Hum se Abdullah bin Yusuf ne bayan kiya , kaha hum se Malik ne Ishaq bin Abdullah se unhon ne Anas raziyallahu anhu se suna , woh kehte hain ke mein ne Rasool Allah salla Allahu alaihi wa sallam ko masjid mein paya , aap salla Allahu alaihi wa sallam ke pas aur bhi kai log thay . Mein khara ho gaya to Nabi Karim salla Allahu alaihi wa sallam ne mujh se poocha ke kya tujhe Abu Talha ne bheja hai ? Mein ne kaha ji haan aap salla Allahu alaihi wa sallam ne poocha khane ke liye ? blaya hai mein ne arz ki ke ji haan! tab aap salla Allahu alaihi wa sallam ne apne qareeb mojood logon se farmaya ke chalo , sab hazrat chalne lage aur mein un ke aage aage chal raha tha .

Hum se Abdullah bin Yusuf ne bayan kiya, kaha hum ko Malik ne khabar di, unhein Ishaq bin Abdullah bin Abi Talhah ne aur unhon ne Anas bin Malik Radi Allahu Anhu se suna, unhon ne kaha ke Abu Talhah Radi Allahu Anhu ne (meri walda) Umm-e-Sulaim Radi Allahu Anhuma se kaha ke mein ne Rasoolullah Sallallahu Alaihi Wa Sallam ki awaz suni to Aap ki awaz mein bahut du'f maloom hua. Mera khayal hai ke Aap bahut bhooke hain. Kya tumhare pas kuch khana hai? Unhon ne kaha ji haan, chunanche unhon ne jau ki chand rotiyan nikalein, phir apni odhni nikali aur us mein rotiyon ko lapait kar mere hath mein chupa diya aur us odhni ka doosra hissa mere badan par bandh diya. Is ke baad Rasoolullah Sallallahu Alaihi Wa Sallam ki khidmat mein mujhe bheja. Mein jo gaya to Aap masjid mein tashreef rakhte thay. Aap ke sath bahut se Sahaba bhi baithe hue thay. Mein Aap ke pas khara ho gaya to Aap ne farmaya kya Abu Talhah ne tumhein bheja hai? Mein ne arz kiya ji haan. Aap ne daryaft farmaya, kuch khana de kar? Mein ne arz kiya ji haan, jo Sahaba Aap ke sath is waqt maujood thay, un sab se Aap ne farmaya ke chalo utho, Aap tashreef lane lage aur mein Aap ke aage aage lapak raha tha aur Abu Talhah Radi Allahu Anhu ke ghar pahunch kar mein ne unhein khabar di. Abu Talhah Radi Allahu Anhu bole, Umm-e-Sulaim! Nabi Kareem Sallallahu Alaihi Wa Sallam to bahut se logon ko sath laye hain hamare pas itna khana kahan hai ke sab ko khilaya ja sake? Umm-e-Sulaim Radi Allahu Anha ne kaha: Allah aur us ke Rasool zyada jante hain (hum fikr kyun karein?) Khair Abu Talhah aage barh kar Nabi Kareem Sallallahu Alaihi Wa Sallam se mile. Ab Rasoolullah Sallallahu Alaihi Wa Sallam ke sath woh bhi chal rahe thay. Umm-e-Sulaim ne wahi roti la kar Aap ke samne rakh di, phir Nabi Kareem Sallallahu Alaihi Wa Sallam ke hukm se rotiyon ka chora kar diya gaya, Umm-e-Sulaim Radi Allahu Anha ne kuppi nichor kar us par kuch ghee daal diya, aur is tarah salan ho gaya, Aap ne is ke baad us par dua ki jo kuch bhi Allah Ta'ala ne chaha. Phir farmaya das aadmiyon ko bula lo, unhon ne aisa hi kiya, un sab ne roti pait bhar kar khayi aur jab yeh log bahar gaye to Aap ne farmaya ke phir das aadmiyon ko bula lo. Chunanche das aadmiyon ko bulaya gaya, unhon ne bhi pait bhar kar khaya, jab yeh log bahar gaye to Nabi Kareem Sallallahu Alaihi Wa Sallam ne farmaya ke phir das hi aadmiyon ko andar bula lo. Unhon ne aisa hi kiya aur unhon ne bhi pait bhar kar khaya. Jab woh bahar gaye to Aap ne farmaya ke phir das aadmiyon ko dawat de do. Is tarah sab logon ne pait bhar kar khana khaya. In logon ki tadad sattar ya assi thi.

