Hum se Hadba Bin Khalid ne bayan kiya ‘ kaha hum se Hammam Bin Yahya ne bayan kiya ‘ in se Qatada ne bayan kiya ‘ unhein Anas Bin Malik Radi Allahu Anhu ne khabar di ke Rasul Allah Sallallahu Alaihi Wasallam ne char umre kiye aur siwa is umre ke jo Aap Sallallahu Alaihi Wasallam ne hajj ke sath kiya ‘ tamam umre Zil-Qaada (ke mahine) mein kiye. Hudaibiya ka umra bhi Aap Sallallahu Alaihi Wasallam Zil-Qaada (ke mahine) mein karne tashreef le gaye phir dusre saal (is ki qaza mein) Aap ne Zil-Qaada mein umra kiya aur ek umra Jirana se Aap ne kiya tha ‘ jahan Ghazwa Hunain ki ghanimat Aap ne taqseem ki thi. Ye bhi Zil-Qaada mein kiya tha aur ek umra hajj ke sath kiya (jo Zil-Hijja mein kiya tha)
.

Hum se Ahmad Bin Muhammad ne bayan kiya, unhein Abdullah Bin Mubarak ne khabar di, unhein Ibn Jurayj ne khabar di ke Ikrima Bin Khalid ne Ibn Umar (Radi Allahu Anhuma) se Haj se pehle Umrah karne ke bare mein poocha to unhon ne kaha koi haraj nahi, Ikrima ne kaha Ibn Umar (Radi Allahu Anhuma) ne batlaya ke Nabi Kareem (Sallallahu Alaihi Wasallam) ne Haj karne se pehle Umrah hi kiya tha aur Ibrahim Bin Saad ne Muhammad Bin Ishaq se bayan kiya, un se Ikrima Bin Khalid ne bayan kiya ke mein ne Abdullah Bin Umar (Radi Allahu Anhuma) se poocha phir yahi hadees bayan ki. Hum se Amr Bin Ali Fallas ne bayan kiya, un se Abu Asim ne bayan kiya, unhein Ibn Jurayj ne khabar di, un se Ikrima Bin Khalid ne bayan kiya ke mein ne Ibn Umar (Radi Allahu Anhuma) se poocha phir yahi hadees bayan ki
.

Mujahid ne bayan kiya ke hum ne Umm-ul-Momineen Aisha (Radi Allahu Anha) ke hujra se un ke miswak karne ki awaz suni to Urwah ne poocha Aye meri maan! Aye Umm-ul-Momineen! Abu Abdul Rahman ki baat aap sun rahi hain? Aisha (Radi Allahu Anha) ne poocha wo kya keh rahe hain? Unhon ne kaha keh rahe hain ke Rasul Allah (Sallallahu Alaihi Wasallam) ne chaar umray kiye thay jin mein se ek Rajab mein kiya tha, unhon ne farmaya ke Allah Abu Abdul Rahman par raham kare! Nabi Kareem (Sallallahu Alaihi Wasallam) ne to koi Umrah aisa nahi kiya jis mein wo khud maujood na rahe hon, Aap (Sallallahu Alaihi Wasallam) ne Rajab mein to kabhi Umrah hi nahi kiya
.

Hum se Hassan Bin Hassan ne bayan kiya ke hum se Hammam Bin Yahya ne bayan kiya, un se Qatada ne ke mein ne Anas (Radi Allahu Anhu) se poocha ke Nabi Kareem (Sallallahu Alaihi Wasallam) ne kitne umray kiye thay? To aap ne farmaya ke chaar, Umrah Hudaibiyah Zi Qadah mein jahan par Mushrikeen ne Aap (Sallallahu Alaihi Wasallam) ko rok diya tha, phir ayinda saal Zi Qadah hi mein ek Umrah Qaza jis ke mutaliq Aap (Sallallahu Alaihi Wasallam) ne Mushrikeen se sulah ki thi aur teesra Umrah Jirranah jis moqa par Aap (Sallallahu Alaihi Wasallam) ne ghaliban Hunain ki ghaneemat taqseem ki thi, chautha Haj ke sath mein ne poocha aur Nabi Kareem (Sallallahu Alaihi Wasallam) ne Haj kitne kiye? Farmaya ke ek
.

Hum se Abul Waleed Hisham Bin Abdul Malik ne bayan kiya, kaha ke hum se Hammam ne bayan kiya, un se Qatada ne bayan kiya ke mein ne Anas (Radi Allahu Anhu) se Nabi Kareem (Sallallahu Alaihi Wasallam) ke Umrah ke mutaliq poocha to aap ne farmaya ke Nabi Kareem (Sallallahu Alaihi Wasallam) ne ek Umrah wahan kiya jahan se Aap (Sallallahu Alaihi Wasallam) ko Mushrikeen ne wapas kar diya tha aur doosre saal (isi) Umrah Hudaibiyah (ki qaza) ki thi aur ek Umrah Zi Qadah mein aur ek apne Haj ke sath kiya tha
.

