Hum se Umar bin Hafs bin Ghiyas ne byaan kiya, kaha mujh se mere walid ne byaan kiya, kaha hum se Aamash ne byaan kiya, kaha hum se Ibrahim Nakhai aur Dahhak Mashriqi ne byaan kiya aur un se Abu Saeed Khudri razi Allahu anhu ne ke Nabi Karim salla Allahu alaihi wasallam ne apne sahabah se farmaya ke kya tum mein se kisi ke liye yeh mumkin nahi ke Quran ka ek tihayi hissa ek raat mein parha kare? Sahabah ko yeh amal bara mushkil maloom hua aur unhon ne arz kiya: ya Rasool Allah! Hum mein se kaun is ki taqat rakhta hai. Nabi Karim salla Allahu alaihi wasallam ne is par farmaya ke «al-waahid-us-samadu» (yani «qul huwallahu ahadun») Quran Majeed ka ek tihayi hissa hai. Muhammad bin Yusuf Farabri ne byaan kiya ke main ne Abu Abdullah Imam Bukhari rahmahullah ke katib Abu Jafar Muhammad bin Abi Hatim se suna, woh kehte thay ke Imam Bukhari rahmahullah ne kaha Ibrahim Nakhai ki riwayat Abu Saeed Khudri razi Allahu anhu se munqata hai (Ibrahim ne Abu Saeed se nahi suna) lekin Dahhak Mashriqi ki riwayat Abu Saeed se muttasil hai.

Aur Abu Mamar (Abdullah bin Amr Manqari) ne itna zyada kiya ke hum se Ismail bin Jafar ne byaan kiya, un se Imam Malik bin Anas ne, un se Abdur Rahman bin Abdullah bin Abdur Rahman bin Abi Sasah ne, un se un ke walid ne aur un se Abu Saeed Khudri razi Allahu anhu ne ke mujhe mere bhai Qatadah bin Numan razi Allahu anhu ne khabar di ke ek sahabi Nabi Karim salla Allahu alaihi wasallam ke zamane mein sehri ke waqt se kharay «qul huwallahu ahadun» parhte rahe. In ke siwa aur kuch nahi parhte thay. Phir jab subah hui to doosre sahabi Nabi Karim salla Allahu alaihi wasallam ki khidmat mein hazir huay (baqi hissa) pichhli hadees ki tarah byaan kiya.

Hum se Abdullah bin Maslamah ne bayan kiya, in se Imam Malik ne bayan kiya, in se Abd-ul-Rahman bin Abdullah bin Abd-ul-Rahman ne bayan kiya, in se un ke walid ne bayan kiya aur in se Abu Saeed Khudri razi Allahu anhu ne bayan kiya ke ek sahabi ne suna ke ek doosre sahabi Surah Qul huwallah baar baar parhte hain jab subah hui to woh Rasool Allah salla Allahu alaihi wasallam ke paas aaye aur Nabi Karim salla Allahu alaihi wasallam se is ka zikr kiya, woh sahabi is surat ko kam samajhte thay lekin Nabi Karim salla Allahu alaihi wasallam ne farmaya ke is zaat ki qasam jis ke hath mein meri jaan hai yeh Quran Majeed ke ek tihayi hissa ke barabar hai.

Hum se Ismail bin Abi Oways ne bayan kiya, unhon ne kaha mujh se Imam Malik ne bayan kiya, in se Abd-ul-Rahman bin Abdullah bin Abd-ul-Rahman bin Abi Sas-ah ne bayan kiya, in se in ke walid ne aur in se Abu Saeed Khudri razi Allahu anhune bayan kiya ke ek shakhs ne ek doosre shakhs Qatada bin Nu-man ko baar baar Qul huwal-laahu ahad parhte suna. Subah hui to Nabi Karim salla Allahu alaihi wasallam ki khidmat mein hazir ho kar is tarah waqia bayan kiya jaise woh usay kam samajhte hon. Nabi Karim salla Allahu alaihi wasallam ne farmaya is zaat ki qasam jis ke hath mein meri jaan hai! yeh surat tihayi Quran ke barabar hai. Ismail bin Jafar ne Imam Malik se yeh barhaya ke in se Abd-ul-Rahman ne, in se in ke walid ne aur in se Abu Saeed Khudri razi Allahu anhune kaha ke mujhe meere bhai Qatada bin Nu-man ne khabar di Nabi kareem salla Allahu alaihi wasallam se.