Hum se Muslim ne byaan kiya , kaha hum se Shubah ne byaan kiya , kaha hum se Saeed bin Abi Burdah ne aur un ke walid ne byaan kiya ke Nabi Karim salla Allahu alaihi wasallam ne un ke dada Abu Musa razi Allahu anhu aur Maaz bin Jabal razi Allahu anhu ko Yaman ka hakim bana kar bheja aur farmaya ke logon ke liye aasani paida karna , un ko dushwariyon mein na daalna . Logon ko khush khabriyaan dena deen se nafrat na dilana aur tum donon aapas mein muwafaqat rakhna . Is par Abu Musa Ash'ari razi Allahu anhu ne arz kiya: Ae Allah ke Nabi! Hamare mulk mein jau se ek sharab tayyar hoti hai jis ka naam ”mizr“ hai aur shehad se ek sharab tayyar hoti hai jo ”bit'a“ kehlati hai . Aap salla Allahu alaihi wasallam ne farmaya ke har nasha lane wali cheez haram hai . Phir donon buzurg rawana huay . Maaz razi Allahu anhu ne Abu Musa razi Allahu anhu se poocha Aap Quran kis tarah parhte hain ? Unhon ne bataya ke kharay ho kar bhi , baith kar bhi aur apni sawari par bhi aur main thore thore arsa baad parhta hi rehta hoon . Maaz razi Allahu anhu ne kaha lekin mera mamool yeh hai ke shuru raat mein , main so jata hoon aur phir bedar ho jata hoon . Is tarah main apni neend par bhi sawab ka umeedwar hoon jis tarah bedar ho kar (ibadat karne par) sawab ki mujhe umeed hai aur unhon ne ek khaima laga liya aur ek doosre se mulaqat barabar hoti rehti . Ek martaba Maaz razi Allahu anhu Abu Musa razi Allahu anhu se milne ke liye aaye , dekha ek shakhs bandha hua hai . Poocha yeh kya baat hai ? Abu Musa razi Allahu anhu ne batlaya ke yeh ek Yahudi hai , pehle khud Islam laya ab yeh murtad ho gaya hai . Maaz razi Allahu anhu ne kaha ke main usay qatl kiye baghair hargiz na rahoon ga . Muslim bin Ibrahim ke saath is hadees ko Abdul Malik bin Amr Aqadi aur Wahb bin Jareer ne Shubah se riwayat kiya hai aur Waki , Nadr aur Abu Dawood ne is ko Shubah se , unhon ne Saeed se , unhon apne baap Burdah se , unhon ne Saeed ke dada Abu Musa razi Allahu anhu se , unhon ne Nabi Karim salla Allahu alaihi wasallam se riwayat kiya aur Jareer bin Abdul Hameed ne is ko Shaybani se riwayat kiya , unhon ne Abu Burdah se .

Hum se Musaddad ne bayan kiya kaha ke hum se Yahya Bin Saeed Qattan ne bayan kiya, un se Qurrah Bin Khalid ne kaha ke mujh se Humaid Bin Hilal ne bayan kiya, un se Abu Burdah ne bayan kiya aur un se Abu Musa Ashari (Radi Allahu Anhu) ne ke mein Rasul Allah (Sallallahu Alaihi Wasallam) ki khidmat mein aya. Mere sath (mere qabeela) Ashar ke do mard aur bhi thay. Mein ne kaha ke mujhe nahi maloom ke ye donon sahiban hakim banne ke talab-gar hain. Is par Aap (Sallallahu Alaihi Wasallam) ne farmaya ke jo shakhs hakim banne ka khud khwahish-mand ho, ise hum hargiz hakim nahi banayenge. (Yahan rawi ko shak hai ke) Nabi Kareem (Sallallahu Alaihi Wasallam) ne lafz «لن» ya lafz «لا» istemal farmaya
.

Hum se Musa bin Ismail ne byaan kiya , kaha hum se Abu Awanah ne byaan kiya , kaha hum se Abdul Malik bin Umayr ne byaan kiya , un se Abu Burdah razi Allahu anhu ne byaan kiya ke Rasool Allah salla Allahu alaihi wasallam ne Abu Musa Ash'ari aur Maaz bin Jabal razi Allahu anhuma ko Yaman ka hakim bana kar bheja . Rawi ne byaan kiya ke donon sahabiyon ko is ke ek ek soobe mein bheja . Rawi ne byaan kiya ke Yaman ke do soobe thay . Phir Nabi Karim salla Allahu alaihi wasallam ne un se farmaya ke dekho logon ke liye aasaniyan paida karna , dushwariyan na paida karna , unhein khush karne ki koshish karna , deen se nafrat na dilana . Yeh donon buzurg apne apne kaamon par rawana ho gaye . Donon mein se jab koi apne ilaqe ka daura karte karte apne doosre saathi ke paas pahunch jata to un se taazi (mulaqat) ke liye aata aur salam karta . Ek martaba Maaz razi Allahu anhu apne ilaqa mein apne sahib Abu Musa razi Allahu anhu ke qareeb pahunch gaye aur apne khachar par un se mulaqat ke liye chale . Jab un ke qareeb pahunche to dekha ke woh baithe huay hain aur un ke paas kuch log jama hain aur ek shakhs un ke samne hai jis ki mushkein kasi hui hain . Maaz razi Allahu anhu ne un se poocha: Ae Abdullah bin Qays! Yeh kya waqia hai ? Abu Musa razi Allahu anhu ne batlaya ke yeh shakhs Islam lane ke baad murtad ho gaya hai . Unhon ne kaha ke phir jab tak usay qatl na kar diya jaye main apni sawari se nahi utaroon ga . Musa razi Allahu anhu ne kaha ke qatl karne hi ke liye usay yahan laya gaya hai . Aap utar jayein lekin unhon ne ab bhi yahi kaha ke jab tak usay qatl na kiya jaye ga main na utaroon ga . Aakhir Musa razi Allahu anhu ne hukm diya aur usay qatl kar diya gaya . Tab woh apni sawari se utray aur poocha , Abdullah! Aap Quran kis tarah parhte hain ? Unhon ne kaha main to thora thora har waqt parhta rehta hoon phir unhon ne Maaz razi Allahu anhu se poocha ke Maaz! Aap Quran Majeed kis tarah parhte hain ? Maaz razi Allahu anhu ne kaha ke main to raat ke shuru mein sota hoon phir apni neend ka ek hissa poora kar ke main uth baithta hoon aur jo kuch Allah Ta'ala ne mere liye muqaddar kar rakkha hai is mein Quran Majeed parhta hoon . Is tarah bedari mein jis sawab ki umeed Allah Ta'ala se rakhta hoon sone ki halat ke sawab ka bhi us se isi tarah umeedwar rehta hoon .