Hum se Abdul Aziz bin Abdullah Oways ne byaan kiya , kaha hum se Ibrahim bin Saad ne byaan kiya , un se Salih bin Kaysan ne , un se Ibn Shihab ne byaan kiya , unhein Urwah bin Zubayr ne khabar di aur un se Aisha razi Allahu anha ne byaan kiya Urwah ne un se aayat «hatta izhas-tay'asar rusulu» ke mutalliq poocha tha . Urwah ne byaan kiya ke main ne poocha tha (aayat mein) «kuzhibu» (takhfeef ke saath) ya «kuzzhibu» (tashdeed ke saath) is par Aisha razi Allahu anha ne kaha ke «kuzzhibu» (tashdeed ke saath) is par main ne un se kaha ke anbiya to yaqeen ke saath jaante thay ke un ki qaum unhein jhutla rahi hai . Phir «zhannu» se kya murad hai , unhon ne kaha apni zindagi ki qasam beshak paighambaron ko is ka yaqeen tha . Main ne kaha «kuzhibu» takhfeef e zhal ke saath parhein to kya qabahat hai . Unhon ne kaha ma'azhallah! Kahin paighambar apne Parvardigar ki nisbat aisa guman kar sakte hain . Main ne kaha achha is aayat ka matlab kya hai ? Unhon ne kaha matlab yeh hai ke paighambaron ko jin logon ne mana un ki tasdeeq ki jab un par ek muddat e daraz tak aafat aur museebat aati rahi aur Allah ki madad aane mein der hui aur paighambar un ke iman laane se na-umeed ho gaye jinon ne un ko jhutlaya tha aur yeh guman karne lage ke jo log iman laye hain ab woh bhi hamain jhoota samajhne lagein ge , is waqt Allah ki madad aan pahunchi .

Hum se Yahya Bin Bukair ne bayan kiya kaha hum se Laith ne bayan kiya un se Aqeel ne un se Ibn Shihab ne kaha ke mujhe Urwah ne khabar di ke unhon ne Nabi Kareem (Sallallahu Alaihi Wasallam) ki zauja mutahira Aisha (Radi Allahu Anha) se ayat ke mutalliq pucha 'hattu iza-stai-asa-r-rusulu wa-zhannū annahum qad kuz-zibū' (tashdeed ke sath "kuz-zibū") hai ya "kuzibū" (baghair tashdeed ke) yaani yahan tak ke jab anbiya na-umeed ho gaye aur unhein khayal guzarne laga ke unhein jhutlaya diya gaya to Allah ki madad pahunchi to unhon ne kaha ke (ye tashdeed ke sath hai aur matlab ye hai ke) un ki qaum ne unhein jhutlaya tha. Mein ne arz kiya ke phir maane kaise baneinge paighambaron ko yaqeen tha hi ke un ki qaum unhein jhutla rahi hai. Phir Quran mein lafz "zhannun" guman aur khayal ke maane mein istemal kyun kiya gaya? Aisha (Radi Allahu Anha) ne kaha: Ae chhote se Urwah! Beshak un ko to yaqeen tha. Mein ne kaha to shayad is ayat mein baghair tashdeed ke "kuzibū" ho ga yaani paighambar ye samjhe ke Allah ne jo in ki madad ka waada kiya tha wo ghalat tha. Aisha (Radi Allahu Anha) ne farmaya: Ma-azallah! Anbiya apne Rabb ke sath bhala aisa guman kar sakte hain. Aisha (Radi Allahu Anha) ne kaha murad ye hai ke paighambaron ke tabedar log jo apne maalik par iman laye thay aur paighambaron ki tasdeeq ki thi un par jab muddat tak Allah ki aazmaish rahi aur madad aane mein darr hui aur paighambar log apni qaum ke jhutlane walon se na-umeed ho gaye (samjhe ke ab wo iman nahi layein ge) aur unhon ne ye guman kiya ke jo log in ke tabedar bane hain wo bhi in ko jhoota samajhne lageinge is waqt Allah ki madad aan pahunchi. Abu Abdullah (Imam Bukhari Rahimahullah) ne kaha ke "astai-asū", "afta-alū" ke wazan par hai jo "ya-istu minhu" se nikla hai. "ay min Yūsufa" (Surah Yusuf ki ayat ka ek jumla hai yaani Zulaikha Yusuf Alaihis Salam se na-umeed ho gayi.) "la tai-asū min rau-hillahi" (Surah Yusuf: 87) yaani Allah se umeed rakho na-umeed na ho
.