Hum se Ismail bin Aliyyah ne bayan kiya , kaha ke mujh se Imam Malik ne bayan kiya , in se Ishaq bin Abdullah bin Abi Talha ne , unhon ne Anas bin Malik razi Allahu anhu se suna , unhon ne bayan kiya ke Abu Talha razi Allahu anhu ne apni biwi Umm Sulaym razi Allahu anha se kaha ke main ne Rasool Allah salla Allahu alaihi wasallam ki aawaz mein zu-f o naqahat ko mehsoos kiya hai aur maloom hota hai ke Aap faqa se hain . kiya tumhare paas koi cheez hai ? Chunanche unhon ne jau ki chand rotiyaan nikaalein , phir apna dupatta nikala aur is ke ek hisse mein rotiyon ko lapait kar mere (yani Anas razi Allahu anhu ke) kapre ke neeche chhupa diya aur ek hissa mujhe chadar ki tarah orha diya , phir mujhe Rasool Allah salla Allahu alaihi wasallam ki khidmat mein bheja . Bayan kiya ke main jab Nabi Karim salla Allahu alaihi wasallam ki khidmat mein hazir hua to Aap ko masjid mein paya aur Aap ke saath sahabah thay . Main in sab hazrat ke samne ja kar khara ho gaya . Nabi Karim salla Allahu alaihi wasallam ne daryaft farmaya ke Ae Anas! Tumhein Abu Talha ne bheja ho ga . Main ne arz ki ji haan . Nabi Karim salla Allahu alaihi wasallam ne poochha: khane ke saath ? Main ne arz ki , ji haan . Is ke baad Nabi Karim salla Allahu alaihi wasallam ne apne sathiyon se farmaya ke khare ho jao . Chunanche Aap rawana huay . Main sab ke aage aage chalta raha . Jab Abu Talha razi Allahu anhu ke paas wapas pahuncha to unhon ne kaha: Umm Sulaym! Nabi Karim salla Allahu alaihi wasallam sahabah ko saath le kar tashreef laye hain , haalan ke hamare paas khane ka itna saman nahi jo sab ko kafi ho sake . Umm Sulaym razi Allahu anha is par bolien ke Allahaur is ka Rasool khoob jaante hain . Bayan kiya ke phir Abu Talha razi Allahu anhu (istiqbal ke liye) nikle aur Nabi Karim salla Allahu alaihi wasallam se mulaqat ki . Is ke baad Abu Talha razi Allahu anhu aur Nabi Karim salla Allahu alaihi wasallam ghar ki taraf mutawajjo huay aur ghar mein dakhil ho gaye . Nabi Karim salla Allahu alaihi wasallam ne farmaya ke Umm Sulaym! Jo kuch tumhare paas hai woh yahan lao . Umm Sulaym razi Allahu anha roti laayein , Nabi Karim salla Allahu alaihi wasallam ne hukm diya aur is ka choora kar liya gaya . Umm Sulaym razi Allahu anhu ne apne ghee ke dabbe mein se ghee nichorr kar is ka maleeda bana liya , phir Nabi Karim salla Allahu alaihi wasallam ne dua ki jo kuch Allah Ta'ala ne Aap se dua karani chahi , is ke baad farmaya ke in das das aadmiyon ko khane ke liye bula lo . Chunanche das sahabah ko bulaya . Sab ne khaya aur shikam-sair ho kar bahar chale gaye . Phir farmaya ke das ko aur bula lo , unhein bulaya gaya aur sab ne shikam-sair ho kar khaya aur bahar chale gaye . Phir Aap ne farmaya ke das sahabah ko aur bula lo , phir das sahabah ko bulaya gaya aur in logon ne bhi khoob pait bhar kar khaya aur bahar tashreef le gaye . Is ke baad phir das sahabah ko bulaya gaya is tarah tamam sahabah ne pait bhar kar khaya , is waqt assi (80) sahabah ki jama'at wahan maujood thi .

