Hum se is Hadees ko Hasan bin Sabbaah ne bayan kiya, unhon ne Ja’far bin Aaun se suna, woh Abul Umais se bayan karte hain, unhein Qais bin Muslim ne Tariq bin Shihaab ke waaste se khabar di. Woh Umar bin Khattaab Radhiallahu Anhu se riwayat karte hain ke ek yahoodi ne un se kaha ke aye Ameer-ul-momineen! Tumhaari kitaab (Quran) mein ek Aayat hai jise tum padhte ho. Agar woh hum yahoodiyon par naazil hoti to hum us (ke nuzool ke) din ko yaum-e-eid bana lete. Aap ne poocha woh kaun si Aayat hai? Us ne jawaab diya (Surah Al-Maidah ki yeh Aayat ke) "Aaj main ne tumhaare deen ko mukammal kar diya aur apni ne’mat tum par tamaam kar di aur tumhaare liye deen Islam pasand kiya" Umar Radhiallahu Anhu ne farmaaya ke hum us din aur us maqam ko (khoob) jaante hain jab yeh Aayat Rasoolullah Sallallahu Alaihi Wasallam par naazil hue (us waqt) Aap Sallallahu Alaihi Wasallam Arafaat mein Juma’ ke din khade huwe the.

Hum se Muhammad bin Yusuf Faryabi ne byaan kiya , kaha hum se Sufyan Sawri ne byaan kiya , un se Qays bin Muslim ne , un se Tariq bin Shihab ne ke chand Yahudiyon ne kaha ke agar yeh aayat hamare yahan nazil hui hoti to hum is din eid manaya karte . Umar razi Allahu anhu ne farmaya , kaun si aayat ? Unhon ne kaha «alyawma akmaltu lakum deenakum wa atmamtu alaykum niamati» ”aaj main ne tum par apne deen ko mukammal kiya aur apni ni'mat tum par poori kar di .“ Is par Umar razi Allahu anhu ne farmaya ke mujhe khoob maloom hai ke yeh aayat kahan nazil hui thi . Jab yeh aayat nazil hui to Rasool salla Allahu alaihi wasallam maidan e Arafat mein kharay huay thay (yani Hajjat al-Wida mein) .

Mujh se Muhammad bin Bashar ne byaan kiya , kaha hum se Abdur Rahman bin Mahdi ne , kaha hum se Sufyan Sawri ne byaan kiya , un se Qays bin Aslam ne aur un se Tariq bin Shihab ne ke Yahudiyon ne Umar razi Allahu anhu se kaha ke Aap log ek aaisi aayat ki tilawat karte hain ke agar hamare yahan woh nazil hui hoti to hum (jis din woh nazil hui hoti) is din eid manaya karte . Umar razi Allahu anhu ne kaha , main khoob achhi tarah jaanta hoon ke yeh aayat «alyawma akmaltu lakum deenakum» kahan aur kab nazil hui thi aur jab Arafat ke din nazil hui to Nabi Karim salla Allahu alaihi wasallam kahan tashreef rakhte thay . Allah ki qasam! Hum is waqt maidan e Arafat mein thay . Sufyan Sawri ne kaha ke mujhe shak hai ke woh Juma ka din tha ya aur koi doosra din .

`Hum se Abdullah bin Zubair Humaidi ne bayan kiya, kaha hum se Sufyan bin Uyaina ne bayan kiya, un se Mis'ar bin Kidam aur un ke ilawa (Sufyan Sauri) ne, un se Qais bin Muslim ne, un se Tariq bin Shihab ne bayan kiya ke ek Yahudi (Ka'b Ahbar Islam lane se pehle) ne Umar Radi Allahu Anhu se kaha: ay Ameerul Momineen! agar hamare yahan Surah al-Ma'idah ki yeh ayat nazil hoti «al-Yauma akmaltu lakum deenakum wa atmamtu alaikum ni'mati wa razeetu lakumul Islama deenan» ke ”Aaj mein ne tumhare liye tumhare deen ko mukammal kar diya aur tum par apni ni'mat ko poora kar diya aur tumhare liye Islam ko ba-taur deen ke pasand kar liya.“ to hum is din ko eid (khushi) ka din bana lete. Umar Radi Allahu Anhu ne kaha ke mein jaanta hoon ke yeh ayat kis din nazil hui thi, Arafa ke din nazil hui aur Jumua ka din tha. Imam Bukhari ne kaha yeh riwayat Sufyan ne Mis'ar se suni, Mis'ar ne Qais se suna aur Qais ne Tariq se.