Hum se Abdan ne bayan kiya, kaha hum ko Abu Hamza ne khabar di, un se Usman Bin Mauhab ne bayan kiya ke ek sahib Bait-Allah ke hajj ke liye aaye thay. Dekha ke kuch log baithe hue hain. Pucha ke ye baithe hue kaun log hain? Logon ne bataya ke ye Quraish hain. Pucha ke in mein sheikh kaun hain? Bataya ke Ibn Umar (Radi Allahu Anhuma). Wo sahib Ibn Umar (Radi Allahu Anhuma) ke pas aaye aur un se kaha ke mein Aap se ek baat puchta hoon. Aap mujh se waqiat (sahih) bayan kar dijiye. Is ghar ki hurmat ki qasam de kar mein Aap se puchta hoon. Kya Aap ko maloom hai ke Usman Radi Allahu Anhu ne Ghazwa Uhud ke mauqe par rah-e-farar ikhtiyar ki thi? Unhon ne kaha ke haan sahih hai. Unhon ne pucha Aap ko ye bhi maloom hai Usman Radi Allahu Anhu Badr ki larayi mein shareek nahi thay? Kaha ke haan ye bhi hua tha. Unhon ne pucha aur Aap ko ye bhi maloom hai ke wo Baiat-e-Rizwan (Sulh-e-Hudaibiya) mein bhi peeche reh gaye thay aur hazir na ho sake thay? Unhon ne kaha ke haan ye bhi sahih hai. Is par in sahib ne (mare khushi ke) Allahu Akbar kaha lekin Ibn Umar (Radi Allahu Anhuma) ne kaha. Yahan ao mein tumhein bataonga aur jo sawalat tum ne kiye hain in ki mein tumhare samne tafseel bayan kar doonga. Uhud ki larayi mein farar se mutaliq jo tum ne kaha to mein gawahi deta hoon ke Allah Ta'ala ne in ki ghalti maaf kar di hai. Badr ki larayi mein in ke na hone ke mutaliq jo tum ne kaha to is ki wajah ye thi. Ke in ke nikah mein Rasul Allah Sallallahu Alaihi Wasallam ki sahibzadi (Ruqayya Radi Allahu Anha) thin aur wo bimar thin. Aap ne farmaya tha ke tumhein is shakhs ke barabar sawab mile ga jo Badr ki larayi mein shareek hoga aur isi ke barabar maal-e-ghanimat se hissa bhi mile ga. Baiat-e-Rizwan mein in ki adam-e-shirkat ka jahan tak sawal hai to wadi-e-Makka mein Usman Bin Affan Radi Allahu Anhu se zyada koi shakhs har dil aziz hota to Nabi Kareem Sallallahu Alaihi Wasallam in ke bajaye isi ko bhejte. Is liye Usman Radi Allahu Anhu ko wahan bhejna para aur Baiat-e-Rizwan is waqt hui jab wo Makka mein thay. (Baiat leyte hue) Nabi Kareem Sallallahu Alaihi Wasallam ne apne dayein hath ko utha kar farmaya ke ye Usman ka hath hai aur ise apne (baayein) hath par maar kar farmaya ke ye baiat Usman ki taraf se hai. Ab ja sakte ho. Albatta meri baaton ko yaad rakhna
.

Hum se Musa Bin Ismail ne bayan kiya, kaha hum se Abu Awana ne bayan kiya, kaha hum se Usman Bin Mouhab (Radi Allahu Anhu) ne bayan kiya, aur un se Ibn Umar (Radi Allahu Anhuma) ke Usman (Radi Allahu Anhu) Badr ki ladai mein shareek na ho sake thay. Un ke nikah mein Rasul Allah (Sallallahu Alaihi Wasallam) ki ek sahibzadi theen aur wo bimar theen. Un se Nabi Kareem (Sallallahu Alaihi Wasallam) ne farmaya ke tumhein bhi itna hi sawab milega jitna Badr mein shareek hone wale kisi shakhs ko, aur itna hi hissa bhi milega
.

Mujh se Muhammad bin Hatim bin Bazi ne bayan kiya, kaha hum se Shadhan ne bayan kiya, kaha hum se Abdul Aziz bin Abi Salamah Majishoon ne bayan kiya, in se Ubaidullah ne, in se Nafi ne aur in se Abdullah bin Umar Radi Allahu Anhuma ne bayan kiya ke Nabi Kareem Sallallahu Alaihi Wa Sallam ke ehad mein hum Abu Bakr Radi Allahu Anhu ke barabar kisi ko nahi qarar dete thay. Phir Umar Radi Allahu Anhu ko phir Uthman Radi Allahu Anhu ko. Is ke baad Nabi Kareem Sallallahu Alaihi Wa Sallam ke Sahaba par hum koi behas nahi karte thay aur kisi ko ek doosre par fazeelat nahi dete thay, is hadeeth ko Abdullah bin Salih ne bhi Abdul Aziz se riwayat kiya hai. Is ko Ismaili ne wasal kiya hai.