Hum se Musa bin Ismail ne byaan kiya , kaha hum se Wuhayb bin Khalid ne byaan kiya , un se Amr bin Yahya ne , un se Abbad bin Tamim ne , un se Abdullah bin Zayd bin Aasim razi Allahu anhu ne byaan kiya ke Ghazwa Hunayn ke mauqa par Allah Ta'ala ne apne Rasool ko jo ghanimat di thi Aap ne is ki taqseem kamzor iman ke logon mein (jo Fatah Makkah ke baad iman laye thay) kar di aur Ansar ko is mein se kuch nahi diya . Is ka unhein kuch malal hua ke woh maal jo Nabi Karim salla Allahu alaihi wasallam ne doosron ko diya unhein kyun nahi diya . Aap ne is ke baad unhein khitab kiya aur farmaya: Ae Ansariyo! Kya main ne tumhein gumrah nahi paya tha phir tum ko mere zariye Allah Ta'ala ne hidayat naseeb ki aur tum mein aapas mein dushmani aur na-ittifaqi thi to Allah Ta'ala ne mere zariye tum mein baaham ulfat paida ki aur tum muhtaj thay Allah Ta'ala ne mere zariye ghani kiya . Aap ke ek ek jumle par Ansar kehte jate thay ke Allah aur us ke Rasool ke hum sab se zyada ihsan mand hain . Aap salla Allahu alaihi wasallam ne farmaya ke meri baaton ka jawab dene se tumhein kya cheez manay rahi ? Byaan kiya ke Aap salla Allahu alaihi wasallam ke har isharah par Ansar arz karte jate ke Allah aur us ke Rasool ke hum sab se zyada ihsan mand hain phir Aap salla Allahu alaihi wasallam ne farmaya ke agar tum chahte to mujh se is tarah bhi keh sakte thay (ke Aap aaye to log Aap ko jhutla rahe thay , lekin hum ne Aap ki tasdeeq ki waghaira) kya tum is par khush nahi ho ke jab log oont aur bakriyan le ja rahe hon to tum apne gharon ki taraf Rasool Allah salla Allahu alaihi wasallam ko saath le jao ? Agar hijrat ki fazeelat na hoti to main bhi Ansar ka ek aadmi hota . Log khwah kisi ghati ya wadi mein rahein ge main to Ansar ki ghati aur wadi mein rahoon ga . Ansar astar ki tarah hain jo jism se hamesha laga rehta hai aur doosre log oopar ke kapre yani abrah ki tarah hain . Tum log (Ansar) dekho ge ke mere baad tum par doosron ko tarjeeh di jaye gi . Tum aise waqt mein sabr karna yahan tak ke mujh se haudh par aa milo .

`Hum se Musa ne bayan kiya, unhon ne kaha hum se Wuhaib ne bayan kiya, un se Amr bin Yahya ne, un se Abbad bin Tamim ne aur un se Abdullah bin Zaid Radi Allahu Anhu ne bayan kiya ke agar hijrat na hoti to mein Ansar ka ek fard hota aur agar log kisi wadi ya ghati mein chalein to mein Ansar ki wadi ya ghati mein chaloon ga. Is riwayat ki mutabi'at Abul Tayyah ne ki, un se Anas Radi Allahu Anhu ne Nabi Kareem صلی اللہ علیہ وسلم se. Is mein bhi darre ka zikr hai.