Hum se Yahya bin Saeed ne byaan kiya , kaha hum se Waki ne byaan kiya , in se Hisham bin Urwah ne byaan kiya , un se un ke walid ne aur un se Aisha razi Allahu anha ne byaan kiya ke aayat «wa ma yutla alaykum fil kitaabi fee yataama-n-nisa'illati la tu'toonahunna ma kutiba lahunna wa targhaboona an tankihoohunna» yani ”woh (aayatein bhi) jo tumhein kitab ke andar in yateem larkon ke baare mein parh kar sunayi jati hain jinhein tum woh nahi dete ho jo in ke liye muqarrar ho chuka hai aur is se bezar ho ke in ka kisi se nikah karo .“ Aaisi yateem larki ke baare mein nazil hui thi jo kisi shakhs ki parwarish mein ho . Mumkin hai ke is ke maal o jaidad mein bhi shareek ho , wahi larki ka zyada haq-dar hai lekin woh is se nikah nahi karna chahta albatta is ke maal ki wajah se usay roke rakhta hai aur kisi doosre mard se is ki shadi nahi hone deta kyunke woh nahi chahta ke koi doosra is ke maal mein hissa-dar bane .

Hum se Abdul Aziz Bin Abdullah Aamiri Owaisi ne bayan kiya, unhon ne kaha hum se Ibrahim Bin Saad ne bayan kiya, unhon ne kaha hum se Salih ne, un se Ibn Shihab ne bayan kiya, ke mujhe Urwah Bin Zubair ne khabar di aur unhon ne Sayyida Aisha (Radi Allahu Anha) se poocha tha (doosri sanad) aur Lais ne bayan kiya ke mujh se Yunus ne bayan kiya, un se Ibn Shihab ne, unhein Urwah Bin Zubair ne khabar di ke unhon ne Aisha (Radi Allahu Anha) se (Surah Nisa mein) is ayat ke bare mein poocha "Wa in khiftum" se "wa rubaa" "agar tum ko yatimon mein insaf na karne ka darr ho to jo auratein pasand aayein do do teen teen char char nikah mein lao" unhon ne kaha mere bhanje ye ayat is yatim larki ke bare mein hai jo apne wali (muhafiz rishtedar jaise chachera bhai, phuphi zad ya mamoon zad bhai) ki parwarish mein ho aur tarke ke mal mein is ki sajhi ho aur wo is ki maldari aur khubsoorti par farefta ho kar is se nikah kar lena chahe lekin poora mehar insaf se jitna is ko aur jagah milta wo na de, to ise is se mana kar diya gaya ke aisi yatim larkiyon se nikah kare. Albatta agar un ke sath un ke wali insaf kar sakein aur un ki hasb-e-haisiyat behtar se behtar tarz-e-amal mehar ke bare mein ikhtiyar karein (to is soorat mein nikah karne ki ijazat hai) aur un se ye bhi keh diya gaya ke un ke siwa jo bhi aurat unhein pasand ho un se wo nikah kar sakte hain. Urwah Bin Zubair ne kaha ke Aisha (Radi Allahu Anha) ne batlaya, phir logon ne is ayat ke nazil hone ke baad (aisi larkiyon se nikah ki ijazat ke bare mein) masla poocha to Allah Ta'ala ne ye ayat nazil ki "Wa yastaftunaka fin-nisa" "Aur aap se auraton ke bare mein ye log sawal karte hain". Aage farmaya aur tum un se nikah karna chahte ho. Ye jo is ayat mein hai aur jo Quran mein tum par parha jata hai is se murad pehli ayat hai yani "agar tum ko yatimon mein insaf na ho sakne ka darr ho to doosri auratein jo bhali lagein un se nikah kar lo". Sayyida Aisha (Radi Allahu Anha) ne kaha ye jo Allah ne doosri ayat mein farmaya aur tum un se nikah karna chahte ho is se ye gharaz hai ke jo yatim larki tumhari parwarish mein ho aur mal aur jamal kam rakhti ho is se to tum nafrat karte ho, is liye jis yatim larki ke mal aur jamal mein tum ko raghbat ho is se bhi nikah na karo magar is soorat mein jab insaf ke sath un ka poora mehar ada karo
.