Hum se Musa bin Ismail ne byaan kiya, kaha ke hum se Abu Awanah ne byaan kiya, un se Abu Bishr ne, un se Saeed bin Jubayr ne aur un se Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ne apne sahabah ke saath sooq Ukaz (Makkah aur Taif ke darmiyan ek maidan jahan Arabon ka mashhoor mela lagta tha) ka qasd kiya is zamana mein shayateen tak aasman ki khabron ke chura lene mein rukawat paida kar di gayi thi aur un par aasman se aag ke angare chhore jate thay jab woh jinn apni qaum ke paas laut kar aaye to un ki qaum ne un se poocha ke kya baat hui. Unhon ne bataya ke aasman ki khabron mein aur hamare darmiyan rukawat kar di gayi hai aur hamain par aasman se aag ke angare barsaye gaye hain, unhon ne kaha ke aasman ki khabron aur tumhare darmiyan rukawat hone ki wajah yeh hai ke koi khaas baat pesh aayi hai. Is liye saari zameen par mashriq o maghrib mein phail jao aur talash karo ke kaun si baat pesh aa gayi hai. Chunanche shayateen mashriq o maghrib mein phail gaye taake is baat ka pata lagayein ke aasman ki khabron ki un tak pahunchne mein rukawat paida ki gayi hai woh kis bare waqia ki wajah se hai. Byaan kiya ke jo shayateen is khoj mein niklay thay un ka ek giroh Wadi e Tihama ki taraf bhi aa nikla (yeh jagah Makkah Moazzama se ek din ke safar ki raah par hai) jahan Rasool Allah salla Allahu alaihi wasallam mandi Ukaz ki taraf jate huay khajoor ke ek bagh ke paas thehre huay thay. Nabi Karim salla Allahu alaihi wasallam is waqt sahabah ke saath Fajr ki namaz parh rahe thay. Jab shayateen ne Quran Majeed suna to yeh is ko sunne lage phir unhon ne kaha ke yahi cheez hai woh jis ki wajah se tumhare aur aasman ki khabron ke darmiyan rukawat paida hui hai. Is ke baad woh apni qaum ki taraf laut aaye aur un se kaha ke «inna samia-na qur-aanan ajaban» al-aayat hum ne ek ajeeb Quran suna hai jo naiki ki raah dikhlata hai so hum to is par iman le aaye aur hum ab apne Parvardigar ko kisi ka saajhi na banayein ge Allah Ta'ala ne apne Nabi salla Allahu alaihi wasallam par yeh aayat nazil ki «qul oohiya ilayya annahu-stama'a nafarum minal jinni» al-aayat. Aap kahiye ke mere paas wahi aayi hai is baat ki ke jinon ki ek jama'at ne Quran Majeed suna yahi jinon ka qaul Nabi Karim salla Allahu alaihi wasallam par nazil hua.

Aur surat ke aakhri hisson ka parhna aur tarteeb ke khilaaf surtain parhna ya kisi surat ko (jaisa ke Quran Shareef ki tarteeb hai) us se pehle ki surat se pehle parhna aur kisi surat ke awal hissa ka parhna yeh sab durust hai . Aur Abdullah bin Saeb se riwayat hai ke Nabi Karim salla Allahu alaihi wasallam ne subah ki namaaz mein Surah Mominoon tilawat farmayi , jab Aap Musa alayhis salam aur Haroon alayhis salam ke zikr par pohanche ya Isa alayhis salam ke zikr par to Aap ko khansi aane lagi , is liye ruku farma diya aur Umar razi Allahu anhu ne pehli rakat mein Surah Baqarah ki ek sau bees aayatein parheen aur doosri rakat mein mathani (jis mein taqreeban sau aayatein hoti hain) mein se koi surat tilawat ki aur Ahnaf razi Allahu anhu ne pehli rakat mein Surah Kahf aur doosri mein Surah Yusuf ya Surah Yunus parhi aur kaha ke Umar razi Allahu anhu ne subah ki namaaz mein yeh donon surtain parhi thi . Ibn Masood razi Allahu anhu ne Surah Anfal ki chalis aayatein (pehli rakat mein) parheen aur doosri rakat mein mufassal ki koi surat parhi aur Qatadah razi Allahu anhu ne ek shakhs ke mutalliq jo ek surat do rakaton mein taqseem kar ke parhe ya ek surat do rakaton mein baar baar parhe farmaya ke saari hi Kitaab Allah mein se hain . (lehaza koi haraj nahi .