Hum se Muhammad bin Yusuf ne byaan kiya , kaha hum se Sufyan Sawri ne byaan kiya , un se Aasim bin Sulayman ne byaan kiya aur unhon ne Anas bin Malik razi Allahu anhu se Safa aur Marwah ke mutalliq poocha . Unhon ne bataya ke usay hum jahiliyat ke kaamon mein se samajhte thay . Jab Islam aaya to hum in ki sayi se ruk gaye , is par Allah Ta'ala ne yeh aayat nazil ki «inna-ssafa wal marwata» se irshad «an yattawwafa bihima» tak . Yani beshak Safa aur Marwah Allah ki nishaniyon mein se hain . Pas in ki sayi karne mein hajj aur umrah ke dauran koi gunah nahi hai .

Hum se Ahmad Bin Muhammad Marwazi ne bayan kiya, unhon ne kaha ke humein Abdullah Bin Mubarak ne khabar di, unhon ne kaha ke humein Asim Ahwal ne khabar di, unhon ne kaha ke mein ne Anas Bin Malik (Radi Allahu Anhu) se poocha ke aap log Safa aur Marwah ki sayee ko bura samajhte thay? Unhon ne farmaya, haan! Kyunke ye ehd-e-jahiliyat ka shaar tha. Yahan tak ke Allah Ta'ala ne ye ayat nazil farma di "Safa aur Marwah Allah Ta'ala ki nishaniyan hain. Pas jo koi Bait Allah ka Haj ya Umrah kare us par un ki sayee karne mein koi gunah nahi hai."
.

Hum se Abdullah bin Yusuf ne bayan kiya , kaha hum ko Imam Malik ne khabar di , unhein Hisham bin Urwah ne , un se un ke walid ne bayan kiya ke main ne Nabi Kareem صلی اللہ علیہ وسلم ki zauja mutahira Aisha rz se pucha (in dinon mein nau-umar tha) ke Allah Tabarak wa Ta'ala ke is irshad ke baare mein aap ka kya khayal hai «Innas Safa Wal Marwata Min Sha'airillahi Faman Hajjal Baita Aw'tamara Fala Junaha Alaihi An Yattawwafa Bihima» ”Safa aur Marwah beshak Allah ki yaadgar cheezon mein se hain . Pas jo koi Baitullah ka hajj kare ya umrah kare to us par koi gunah nahi ke in donon ke darmiyan aamad-o-raft (yani sa'ee) kare .“ Mera khayal hai ke agar koi in ki sa'ee na kare to us par bhi koi gunah nahi hona chahiye . Aisha rz ne kaha ke hargiz nahi jaisa ke tumhara khayal hai . Agar masla yehi hota to phir waqayi un ke sa'ee na karne mein koi gunah na tha . Lekin yeh ayat Ansar ke baare mein nazil hui thi (Islam se pehle) Ansar Manat butt ke naam se ihram bandhte thay , yeh butt Maqam-e-Qudaid mein rakha hua tha aur Ansar Safa aur Marwah ki sa'ee ko accha nahi samajhte thay . Jab Islam aaya to unhone sa'ee ke mutaliq aap صلی اللہ علیہ وسلم se pucha: is par Allah Ta'ala ne yeh ayat nazil ki «Innas Safa Wal Marwata Min Sha'airillahi Faman Hajjal Baita Aw'tamara Fala Junaha Alaihi An Yattawwafa Bihima» ”Safa aur Marwah beshak Allah ki yaadgar cheezon mein se hain , so jo koi Baitullah ka hajj kare ya umrah kare to us par koi bhi gunah nahi ke in donon ke darmiyan (sa'ee) kare .“

Hum se Abdullah bin Zubayr Humaydi ne byaan kiya, kaha hum se Sufyan bin Uyaynah ne byaan kiya ke main ne Urwah se suna, unhon ne byaan kiya ke main ne Aisha razi Allahu anha se poocha to unhon ne kaha ke kuch log Manat but ke naam par ihram baandhte jo Maqam e Mushallal mein tha, woh Safa aur Marwah ke darmiyan (Hajj o Umrah mein) sayi nahi karte thay is par Allah Ta'ala ne aayat nazil ki «innas-safa wal marwata min sha'airillahi» ”beshak Safa aur Marwah Allah ki nishaniyon mein se hain“ chunanche Rasool Allah salla Allahu alaihi wasallam ne un ke darmiyan tawaf kiya aur Musalmanon ne bhi tawaf kiya. Sufyan ne kaha ke ”Manat“ Maqam e Qadeed par Mushallal mein tha aur Abdur Rahman bin Khalid ne byaan kiya ke un se Ibn Shihab ne, un se Urwah ne byaan kiya aur un se Aisha razi Allahu anha ne kaha ke yeh aayat Ansar ke baare mein nazil hui thi. Islam se pehle Ansar aur Ghassan ke log Manat ke naam par ihram baandhte thay, pehli hadees ki tarah. Aur Mamar ne Zuhri se byaan kiya, un se Urwah ne, un se Aisha razi Allahu anha ne ke qabila Ansar ke kuch log Manat ke naam ka ihram baandhte thay. Manat ek but tha jo Makkah aur Madinah ke darmiyan rakkha hua tha (Islam laane ke baad) in logon ne kaha ke ya Rasool Allah! Hum Manat ki tazim ke liye Safa aur Marwah ke darmiyan sayi nahi kiya karte thay.