Hum se Qutaiba Bin Saeed ne bayan kiya, kaha hum se Yaqub ne bayan kiya, un se Abu Hazim ne aur unhon ne Sahl Bin Saad Radi Allahu Anhu se suna, un se Nabi Kareem Sallallahu Alaihi Wasallam ke (Ghazwa Uhud ke mauqe par hone wale) zakhmon ke mutaliq pucha gaya, to unhon ne bayan kiya ke Allah ki qasam! Mujhe acchi tarah yaad hai ke Rasul Allah Sallallahu Alaihi Wasallam ke zakhmon ko kis ne dhoya tha aur kaun in par pani daal raha tha aur jis dawa se Aap ka ilaj kiya gaya. Unhon ne bayan kiya ke Fatima Radi Allahu Anha Rasul Allah Sallallahu Alaihi Wasallam ki sahibzadi khoon ko dho rahi thin. Ali Radi Allahu Anhu dhaal se pani daal rahe thay. Jab Fatima Radi Allahu Anha ne dekha ke pani dalne se khoon aur zyada nikla aa raha hai to unhon ne chataiyi ka ek tukra le kar jalaya aur phir ise zakham par chipka diya jis se khoon ka aana band ho gaya. Isi din Nabi Kareem Sallallahu Alaihi Wasallam ke aage ke dandan-e-mubarak shaheed hue thay. Aap Sallallahu Alaihi Wasallam ka chehra-e-mubarak bhi zakhmi ho gaya tha aur khud sar-e-mubarak par toot gayi thi
.

Hum se Muhammed ne bayan kiya, kaha hum se Sufyan bin ’Uyainah ne Ibn-e-Abi Hazim ke waaste se naql kiya, unhon ne Sahl bin Sa’d As-Sa’idi se suna ke logon ne un se poocha, aur (main us waqt Sahl ke itna qareeb tha ke) mere aur un ke darmiyaan koi doosra haail na tha ke Rasoolullah Sallallahu Alaihi Wasallam ke (Uhud ke) zakhm ka ilaaj kis dawa se kiya gaya tha. Unhon ne kaha ke is baat ka jaanne waala (ab) mujh se ziyada koi nahi raha. ’Ali Radhiallahu Anhu apni dhaal mein paani laate aur Fatima Radhiallahu Anha Aap Sallallahu Alaihi Wasallam ke munh se khoon dhootien phir ek boriya ka tukda jalaya gaya aur Aap Sallallahu Alaihi Wasallam ke zakhm mein bhar diya gaya.

Hum se Ali Bin Abdullah Madini ne bayan kiya ‘ kaha hum se Sufyan Bin Uyainah ne bayan kiya ‘ kaha hum se Abu Hazim ne bayan kiya ‘ kaha ke Sahl Bin Saad Saidi (Radi Allahu Anhu) se shagirdon ne poocha ke (jung-e-Uhud mein) Nabi Kareem (Sallallahu Alaihi Wasallam) ke zakhmon ka ilaj kis dawa se kiya gaya tha? Sahl ne is par kaha ke ab sahaba mein koi shakhs bhi aisa zinda maujood nahi hai jo is ke bare mein mujh se ziyada janta ho. Ali (Radi Allahu Anhu) apni dhaal mein pani bhar-bhar kar la rahe thay aur Sayyida Fatima (Radi Allahu Anha) Aap (Sallallahu Alaihi Wasallam) ke chehre se khoon ko dho rahi thiin. Aur ek boriya jalaya gaya tha aur Aap ke zakhmon mein isi ki raakh ko bhar diya gaya tha
.

Hum se Qutaybah bin Saeed ne byaan kiya, kaha hum se Uyaynah ne byaan kiya, in se Abu Hazim Salamah bin Dinar ne byaan kiya ke is waqia mein logon mein ikhtilaf tha ke Uhud ki jang ke mauqa par Rasool Allah salla Allahu alaihi wasallam ke liye kaun si dawa istemal ki gayi thi. Phir logon ne Sahl bin Saad Saadi razi Allahu anhu se sawal kiya, woh is waqt aakhri sahabi thay jo Madinah Munawwarah mein maujood thay. Unhon ne batlaya ke ab koi shakhs aisa zinda nahi jo is waqia ko mujh se zyada jaanta ho. Fatima razi Allahu anha Nabi Karim salla Allahu alaihi wasallam ke chehra mubarak se khoon dho rahi thien aur Ali razi Allahu anhu apne dhaal mein pani bhar kar la rahe thay. (jab band na hua to) ek boriya jala kar Aap ke zakham mein bhar diya gaya.

Mujh se Saeed bin Afir ne bayan kiya, unhon ne kaha hum se Yaqoob bin Abdur Rahman ne bayan kiya, in se Abu Hazim ne bayan kiya, aur in se Sahl bin Saad Saadi razi Allahu anhu ne bayan kiya ke jab Rasool Allah salla Allahu alaihi wasallam ke sar par (Uhud ke din) khud toot gaya Aap ka mubarak chehra khoon-aalood ho gaya aur samne ke daant toot gaye to Ali razi Allahu anhu dhaal bhar bhar kar pani laate thay aur Fatima razi Allahu anha Aap ke chehra mubarak se khoon dho rahi thien. Phir jab Fatima razi Allahu anha ne dekha ke khoon pani se bhi zyada aa raha hai to unhon ne ek boriya jala kar Rasool Allah salla Allahu alaihi wasallam ke zakhmon par lagaya aur is se khoon ruka.