Hum se Hudba Bin Khalid ne bayan kiya, kaha hum se Hammam ne bayan kiya, is riwayat mein yun hai ke jo Umrah Nabi Kareem (Sallallahu Alaihi Wasallam) ne apne Haj ke sath kiya tha is ke siwa tamam umray Zi Qadah hi mein kiye thay. Hudaibiyah ka Umrah aur doosre saal is ki qaza ka Umrah tha. (Kyunke Aap Sallallahu Alaihi Wasallam ne qiran kiya tha aur Hajjat-ul-Wida se mutaliq hai) aur Jirranah ka Umrah jab Aap (Sallallahu Alaihi Wasallam) ne jang-e-Hunain ki ghaneemat taqseem ki thi. Phir ek Umrah apne Haj ke sath kiya tha
.

Hum se Ahmad Bin Usman ne bayan kiya, unhon ne kaha hum se Shuraih Bin Maslama ne bayan kiya, unhon ne kaha ke hum se Ibrahim Bin Yusuf ne bayan kiya, un se un ke baap ne aur un se Abu Ishaq ne bayan kiya ke mein ne Masrooq, Ata aur Mujahid (Rahimahumullah) Ta'ala se poocha to in sab hazrat ne bayan kiya ke Rasul Allah (Sallallahu Alaihi Wasallam) ne Haj se pehle Zi Qadah hi mein umray kiye thay aur unhon ne bayan kiya ke mein ne Bara Bin Azib (Radi Allahu Anhu) se suna, unhon ne farmaya ke Nabi Kareem (Sallallahu Alaihi Wasallam) ne mah-e-Zi Qadah mein Haj se pehle do umray kiye thay
.

Hum se Ubaidullah Bin Moosli ne bayan kiya, unhon ne kaha ke hum se Israel ne, unhon ne kaha ke hum se Abu Ishaq ne bayan kiya aur un se Bara (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne Dhul Qadah mein Umrah kiya to Makkah walon ne aap ko Makkah mein dakhil hone se rok diya, phir un se is shart par sulh hui ke hathiyar niyam mein daal kar Makkah mein dakhil hon ge
.

Musa Bin Masood ne bayan kiya ke hum se Sufyan Bin Saeed ne bayan kiya, un se Abu Ishaq ne aur un se Bara Bin Azib (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne sula Hudaybiya mushrikeen ke sath teen sharait par ki thi, (1) ye ke mushrikeen mein se agar koi aadmi Aap (Sallallahu Alaihi Wasallam) ke paas aa jaye to Aap (Sallallahu Alaihi Wasallam) ise wapas kar dein ge. Lekin agar Musalmanon mein se koi mushrikeen ke yahan panah le ga to ye log aise shaks ko wapas nahi karein ge. (2) ye ke Aap (Sallallahu Alaihi Wasallam) aayinda saal Makkah aa sakein ge aur sirf teen din thehrein ge. (3) ye ke hathiyar, talwar, teer waghera niyam aur tarkash mein daal kar hi Makkah mein dakhil hon ge. Chunanchay Abu Jandal (Radi Allahu Anhu) (jo Musalman ho gaye thay aur Quraish ne in ko qaid kar rakkha hua tha) beriyou ko ghaseette hue aaye, to Aap (Sallallahu Alaihi Wasallam) ne unhein (sharait-e-muahida ke mutabiq) mushrikou ko wapas kar diya. Imam Bukhari (Rahimahullah) ne kaha ke Momil ne Sufyan se Abu Jandal ka zikar nahi kiya hai aur "illa bi-julban-us-silaah" ke bajaye "illa bi-julab-us-silaah" ke alfaz naqal kiye hain
.

Aur Abdullah Bin Numair ne kaha, ke hum se Ubaidullah ne bayan kiya, un se Nafi ne aur un se Abdullah Bin Umar (Radi Allahu Anhuma) ne bayan kiya ke un ka ek ghoda bhag gaya tha aur dushmanon ne is ko pakad liya tha. Phir Musalmanon ko ghalba hasil hua to un ka ghoda unhein wapas kar diya gaya. Ye waqiya Rasul Allah (Sallallahu Alaihi Wasallam) ke ahd-e-mubarak ka hai. Isi tarah un ke ek ghulam ne bhag kar Rome mein panah hasil kar li thi. Phir jab Musalmanon ko is mulk par ghalba hasil hua to Khalid Bin Waleed (Radi Allahu Anhu) ne un ka ghulam unhein wapas kar diya. Ye waqiya Nabi Kareem (Sallallahu Alaihi Wasallam) ke baad ka hai
.

Phir hum ne Umm-ul-Momineen Aisha Radi Allahu Anha ke (apne ghar mein) miswak karne ki awaz suni to Urwah ne in se poocha: Ai iman walon ki maa! Aap ne suna hai ya nahi, Abu Abdur Rahman (Abdullah Bin Umar Radi Allahu Anhuma) kehte hain ke Nabi Kareem Sallallahu Alaihi Wasallam ne char umre kiye thay jis mein se ek Rajab mein kiya tha. Umm-ul-Momineen Radi Allahu Anha ne kaha ke Nabi Kareem Sallallahu Alaihi Wasallam ne jab bhi umra kiya to Abdullah Bin Umar Radi Allahu Anhuma Aap ke sath thay lekin Aap ne Rajab mein koi umra nahi kiya
.