Hum se Adam bin Abi Iyas ne byaan kiya , kaha hum se Shubah ne , un se Abu Ishaq Amr bin Ubaydullah Sabii ne byaan kiya , kaha ke main ne Abdur Rahman bin Yazid se suna , kaha ke main ne Abdullah bin Masood razi Allahu anhu se suna , unhon ne Surah Bani Israeel , Surah al-Kahf aur Surah Maryam ke mutalliq kaha ke yeh awwal darja ki umdah nihayat faseeh o baleegh surtein hain aur meri purani yaad ki hui (aayat) «fasayunghidhoona» ke mutalliq Ibn Abbas razi Allahu anhuma ne kaha ke apne sar hilaayein ge aur doosre logon ne kaha ke yeh «naghadhat sinnuka» se nikla hai yani tera daant hil gaya .

Hum se Muhammad bin Bashar ne byaan kiya , kaha hum se Ghundar ne , kaha hum se Shubah ne , unhon ne Abu Ishaq se suna , kaha main ne Abdur Rahman bin Yazid se suna , unhon ne Abdullah bin Masood razi Allahu anhu se woh kehte thay ke Surah Bani Israeel aur Surah Kahf aur Surah Maryam aur Surah Taaha aur Surah Anbiya agli bahut faseeh suraton mein se hain (jo Makkah mein utri thien) aur meri purani yaad ki hui hain . Qatadah ne kaha «juizhaazhan» ka maani tukre tukre . Aur Hasan Basri ne kaha «kullun fee falakin» yani har ek tara ek ek aasman mein gol ghoomta hai , jaise soot kaatne ka charkha . «yasbahoon» yani gol ghoomte hain . Ibn Abbas razi Allahu anhuma ne kaha «nafashat» ke maani char gayin . «yushaboon» ke maani roke jayein ge . Bachaye jayein ge . «ummatukum ummatan waahidatan» yani tumhara deen aur mazhab ek hi deen aur mazhab hai . Aur Ikrimah ne kaha «hasabun» Habshi zaban mein jalane ki lakriyon eendhan ko kehte hain . Aur logon ne kaha lafz «ahassoo» ke maani tawaqqo payi yeh «ahsas-tu» se nikla hai yani aahat payi . «khaamideena» ke maani bujhe huay (yani marey huay) . «hasidun» ke maani jarr se ukhaarra gaya , wahid aur tasniya aur jama sab par yahi lafz bola jata hai . «la yastah-siroon» ke maani nahi thake isi se hai lafz «haseerun» thaka hua . Aur «hasartu baeeri» ke maani main ne apne oont ko thaka diya . «ameequn» ke maani door daraz . «nukis-u» yeh kufr ki taraf phere gaye . «san'ata laboosin» zirhein banana . «taqatta'u amrahum» yani ikhtilaf kiya , juda juda tariqa ikhtiyar kiya . «la yasma'oona hasisaha» ke maani aur lafz «hissun» aur «jarsun» aur «hamsun» ke maani ek hi hain yani past aawaz . «aazhannaka» hum ne tujh ko aagah kiya Arab log kehte hain . «aazhantukum» yani main ne tum ko khabar di tum hum barabar ho gaye main ne koi dagha nahi ki jab Aap mukhatab ko kisi baat ki khabar de chuke to Aap aur woh donon barabar ho gaye aur Aap ne is se koi dagha nahi ki . Aur Mujahid ne kaha «la'allakum tus'aloona» ke maani yeh hain shayad tum samajho . «irtada» ke maani pasand kiya raazi hua . «at-tamaseelu» ke maani moortein but . «as-sijillu» maani ke khatton ka majmua daftar .

Hum se Adam bin Abi Iyas ne byaan kiya , kaha hum se Shubah ne byaan kiya , un se Abu Ishaq ne byaan kiya , unhon ne Abdur Rahman bin Umayyah se suna aur unhon ne Ibn Masood razi Allahu anhu se suna , unhon ne kaha Surah Bani Israeel , Surah al-Kahf , Surah Maryam , Surah Taaha aur Surah Anbiya ke mutalliq batlaya ke yeh paanchon surtein awwal darja ki faseeh surtein hain aur meri yaad ki hui hain .