Aur Sulayman bin Harb aur al-Nu'man ne byaan kiya, ke hum se Hammad bin Zayd ne byaan kiya, un se Ayub ne aur un se Muhammad bin Sireen ne byaan kiya ke main ek majlis mein jis mein Abdur Rahman bin Abi Layla bhi thay maujood tha. Un ke shagird un ki bahut izzat kiya karte thay. Main ne wahan Subay'ah bint al-Harith ka Abdullah bin Utbah bin Masood se byaan kiya ke is par un ke shagird ne zaban aur aankhon ke ishare se hont kaat kar mujhe tanbeeh ki. Muhammad bin Sireen ne byaan kiya ke main samajh gaya aur kaha ke Abdullah bin Utbah Kufa mein abhi zinda maujood hain. Agar main un ki taraf bhi jhoot nisbat karta hoon to bari jurat ki baat ho gi mujhe tanbeeh karne wale sahab is par sharminda ho gaye aur Abdur Rahman bin Abi Layla ne kaha lekin un ke chacha to yeh baat nahi karte thay. (Ibn Sireen ne byaan kiya ke) phir main Abu Atiyyah Malik bin Aamir se mila aur in se yeh masla poocha woh bhi Subay'ah wali hadees byaan karne lage lekin main ne un se kaha Aap ne Abdullah bin Masood razi Allahu anhu se bhi is silsile mein kuch suna hai? Unhon ne byaan kiya ke hum Abdullah bin Masood razi Allahu anhu ki khidmat mein hazir thay to unhon ne kaha kya tum is par (jis ke shohar ka intiqal ho gaya aur woh hamila ho. Iddat ki muddat ko ttool de kar) sakhti karna chahte ho aur rukhsat o sahoolat dene ke liye tayyar nahi, baat yeh hai ke chhoti Surah Nisa yani (Surah at-Talaq) bari Surah an-Nisa ke baad nazil hui hai aur kaha «wa ulaatul ahmaali ajalu-hunna an yada'na hamla-hunna» al-aayat aur hamal waliyon ki iddat un ke hamal ka paida ho jaana hai.

Hum se Habban bin Musa Marwazi ne byaan kiya , kaha hum se Abdullah bin Mubarak ne , kaha hum ko Abdullah bin Aun ne khabar di , un se Muhammad bin Sireen ne byaan kiya ke main Ansar ki ek majlis mein hazir hua . Bare bare Ansari wahan maujood thay aur Abdur Rahman bin Abi Layla bhi maujood thay . Main ne wahan Subay'ah bint Harith ke baab se mutalliq Abdullah bin Utbah ki hadees ka zikr kiya . Abdur Rahman ne kaha lekin Abdullah bin Utbah ke chacha (Abdullah bin Masood razi Allahu anhu) aisa nahi kehte thay . (Muhammad bin Sireen ne kaha) ke main ne kaha ke phir to main ne ek aise buzurg Abdullah bin Utbah ke mutalliq jhoot bolne mein daleri ki hai ke jo Kufa mein abhi zinda maujood hain . Meri aawaz buland ho gayi thi . Ibn Sireen ne kaha ke phir jab main bahar nikla to raste mein Malik bin Aamir ya Malik bin Auf se mulaqat ho gayi . (rawi ko shak hai ke yeh Ibn Masood razi Allahu anhu ke rafeeqon mein se thay) Main ne un se poocha ke jis aurat ke shohar ka intiqal ho jaye aur woh hamal se ho to Ibn Masood razi Allahu anhu is ki iddat ke mutalliq kya fatwa dete thay ? Unhon ne kaha ke Ibn Masood razi Allahu anhu kehte thay ke tum log is hamila par sakhti ke mutalliq kyun sochte ho is par aasani nahi karte (is ko lambi) iddat ka hukm dete ho . Surah Nisa chhoti (Surah at-Talaq) lambi Surah Nisa ke baad nazil hui hai aur Ayub Sakhtiyani ne byaan kiya , un se Muhammad bin Sireen ne ke main Abu Atiyyah Malik bin Aamir se mila .

Hum se Yahya bin Bukayr ne byaan kiya , kaha hum se Layth bin Saad ne byaan kiya , in se Jafar bin Rabee ne , in se Abdur Rahman bin Hurmuz ne , kaha ke mujhe khabar di Abu Salamah bin Abdur Rahman ne ke Zaynub Umm Salamah razi Allahu anha ne apni walda Nabi Karim salla Allahu alaihi wasallam ki zauja mutahhara Umm Salamah razi Allahu anha se khabar di ke ek khatoon jo Islam layi thien aur jin ka naam Subay-ah tha , apne shohar ke saath rehti thien , shohar ka jab intiqal hua to woh hamila thien . Abu Sanabil bin Ba'kak razi Allahu anhu ne in ke paas nikah ka paigham bheja lekin unhon ne nikah karne se inkar kiya . Abu al-Sanabil ne kaha ke Allah ki qasam! Jab tak iddat ki do muddaton mein se lambi na guzar loon gi , tumhare liye is se (jis se nikah woh karna chahti thien) nikah karna sahih nahi ho ga . Phir woh (waza hamal ke baad) taqreeban das din tak ruki rahein . Is ke baad Nabi Karim salla Allahu alaihi wasallam ki khidmat mein hazir huien to Nabi Karim salla Allahu alaihi wasallam ne farmaya ke ab nikah kar lo .

Hum se Yahya bin Bukayr ne byaan kiya , in se Layth ne , in se Yazid ne ke Ibn Shihab ne unhein likha ke Ubaidullah bin Abdullah ne apne walid (Abdullah bin Utbah bin Masood) se unhein khabar di ke unhon ne Ibn al-Arqam ko likha ke Subay-ah Aslamiyyah se poochein ke Nabi Karim ne in ke mutalliq kiya fatwa diya tha to unhon ne farmaya ke jab meere yahan bacha paida ho gaya to Nabi Karim ne mujhe fatwa diya ke ab main nikah kar loon .

Hum se Yahya bin Qazah ne byaan kiya , kaha hum se Imam Malik ne byaan kiya , in se Hisham bin Urwah ne , in se un ke walid ne , in se Miswar bin Makhramah ne ke Subay-ah Aslamiyyah apne shohar ki wafat ke baad chand dinon tak halat e nifaas mein rahein . Phir Nabi Karim salla Allahu alaihi wasallam ke paas aa kar unhon ne nikah ki ijazat maangi to Nabi Karim salla Allahu alaihi wasallam ne unhein ijazat di aur unhon ne nikah kiya .