Mujh se Abdullah Bin Yusuf ne bayan kiya ‘ kaha hum ko Imam Malik ne khabar di ‘ unhein Zaid Bin Aslam ne aur unhein in ke walid Aslam ne ke Rasul Allah Sallallahu Alaihi Wasallam kisi safar yani (safar-e-Hudaibiya) mein thay, raat ka waqt tha aur Umar Bin Khattab Radi Allahu Anhu Aap ke sath sath thay. Umar Radi Allahu Anhu ne Aap se kuch poocha lekin (is waqt Aap vahi mein mashghool thay ‘ Umar Radi Allahu Anhu ko khabar na thi) Aap ne koi jawab nahi diya. Unhon ne phir poocha ‘ Aap ne phir koi jawab nahi diya. Unhon ne phir poocha ‘ Aap ne is martaba bhi koi jawab nahi diya. Is par Umar Radi Allahu Anhu ne (apne dil mein) kaha: Umar! Teri maa tujh par roye ‘ Rasul Allah Sallallahu Alaihi Wasallam se tum ne teen martaba sawal kiya ‘ Aap Sallallahu Alaihi Wasallam ne tumhein ek martaba bhi jawab nahi diya. Umar Radi Allahu Anhu ne bayan kiya ke phir mein ne apne oont ko ayr lagayi aur musalmanon se aage nikal gaya. Mujhe darr tha ke kahin mere bare mein koi vahi na nazil ho jaye. Abhi thori der hui thi ke mein ne suna ‘ ek shakhs mujhe awaz de raha tha. Unhon ne bayan kiya ke mein ne socha ke mein to pehle hi darr raha tha ke mere bare mein kahin koi vahi nazil na ho jaye. Phir mein Aap Sallallahu Alaihi Wasallam ki khidmat mein hazir hua aur Aap ko salam kiya. Aap Sallallahu Alaihi Wasallam ne farmaya ke raat mujh par ek surat nazil hui hai aur wo mujhe is tamam kainat se zyada aziz hai jis par sooraj tulu hota hai. Phir Aap ne surah «inna fattahna laka fatham mubina» ”Beshak hum ne Aap ko khuli hui fatah di hai.“ Ki tilawat farmai
.

Hum se Abdullah bin Maslamah ne byaan kiya , un se Imam Malik ne , un se Zayd bin Aslam ne , un se un ke walid ne ke Rasool Allah salla Allahu alaihi wasallam ek safar mein ja rahe thay . Umar razi Allahu anhu bhi Aap ke saath thay . Raat ka waqt tha Umar bin Khattab razi Allahu anhu ne sawal kiya lekin Nabi Karim salla Allahu alaihi wasallam ne koi jawab nahi diya . Phir unhon ne sawal kiya aur is martaba bhi Aap salla Allahu alaihi wasallam ne jawab nahi diya , teesri martaba bhi unhon ne sawal kiya lekin Aap ne jawab nahi diya . Is par Umar razi Allahu anhu ne kaha , Umar ki maan usay roye! Nabi Karim salla Allahu alaihi wasallam se tum ne teen martaba sawal mein israr kiya , lekin Nabi Karim salla Allahu alaihi wasallam ne tumhein kisi martaba jawab nahi diya . Umar razi Allahu anhu ne byaan kiya ke phir main ne apne oont ko harakat di aur logon se aage barh gaya . Mujhe khauf tha ke kahin mere baare mein Quran Majeed ki koi aayat na nazil ho . Abhi thori hi der hui nahi ke ek pukarne wale ki aawaz main ne suni jo mujhe hi pukar raha tha . Main ne kaha ke mujhe to khauf tha hi ke mere baare mein koi aayat na nazil ho jaye . Main Nabi Karim salla Allahu alaihi wasallam ki khidmat mein hazir hua aur salam kiya , Nabi Karim salla Allahu alaihi wasallam ne farmaya ke mujh par aaj raat ek surat nazil hui hai jo mujhe is saari kainat se zyada azeez hai jis par sooraj tuloo hota hai phir Aap ne Surah al-Fatah ki tilawat farmayi .

Hum se Ismail bin Abi Oways ne byaan kiya, kaha ke mujh se Imam Malik ne byaan kiya, un se Zayd bin Aslam ne aur un se un ke walid Aslam ne ke Rasool Allah salla Allahu alaihi wasallam raat ko ek safar mein ja rahe thay. Umar bin Khattab razi Allahu anhu bhi Aap ke saath thay. Umar razi Allahu anhu ne Nabi Karim salla Allahu alaihi wasallam se kuch poocha. Lekin Nabi Karim salla Allahu alaihi wasallam ne is ka koi jawab na diya. Umar razi Allahu anhu ne phir poocha Aap ne phir koi jawab nahi diya. Teesri martaba phir poocha aur jab is martaba bhi koi jawab nahi diya to Umar razi Allahu anhu ne (apne aap ko) kaha teri maan tujh par roye tu ne Nabi Karim salla Allahu alaihi wasallam se teen martaba aajzi se sawal kiya aur Nabi Karim salla Allahu alaihi wasallam ne kisi martaba bhi jawab nahi diya. Umar razi Allahu anhu ne byaan kiya ke phir main ne apni oontni ko doraya aur logon se aage ho gaya (Aap ke barabar chalna chhor diya) mujhe khauf thu ke kahin is harakat par mere baare mein koi aayat nazil na ho jaye abhi thora hi waqt guzra tha ke main ne ek pukarne wale ko suna jo pukar raha thu. Umar razi Allahu anhu ne byaan kiya ke main ne soocha mujhe to khauf tha hi ke mere baare mein kuch wahi nazil ho gi. Umar razi Allahu anhu ne byaan kiya chunanche main Rasool Allah salla Allahu alaihi wasallam ki khidmat mein aaya aur main ne Aap ko salam kiya (salam ke jawab ke baad Nabi Karim salla Allahu alaihi wasallam ne farmaya ke Ae Umar! Aaj raat mujh par aaisi surat nazil hui hai jo mujhe in sab cheezon se zyada pasand hai jin par sooraj nikalta hai. Phir Aap ne Surah «inna fatahna laka fath-ham mubeenan» ki tilawat farmayi.