Hum se Salt bin Muhammad ne bayan kiya , kaha hum se Hammad bin Zayd ne , in se Jadd Abu Usman ne in se Anas razi Allahu anhu ne aur (is ki riwayat Hammad ne) Hisham se bhi ki , in se Muhammad ne aur in se Anas razi Allahu anhu ne aur Sinan Abu Rabia se (bhi ki) aur in se Anas razi Allahu anhu ne ke in ki walda Umm Sulaym razi Allahu anha ne ek mudd jau liya aur in se pees kar is ka «khateefa» (aate ko doodh mein mila kar pakate hain) pakaya aur in ke paas jo ghee ka dabba tha is mein is par se ghee nichorra , phir Nabi Karim salla Allahu alaihi wasallam ki khidmat mein (bulane ke liye) bheja . Main Nabi Karim salla Allahu alaihi wasallam ki khidmat mein gaya to Aap apne sahabah ke saath tashreef rakhte thay . Main ne Aap ko khana khane ke liye bulaya . Aap ne daryaft farmaya aur woh log bhi jo meere saath hain ? Chunanche main wapas aaya aur kaha ke Nabi Karim salla Allahu alaihi wasallam to farmate hain ke jo meere saath maujood hain woh bhi chalein ge . Is par Abu Talha Aap salla Allahu alaihi wasallam ki khidmat mein hazir huay aur arz kiya: ya Rasool Allah! Woh to ek cheez hai jo Umm Sulaym ne Aap ke liye pakayi hai . Nabi Karim salla Allahu alaihi wasallam tashreef laye aur khana Aap ke paas laya gaya . Nabi Karim salla Allahu alaihi wasallam ne farmaya ke das aadmiyon ko meere paas andar bula lo . Chunanche das sahabah dakhil huay aur khana pait bhar kar khaya phir farmaya das aadmiyon ko meere paas aur bula lo . Yeh das bhi andar aaye aur pait bhar kar khaya phir farmaya aur das aadmiyon ko bula lo . Is tarah unhon ne chalis aadmiyon ka shumar kiya . Is ke baad Nabi Karim salla Allahu alaihi wasallam ne khana khaya phir Aap khare huay to main dekhne laga ke khane mein se kuch bhi kam nahi hua .

Hum se Qutaybah bin Saeed ne bayan kiya, in se Imam Malik ne bayan kiya, in se Ishaq bin Abdullah bin Abi Talha ne bayan kiya, unhon ne Anas bin Malik razi Allahu anhu se suna, unhon ne bayan kiya ke Abu Talha razi Allahu anhu ne (apni biwi) Umm Sulaym razi Allahu anha se kaha ke main sun kar aa raha hoon Nabi Karim salla Allahu alaihi wasallam ki aawaz (faqon ki wajah se) kamzor par gayi hai aur main ne aawaz se Aap ke faqa ka andaza lagaya hai. Kya tumhare paas khane ki koi cheez hai? Unhon ne kaha haan. Chunanche unhon ne jau ki chand rotiyaan nikaalein aur ek aurhni le kar roti ko is ke ek kone se lapeit diya aur usay Nabi Karim salla Allahu alaihi wasallam ki khidmat mein bhijwaya. Main le kar gaya to main ne dekha ke Nabi Karim salla Allahu alaihi wasallam masjid mein tashreef rakhte hain aur Aap ke saath kuch log hain, main in ke paas ja ke khara ho gaya to Nabi Karim salla Allahu alaihi wasallam ne poochha, kiya tumhein Abu Talha ne bheija hai, main ne arz kiya: ji haan. Phir Nabi Karim salla Allahu alaihi wasallam ne in logon se kaha jo saath thay ke utho aur chalo, main in ke aage aage chal raha thu. Aakhir mein Abu Talha razi Allahu anhu ke yahan pahuncha aur in ko ittila di. Abu Talha ne kaha: Umm Sulaym! Rasool Allah salla Allahu alaihi wasallam tashreef laaye hain aur hamare paas to koi aisa khana nahi hai jo sab ko pesh kiya ja sake? Unhon ne kaha ke Allah aur us ke Rasool ko zyada ilm hai. Phir Abu Talha razi Allahu anhu bahar nikle aur Nabi Karim salla Allahu alaihi wasallam se mile, is ke baad Nabi Karim salla Allahu alaihi wasallam aur Abu Talha ghar ki taraf badhe aur andar gaye. Nabi Karim salla Allahu alaihi wasallam ne farmaya, Umm Sulaym! Jo kuch tumhare paas hai mere paas lao. Woh yahi rotiyaan laayin. Rawi ne bayan kiya ke phir Nabi Karim salla Allahu alaihi wasallam ke hukm se in rotiyon ko choura kar diya gaya aur Umm Sulaym razi Allahu anha ne apni ek (ghee ki) kuppi ko nichorha gaya yahi saalan thu. Is ke baad Nabi Karim salla Allahu alaihi wasallam ne jaisa ke Allah ne chaha dua parhi aur farmaya ke das das aadmiyon ko andar bulao unhein bulaya gaya aur is tarah sab logon ne khaya aur khoob ser ho gaye, hazireen ki tadaad sattar ya assi aadmiyon ki ku.