue thay. Logon ko bhook lagi. Idhar (ghanimat mein) ont aur bakriyan mili theen. Unhon ne bayan kiya ke Nabi Kareem (Sallallahu Alaihi Wasallam) lashkar ke peeche ke logon mein thay. Logon ne jaldi ki aur (taqseem se pehle hi) zibah kar ke handiyan charha dein. Lekin baad mein Nabi Kareem (Sallallahu Alaihi Wasallam) ne hukm diya aur wo handiyan oundha di gayein. Phir Aap (Sallallahu Alaihi Wasallam) ne un ko taqseem kiya aur das bakriyon ko ek ont ke barabar rakha. Ek ont is mein se bhag gaya to log ise pakarne ki koshish karne lage. Lekin us ne sab ko thaka diya. Qoum ke paas ghore kam thay. Ek Sahabi teer le kar ont ki taraf jhapte. Allah ne is ko thehra diya. Phir Aap (Sallallahu Alaihi Wasallam) ne farmaya ke in janwaron mein bhi jangli janwaron ki tarah sarkashi hoti hai. Is liye in janwaron mein se bhi agar koi tumhein aajiz kar de to is ke sath tum aisa hi mamla kiya karo. Phir mere dada ne arz kiya ke kal dushman ke hamla ka khauf hai, hamare paas churiyan nahi hain (talwaron se zibah karein to un ke kharab hone ka darr hai jab ke jang samne hai) kya hum bans ke khapchi se zibah kar sakte hain? Aap (Sallallahu Alaihi Wasallam) ne farmaya, jo cheez bhi khoon baha de aur zabiha par Allah Ta'ala ka naam liya gaya ho, to is ke khane mein koi haraj nahi. Siwaye dant aur nakhun ke. Is ki wajah mein tumhein batata hoon. Dant to haddi hai aur nakhun Habshiyon ki churi hai
.

Hum se Muhammad bin Abi Bakr ne bayan kiya, kaha hum se Mutamir ne, in se Ubaidullah ne, in se Nafi ne, unhon ne Ibn Kabb bin Malik se suna, unhon ne Ibn Umar razi Allahu anhuma se suna ke unhein un ke walid ne khabar di ke in ke ghar ek laundi Sala pahari par bakriyaan churaya karti ku (churrate waqt ek martaba) us ne dekha ke ek bakri marne wali hai. Chunanche us ne ek patthar torr kar is se bakri zibah kar di to Kabb bin Malik razi Allahu anhu ne apne ghar walon se kaha ke usay is waqt tak na khana jab tak main Rasool Allahsalla Allahu alaihi wasallam se is ka hukm na pooch aaoon ya (unhon ne yeh kaha ke) main kisi ko bheijoon jo Nabi kareem salla Allahu alaihi wasallam se masla pooch aaye phir woh Nabi kareem salla Allahu alaihi wasallam ki khidmat mein hazir huay ya kisi ko bheja aur Nabi kareem salla Allahu alaihi wasallam ne is ke khane ki ijazat bakhshi.

Hum se Musa ne bayan kiya, kaha hum se Juwayriyah ne bayan kiya, in se Nafi ne, in se Bani Salma ke ek sahab (Ibn Kabb bin Malik) ne ke unhon ne Ibn Umar razi Allahu anhuma ko yeh khabar di ke Kabb bin Malik razi Allahu anhu ki ek laundi is pahari par jo ”Souq e Madni“ mein hai aur jis ka naam Sala hai, bakriyaan churaya karti ku. Ek bakri marne ke qareeb ho gayi to us ne ek patthar torr kar is se bakri ko zibah kar liya, phir logon ne Rasool Allahsalla Allahu alaihi wasallam se is ka zikr kiya to Nabi kareem salla Allahu alaihi wasallam ne usay khane ki ijazat ata farmayi.

Hum se Sadaqah ne bayan kiya, kaha hum ko Abdah ne khabar di, unhein Ubaidullah ne, unhein Nafi ne, unhein Kabb bin Malik ke ek bete ne aur unhein in ke baap Kabb bin Malik razi Allahu anhu ne ke ek aurat ne bakri patthar se zibah kar li thi to Nabi kareem salla Allahu alaihi wasallam se is ke baare mein poochha gaya to Aap salla Allahu alaihi wasallam ne is ke khane ka hukm farmaya. Aur Layth ne bayan kiya, in se Nafi ne bayan kiya, unhon ne qabila Ansar ke ek shakhs ko suna ke unhon ne Abdullah bin Umar razi Allahu anhuma ko khabar di Nabi kareem salla Allahu alaihi wasallam se ke Kabb razi Allahu anhu ki ek laundi thi phir isi hadees ki tarah bayan kiya.