Hum se Abdullah bin Yusuf Taneesi ne byaan kiya, kaha hum ko Imam Malik ne khabar di, unhein Ibn Shihab ne, unhein Urwah bin Zubayr ne aur unhein Aisha razi Allahu anha ne ke Rasool Allah salla Allahu alaihi wasallam jab beemar parte to Muawwizhat ki surtein parh kar usay apne oopar dam karte (is tarah ke hawa ke saath kuch thook bhi nikalta) phir jab (Marz-ul-Maut mein) Aap ki takleef barh gayi to main in suraton ko parh kar Nabi Karim salla Allahu alaihi wasallam ke hathon se barkat ki umeed mein Aap ke jasad e mubarak par pherti thi.

Mujh se Habban bin Musa Marwazi ne byaan kiya , kaha hum ko Abdullah bin Mubarak ne khabar di , unhein Yunus ne khabar di , unhein Ibn Shihab ne kaha ke mujhe Urwah bin Zubayr ne khabar di aur unhein Aisha razi Allahu anha ne khabar di ke Rasool Allah salla Allahu alaihi wasallam jab beemar parte to apne oopar Muawwizhatayn (Surah al-Falaq aur Surah an-Naas) parh kar dam kar liya karte thay aur apne jism par apne hath pher liya karte thay , phir jab woh marz Aap ko lahaq hua jis mein Aap ki wafat hui to main Muawwizhatayn parh kar Aap par dam kiya karti thi aur hath par dam kar ke Nabi Karim salla Allahu alaihi wasallam ke jism par phera karti thi .

Mujh se Ibrahim bin Musa ne bayan kiya, kaha hum ko Hisham ne khabar di, unhein Mamar ne, unhein Zuhri ne, unhein Urwah ne aur in se Aisha razi Allahu anha ne ke Nabi Karim salla Allahu alaihi wasallam apne marz-ul-wafat mein apne oopar mo'azzat (Surah al-Ikhlas, Surah al-Falaq aur Surah al-Naas) ka dum kiya karte thay. Phir jab Aap ke liye dushwar ho gaya to main in ka dum Aap par kiya karti thi aur barkat ke liye Nabi Karim salla Allahu alaihi wasallam ka hath Aap ke jism e mubarak par bhi pher leti thi. Phir main ne is ke mutalliq poochha ke Nabi Karim salla Allahu alaihi wasallam kis tarah dum karte thay, unhon ne bataya ke apne hath par dum kar ke hath ko chehre par phera karte thay.

Hum se Abdullah bin Muhammad Jafi ne bayan kiya, kaha hum se Hisham bin Yusuf San-aani ne bayan kiya, kaha hum ko Mamar ne khabar di, unhein Zuhri ne, unhein Urwah ne aur unhein Aisha razi Allahu anha ne ke Nabi Karim salla Allahu alaihi wasallam apne marz e wafat mein mo'azzat parh kar phoonkte thay phir jab Aap ke liye yeh dushwar ho gaya to main Aap par dum kiya karti thi aur barkat ke liye Nabi Karim salla Allahu alaihi wasallam ka hath Aap ke jism par pheerti thi. (Mamar ne bayan kiya ke) phir main ne Ibn Shihab se sawal kiya ke Nabi Karim salla Allahu alaihi wasallam kis tarah dum kiya karte thay? Unhon ne bayan kiya ke Nabi Karim salla Allahu alaihi wasallam pehle apne donon hathon par phoonk maarte phir un ko chehre par pher lete. 11103