Hum se Yahya bin Qazah ne byaan kiya , kaha hum se Imam Malik ne byaan kiya , in se Sawr bin Zayd ne , in se Abu al-Ghais (Salim) ne aur in se Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya ke bewaon aur miskeenon ke kaam aane wala Allah ke raste mein jihad karne wale ke barabar hai , ya raat bhar ibadat aur din ko roze rakhne wale ke barabar hai .

Hum se Ismail bin Abdullah ne bayan kiya, kaha ke mujh se Imam Malik ne bayan kiya, in se Safwan bin Sulaym tabi is hadees ko mursalan riwayat karte thay ke Nabi Karim salla Allahu alaihi wasallam ne farmaya ke bewaon aur miskeenon ke liye koshish karne wala Allah ke rasta mein jihad karne wale ki tarah hai ya is shakhs ki tarah hai jo din mein roze rakhta hai aur raat ko ibadat karta hai.

Hum se Abdullah bin Maslamah ne bayan kiya, kaha hum se Imam Malik ne bayan kiya, in se Sawr bin Zayd ne, in se Abu al-Ghais ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ke bewaon aur miskeenon ke liye koshish karne wala Allah ke raste mein jihad karne wale ki tarah hai. Abdullah Qanabi ko is mein shak hai. Imam Malik ne is hadees mein yeh bhi kaha tha is shakhs ke barabar sawab milta hai jo namaz mein khara rehta hai thakta hi nahi aur is shakhs ke barabar jo roze barabar rakkhe chala jata hai iftaar hi nahi karta hai.