Mujh se Muhammad bin Musanna ne byaan kiya, kaha hum se Wahb bin Jareer ne byaan kiya, kaha hum se Hisham bin Hassan ne byaan kiya, un se Muhammad bin Sireen ne, un se Mabad bin Sireen ne aur un se Abu Saeed Khudri razi Allahu anhu ne byaan kiya ke hum ek fauji safar mein thay (raat mein) hum ne ek qabila ke nazdeek parao kiya. Phir ek laundi aayi aur kaha ke qabila ke sardar ko bichhoo ne kaat liya hai aur hamare qabile ke mard maujood nahi hain, kya tum mein koi bichhoo ka jhaar phoonk karne wala hai? Ek sahabi (khud Abu Saeed) is ke saath kharay ho gaye, hamain ko maloom tha ke woh jhaar phoonk nahi jaante lekin unhon ne qabila ke sardar ko jhara to usay sehat ho gayi. Us ne is ke shukrane mein tees bakriyaan dene ka hukm diya aur hamain doodh pilaya. Jab woh jhaar phoonk kar ke wapas aaye to hum ne in se poocha kya tum waqayi koi mantar jaante ho? Unhon ne kaha ke nahi main ne to sirf Surah Fatiha parh kar is par dam kar diya tha. Hum ne kaha ke achha jab tak hum Rasool Allah salla Allahu alaihi wasallam se is ke mutalliq na pooch lein in bakriyon ke baare mein apni taraf se kuch na kaho. Chunanche hum ne Madinah pahunch kar Nabi Karim salla Allahu alaihi wasallam se zikr kiya to Aap salla Allahu alaihi wasallam ne farmaya ke unhon ne kaise jaana ke Surah Fatiha mantar bhi hai. (jao yeh maal halal hai) usay taqseem kar lo aur is mein mera bhi hissa lagana. Aur Mamar ne byaan kiya hum se Abdul Waris bin Saeed ne byaan kiya, kaha hum se Hisham bin Hassan ne byaan kiya, kaha hum se Muhammad bin Sireen ne byaan kiya, kaha hum se Mabad bin Sireen ne byaan kiya aur un se Abu Saeed Khudri razi Allahu anhu ne yahi waqia byaan kiya.

Hum se Abul Numan ne bayan kiya, unhon ne kaha hum se Abu Awanah ne bayan kiya, un se Abu Bishr ne bayan kiya, un se Abul Mutawakkil ne bayan kiya, aur un se Abu Saeed Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ke kuch Sahaba (Radi Allahu Anhum) safar mein thay. Duran-e-safar mein wo Arab ke ek qabeela par utre. Sahaba ne chaha ke qabeela wale unhein apna mehman bana lein, lekin unhon ne mehmani nahi ki, balkay saaf inkar kar diya. Ittifaq se isi qabeela ke sardar ko saanp ne das liya, qabeela walon ne har tarah ki koshish kar dali, lekin un ka sardar accha na hua. Un ke kisi aadmi ne kaha ke chalo in logon se bhi poochein jo yahan aa kar utre hain. Mumkin hai koi dam jhaarne ki cheez un ke paas ho. Chunanche qabeela wale un ke paas aaye aur kaha ke bhaiyo! humare sardar ko saanp ne das liya hai. Is ke liye hum ne har qism ki koshish kar dali lekin kuch faida na hua. Kya tumhare paas koi cheez dam karne ki hai ? Ek Sahabi ne kaha ke qasam Allah ki mein ise jhaar donga lekin hum ne tum se mezbani ke liye kaha tha aur tum ne is se inkar kar diya. Is liye ab mein bhi ujrat ke baghair nahi jhaar sakta, aakhir bakriyon ke ek galle par un ka muamla taye hua. Wo Sahabi wahan gaye aur «الحمد لله رب العالمين» parh parh kar dam kiya. Aisa maloom hua jaise kisi ki rassi khol di gayi ho. Wo sardar uth kar chalne laga, takleef-o-dard ka naam-o-nishan bhi baqi nahi tha. Bayan kiya ke phir unhon ne taye-shuda ujrat Sahaba ko ada kar di. Kisi ne kaha ke ise taqseem kar lo, lekin jinhon ne jhaara tha, wo bole ke Nabi Kareem (Sallallahu Alaihi Wasallam) ki khidmat mein hazir ho kar pehle hum Aap (Sallallahu Alaihi Wasallam) se is ka zikar kar lein. Is ke baad dekhenge ke Aap (Sallallahu Alaihi Wasallam) kya hukum dete hain. Chunanche sab hazrat Rasul Allah (Sallallahu Alaihi Wasallam) khidmat mein hazir hue aur Aap (Sallallahu Alaihi Wasallam) se is ka zikar kiya. Aap (Sallallahu Alaihi Wasallam) ne farmaya ye tum ko kaise maloom hua ke Surah Fatihah bhi ek ruqyah hai ? Is ke baad Aap (Sallallahu Alaihi Wasallam) ne farmaya ke tum ne theek kiya. Ise taqseem kar lo aur ek mera hissa bhi lagao. Ye farma kar Rasul Allah (Sallallahu Alaihi Wasallam) hans pare. Shuba ne kaha ke Abul Bishr ne hum se bayan kiya, unhon ne Abul Mutawakkil se aisa hi suna
.