`Hum se Fazl bin Dukain ne bayan kiya, kaha hum se Abdus Salam bin Harb ne bayan kiya, un se Hisham bin Hassan ne, un se Hafsa bint Sireen ne aur un se Umm-e-Atiyya Radi Allahu Anha ne ke Nabi Kareem صلی اللہ علیہ وسلم ne farmaya ke jo aurat Allah aur Aakhirat ke din par iman rakhti ho is ke liye jaiz nahi ke teen din se zyada kisi ka sog manaye siwa shohar ke wo is ke sog mein na surma lagaye na ranga hua kapra pehne magar Yaman ka dhari dar kapra (jo bunne se pehle hi ranga gaya ho).

Hum se Abdullah bin Abdul Wahhab ne bayan kiya, unhon ne kaha hum se Hammad bin Zaid ne Ayyub Sikhtiyaani se, unhon ne Hafsa se, woh Umm-e-Atiyyah se, aap ne farmaaya ke hamein kisi mayyat par teen din se ziyada sog karne se mana kiya jaata tha. Lekin shauhar ki maut par chaar mahine das din ke sog ka hukm tha. Un dinon mein hum na surmah lagatein na khusbhoo aur Asb (Yemen ki bani hue ek chaadar jo rangeen bhi hoti thi) ke alawah koi rangeen kapda hum iste’maal nahi karti thien aur hamein (iddat ke dinon mein) haiz ke ghusl ke baad kust-e-azfaar iste’maal karne ki ijazat thi aur hamein janaaze ke peeche chalne se mana kiya jaata tha. Is Hadees ko Hishaam bin Hassan ne Hafsa se, unhon ne Umm-e-Atiyyah se, unhon ne Nabi-e-Kareem Sallallahu Alaihi Wasallam se riwayat kiya hai.