Mujh se Muhammad bin Musanna ne byaan kiya , kaha hum se Abd-ul-A'la ne byaan kiya , kaha hum se Saeed bin Abi Aroobah ne , in se Qatadah ne , kaha hum se Imam Hasan Basri ne byaan kiya ke Maqal bin Yasar razi Allahu anhu ki behen ek aadmi ke nikah mein thien , phir unhon ne unhein talaq de di , is ke baad unhon ne tanhayi mein iddat guzari . Iddat ke din jab khatam ho gaye to in ke pehle shohar ne hi phir Maqal razi Allahu anhu ke paas in ke liye nikah ka paigham bheja . Maqal ko is par bari ghairat aayi . Unhon ne kaha jab woh iddat guzar rahi thi to usay is par quwwat thi (ke dauran e iddat mein ruju kar lein lekin aisa nahi kiya) aur ab meere paas nikah ka paigham bhejta hai . Chunanche woh in ke aur apni behen ke darmiyan mein haail ho gaye . Is par yeh aayat nazil hui «wa izha tallaqtum-un-nisa'a fabalaghna ajala-hunna fala tazuloohunna» ”aur jab tum apni auraton ko talaq de chuko aur woh apni muddat ko pahunch chukein to tum unhein mat roko .“ Aakhir aayat tak phir Rasool Allah salla Allahu alaihi wasallam ne unhein bula kar yeh aayat sunayi to unhon ne zidd chhor di aur Allah ke hukm ke samne jhuk gaye .

Hum se Ubaydullah bin Saeed ne byaan kiya , kaha hum se Abu Aamir Aqadi ne byaan kiya , kaha hum se Abbad bin Rashid ne byaan kiya , kaha hum se Hasan ne byaan kiya , kaha ke mujh se Maqal bin Yasar razi Allahu anhu ne byaan kiya , unhon ne byaan kiya ke meri ek behen thien . Un ko un ke agle khawand ne nikah ka paigham diya . (doosri sanad) aur Ibrahim bin Tahman ne byaan kiya , un se Yunus ne , un se Imam Hasan Basri ne aur un se Maqal bin Yasar razi Allahu anhu ne byaan kiya . (teesri sanad) aur Imam Bukhari rahmahullah ne kaha ke hum se Abu Mamar ne byaan kiya , kaha hum se Abdul Waris ne byaan kiya , kaha hum se Yunus ne byaan kiya aur un se Imam Hasan Basri ne ke Maqal bin Yasar razi Allahu anhu ki behen ko un ke shohar ne talaq de di thi lekin jab iddat guzar gayi aur talaq e bain ho gayi to unhon ne phir un ke liye paigham e nikah bheja . Maqal razi Allahu anhu ne is par inkar kiya , magar aurat chahti thi to yeh aayat nazil hui «fala tazuloohunna an yankihna azwaajahunna» ke ”tum unhein is se mat roko ke woh apne pehle shohar se dobara nikah karein .“