Mujh se Abdul Aziz bin Abdullah Owaysi ne bayan kiya , unhon ne kaha ke mujh se Muhammad bin Jafar ne bayan kiya , in se Muhammad bin Amr bin Halhala Dayli ne bayan kiya , in se Wahb bin Kaysan Abu Nuaym ne bayan kiya , in se Umar bin Abi Salamah razi Allahu anhu ne , woh Nabi Karim salla Allahu alaihi wasallam ki zauja mutahhara Umm Salamah razi Allahu anha ke (Abu Salamah se) bete hain . Bayan kiya ke ek din main ne Rasool Allah salla Allahu alaihi wasallam ke saath khana khaya aur bartan ke charon taraf se khane laga to Nabi Karim salla Allahu alaihi wasallam ne mujh se farmaya ke apne nazdeek se kha .

Hum se Ali bin Abdullah Madini ne bayan kiya , kaha hum ko Sufyan Sawri ne khabar di , kaha ke mujhe Waleed bin Kaseer ne khabar di , unhon ne Wahb bin Kaysan se suna , unhon ne Umar bin Abi Salamah razi Allahu anhu se suna , unhon ne bayan kiya ke main bacha tha aur Rasool Allah salla Allahu alaihi wasallam ki parwarish mein tha aur (khate waqt) mera hath bartan mein charon taraf ghooma karta . Is liye Aap salla Allahu alaihi wasallam ne mujh se farmaya ke bete! Bismillah parh liya karo , dahne hath se khaya karo aur bartan mein wahan se khaya karo jo jagah tujh se nazdeek ho . Chunanche is ke baad main hamesha isi hidayat ke mutabiq khata raha .

Hum se Abdullah bin Yusuf Taneesi ne bayan kiya , kaha hum ko Imam Malik ne khabar di , in se Abu Nuaym Wahb bin Kaysan ne bayan kiya ke Nabi Karim salla Allahu alaihi wasallam ki khidmat mein khana laya gaya , Aap ke saath Aap ke rabeeb Umar bin Abi Salamah razi Allahu anhu bhi thay . Nabi Karim salla Allahu alaihi wasallam ne farmaya ke Bismillah parh aur apne samne se kha .